യുദ്ധത്തിന്റെ കറുത്ത പുകപടലങ്ങൾക്കിടയിൽ നിന്നും, പലായനത്തിന്റെ കയ്പേറിയ ഓർമ്മകളിൽ നിന്നും പ്രത്യാശയുടെ ഒരു വലിയ പ്രകാശം ഉദിച്ചിരിക്കുകയാണ് ജർമ്മനിയിൽ. വർഷങ്ങൾക്കു മുൻപ് ബോസ്നിയയിലെ രക്തരൂഷിതമായ ആഭ്യന്തരയുദ്ധത്തിൽ നിന്നും ജീവനും കൊണ്ട് ഓടിരക്ഷപെട്ട ഒരു മുസ്ലീം അഭയാർഥി ബാലൻ! ആ ബാലൻ ഇന്ന് ജർമ്മനിയിൽ കത്തോലിക്കാ സഭയുടെ വൈദികനായി അഭിഷിക്തനായിരിക്കുകയാണ്. 41 കാരനായ സെനാദ് മൃകാൽജെവിച്ച് എന്ന വൈദികന്റെ പൗരോഹിത്യസ്വീകരണമാണ് ഇന്ന് ലോകമെമ്പാടുമുള്ള ക്രൈസ്തവ വിശ്വാസികൾക്കിടയിൽ പ്രതീക്ഷയുടെ പരിമളം പരത്തുന്നത്.
തൊണ്ണൂറുകളുടെ തുടക്കത്തിൽ ബോസ്നിയ ആൻഡ് ഹെർസഗോവിനയിൽ നടന്ന വംശീയകലാപവും യുദ്ധവും ലക്ഷക്കണക്കിന് മനുഷ്യരുടെ ജീവിതമാണ് തകർത്തത്. ഒരു പരമ്പരാഗത മുസ്ലീം കുടുംബത്തിൽ ജനിച്ച ഈ യുവാവിന് തന്റെ അഞ്ചാം വയസ്സിൽ ജന്മനാടും വീടും ഉപേക്ഷിച്ച് പലായനം ചെയ്യേണ്ടിവന്നു. ബോംബുകളുടെ മുഴക്കവും മൃതദേഹങ്ങൾ ചിതറിക്കിടക്കുന്ന തെരുവുകളും മാത്രമായിരുന്നു അവന്റെ ബാല്യകാല ഓർമ്മകൾ. വിദ്വേഷത്തിന്റെ ആ അന്തരീക്ഷത്തിൽ നിന്നും രക്ഷപെടാനായി അവന്റെ കുടുംബം തിരഞ്ഞെടുത്തത് ജർമ്മനിയായിരുന്നു.
ജർമ്മനിയിലെത്തിയ ആ അഭയാർഥി കുടുംബത്തിന് പുതിയൊരു ജീവിതം കെട്ടിപ്പടുക്കുക എളുപ്പമായിരുന്നില്ല. എങ്കിലും, ജർമ്മനിയിലെ കത്തോലിക്കാ സന്നദ്ധസംഘടനകളും പ്രാദേശിക ഇടവകകളും നൽകിയ കരുതലും സ്നേഹവുമാണ് ഈ കുടുംബത്തിന് ആശ്വാസമായത്. പുതിയ സാഹചര്യങ്ങളുമായി പൊരുത്തപ്പെടുന്നതിനിടയിൽ, കത്തോലിക്കാ സുഹൃത്തുക്കളുമായുള്ള സമ്പർക്കം ഈ യുവാവിനെ യേശുക്രിസ്തുവിന്റെ സുവിശേഷത്തിലേക്ക് ആകർഷിച്ചു.
യുദ്ധത്തിന്റെ ക്രൂരതകൾ കണ്ട കുരുന്നുമനസ്സിൽ ക്രിസ്തുവിന്റെ സ്നേഹവും സമാധാനത്തിന്റെ സന്ദേശവും ആഴത്തിൽ പതിഞ്ഞു. കൗമാരപ്രായത്തിൽ സ്വയം എടുത്ത തീരുമാനപ്രകാരം അദ്ദേഹം കത്തോലിക്കാവിശ്വാസം സ്വീകരിക്കുകയും ജ്ഞാനസ്നാനം വഴി സഭയുടെ ഭാഗമാകുകയും ചെയ്തു.
വിശ്വാസം സ്വീകരിച്ചതോടെ ഈ യുവാവിന്റെ ജീവിതലക്ഷ്യം തന്നെ മാറിമറിഞ്ഞു. ആത്മീയതയോടുള്ള ആഴമായ താൽപര്യവും മനുഷ്യരെ സേവിക്കാനുള്ള ആഗ്രഹവും അദ്ദേഹത്തെ ഒരു വൈദികനാകുക എന്ന തീവ്രമായ ആഗ്രഹത്തിലേക്കെത്തിച്ചു. വർഷങ്ങൾ നീണ്ട കഠിനമായ പഠനത്തിനും പ്രാർഥനകൾക്കും പരിശീലനങ്ങൾക്കുമൊടുവിൽ, ജർമ്മനിയിലെ കത്തീഡ്രൽ ദൈവാലയത്തിൽ വച്ചു നടന്ന പ്രൗഢഗംഭീരമായ ചടങ്ങിൽ അദ്ദേഹം പൗരോഹിത്യം സ്വീകരിച്ചു.
ഒരുകാലത്ത് ഇസ്ലാമിക പശ്ചാത്തലത്തിൽ വളരുകയും പിന്നീട് അഭയാർഥിയായി അന്യനാട്ടിലെത്തുകയും ചെയ്ത ഒരാൾ കത്തോലിക്കാ വൈദികനായി മാറിയത് ജർമ്മൻ സഭയിലും വലിയ ചർച്ചയായിട്ടുണ്ട്. “യുദ്ധവും വിദ്വേഷവുമല്ല, മറിച്ച് ദൈവത്തിന്റെ കാരുണ്യവും സ്നേഹവുമാണ് ലോകത്തെ മാറ്റാൻ പോകുന്നതെന്ന് എന്റെ ജീവിതം സാക്ഷ്യപ്പെടുത്തുന്നു” എന്ന്, പൗരോഹിത്യസ്വീകരണത്തിനു ശേഷം നവവൈദികൻ വികാരാധീനനായി പറഞ്ഞു.
പലായനത്തിന്റെയും കഷ്ടപ്പാടുകളുടെയും പാതയിലൂടെ സഞ്ചരിക്കുന്ന ലോകമെമ്പാടുമുള്ള ദശലക്ഷക്കണക്കിന് അഭയാർഥികൾക്കും പ്രത്യാശ കൈവിടാതെ ജീവിക്കാൻ പ്രേരിപ്പിക്കുന്ന ഒന്നാണ് ഈ ദൈവവിളിയുടെ ചരിത്രം. തനിക്ക് അഭയം നൽകിയ ജർമ്മൻ മണ്ണിൽ ദൈവത്തിന്റെ സ്നേഹദൂതുമായി ഈ യുവവൈദികൻ പുതിയൊരു ദൗത്യത്തിന് തുടക്കം കുറിക്കുകയാണ്.
