താലിബാൻ ഭരണത്തിനു കീഴിൽ അഫ്ഗാനിസ്ഥാനിലെ സ്ത്രീകളുടെ യഥാർഥ ജീവിതം ഇതിനോടകം തന്നെ നാലു ചുവരുകൾക്കുള്ളിലായിക്കഴിഞ്ഞു. എന്നാൽ ഇപ്പോൾ ഡിജിറ്റൽ ജീവിതത്തിനും, സമൂഹമാധ്യമങ്ങളിലെ ചെറുത്തുനിൽപുകൾക്കു പോലും വിലങ്ങിട്ടിരിക്കുകയാണ് അധികാരികൾ. ഡിജിറ്റൽ ലോകത്തെ സ്വാതന്ത്ര്യവും നഷ്ടപ്പെട്ട് ഭയപ്പാടോടെ ജീവിക്കുന്ന അഫ്ഗാൻ പെൺകുട്ടികളുടെ കരളലിയിക്കുന്ന യാഥാർഥ്യങ്ങളാണ് ഇപ്പോൾ പുറത്തുവന്നിരിക്കുന്നത്. തുടർന്ന് വായിക്കുക.
വിദ്യാഭ്യാസത്തിനും ജോലിക്കും വിലക്കുകൾ നേരിടുന്ന അഫ്ഗാൻ സ്ത്രീകൾക്ക് സമൂഹമാധ്യമങ്ങൾ ഒരു ജീവശ്വാസമായിരുന്നു. ലോകവുമായി സംവദിക്കാനും ചെറുതെങ്കിലും സ്വന്തമായി ഒരു വരുമാനം കണ്ടെത്താനുമുള്ള ഏക വഴിയും ഇൻസ്റ്റാഗ്രാമും ഫേസ്ബുക്കുമൊക്കെയായിരുന്നു. എന്നാൽ അതും ഇപ്പോൾ താലിബാൻ ഇല്ലാതാക്കിയിരിക്കുകയാണ്.
സ്വന്തം കുടുംബാംഗങ്ങൾ തന്നെ ചാരന്മാരാകുമ്പോൾ
ഹെറാത്ത് നഗരത്തിൽ ഇൻസ്റ്റാഗ്രാമിൽ സജീവമായിരുന്ന 26 കാരിയായ സോമയ്യയെ (Somaiya) താലിബാൻ പിടികൂടുന്നത് സ്വന്തം ബന്ധുക്കളുടെ പരാതിയെ തുടർന്നാണ്. കുടുംബത്തിന്റെ ‘മാനത്തിന്’ കളങ്കം വരുത്തിയെന്ന് ആരോപിച്ച് ബന്ധുക്കൾ തന്നെ അവളെ താലിബാന്റെ വിചാരണ കോടതിക്കു മുന്നിൽ എത്തിക്കുകയായിരുന്നു. ജയിലിൽ അടയ്ക്കപ്പെടുമെന്ന് ഭയന്ന് വിചാരണ കോടതിക്കു മുന്നിൽ യാചിച്ച സോമയ്യ, ഒടുവിൽ സമൂഹമാധ്യമങ്ങളിലെ എല്ലാ അക്കൗണ്ടുകളും ഡിലീറ്റ് ചെയ്യാൻ നിർബന്ധിതയായി.
ജയിലറകളിലെ നടുക്കം
പ്രശസ്തമായ ഫാദേഴ്സ് ഡേ വീഡിയോ പങ്കുവച്ചതിന് അറസ്റ്റിലായ 18 കാരിയായ അലിയയുടെ അനുഭവം മറ്റൊരു നടുക്കമാണ്. ജയിലിലെ ഭീകര അന്തരീക്ഷം അവളുടെ മാനസികനിലയെത്തന്നെ ബാധിച്ചു. ദിവസങ്ങളോളം ജയിലിൽ കഴിഞ്ഞ അവൾക്ക് സ്വന്തം അമ്മയുടെയും അച്ഛന്റെയും മുഖം പോലും ഓർത്തെടുക്കാൻ കഴിയാത്ത അവസ്ഥയുണ്ടായി. ഒടുവിൽ സമൂഹമാധ്യമങ്ങൾ ഉപേക്ഷിക്കാമെന്ന് എഴുതിനൽകിയ കരാറിലാണ് അവൾക്ക് മോചനം ലഭിച്ചത്.
വ്യാജ ഇടപാടിലൂടെ വീടുകളിലേക്ക് എത്തുന്ന ഭീഷണി
കാബൂളിൽ ഓൺലൈൻ വഴി വസ്ത്രങ്ങൾ വിറ്റിരുന്ന സോറയ്യയുടെ അനുഭവം ഇതിലും ഭീകരമാണ്. ഒരു കസ്റ്റമറുടെ വ്യാജ വിലാസ അന്വേഷണത്തിലൂടെയാണ് താലിബാൻ ഉദ്യോഗസ്ഥർ അവളുടെ വീട്ടിലെത്തിയത്. എഐ ഉപയോഗിച്ച് നിർമ്മിച്ച വസ്ത്രങ്ങളുടെ ചിത്രങ്ങൾ പോസ്റ്റ് ചെയ്തുവെന്നാരോപിച്ച് അവളുടെ പിതാവിനെ സ്റ്റേഷനിലേക്ക് വലിച്ചിഴച്ചുകൊണ്ടുപോവുകയും കടുത്ത അപമാനത്തിന് ഇരയാക്കുകയും ചെയ്തു. ഒടുവിൽ മകളുടെ ഓൺലൈൻ വസ്ത്രവ്യാപാരം അവസാനിപ്പിക്കാൻ പിതാവ് പിതാവ് കർശനമായി ആവശ്യപ്പെടുകയായിരുന്നു.
പുറത്തിറങ്ങാനും ജോലി ചെയ്യാനുമുള്ള അവകാശങ്ങൾക്കൊപ്പം, സ്വന്തം അഭിപ്രായങ്ങൾ പങ്കുവയ്ക്കാനുള്ള ഡിജിറ്റൽ ഇടങ്ങൾ കൂടി നഷ്ടപ്പെടുന്ന അഫ്ഗാൻ സ്ത്രീകളുടെ അവസ്ഥ ലോകത്തിന്റെ ലോകമനഃസാക്ഷിയെ പിടിച്ചുകുലുക്കുന്ന ഒന്നാണ്. പ്രതീക്ഷകളെല്ലാം താലിബാൻ ഭരണകൂടം ഓരോന്നായി കരിച്ചുകളയുമ്പോൾ, ഇരുളടഞ്ഞ ഭാവിയെക്കുറിച്ച് ഓർത്ത് ഭയത്തോടെ ജീവിക്കുകയാണ് ഈ പെൺകുട്ടികൾ.
