സ്മാർട്ട് ഫോണുകളുടെ ഒരു ലോകത്തിലാണ് നാം ഇപ്പോൾ ജീവിക്കുന്നത്. ജീവിതത്തിലെ അഭിവാജ്യഘടകമായി സ്മാർട്ട് ഫോണുകൾ മാറിക്കഴിഞ്ഞിരിക്കുന്നു. ആശയവിനിമയത്തിൽ മാത്രമല്ല, ജീവിതത്തിന്റെ സമസ്തമേഖലകളിലും ഇവ പ്രധാനപങ്ക് വഹിക്കുന്നുണ്ട്. അതോടൊപ്പം, അമിതമായ സ്മാർട്ട് ഫോൺ ഉപയോഗം കുട്ടികളെ ശാരീരികവും മാനസികവും സാമൂഹികവുമായി വളരെയധികം സ്വാധീനിക്കുന്നു. അമിതമായ സ്മാർട്ട് ഫോൺ ആസക്തിയെ അതിജീവിക്കാൻ രക്ഷിതാക്കൾക്കു ചെയ്യാവുന്ന ചില കാര്യങ്ങൾ.
സ്മാർട്ട് ഫോൺ ഉപയോഗത്തിന് പരിധി നിശ്ചയിക്കാം
കുട്ടികളുടെ സ്മാർട്ട് ഫോൺ ഉപയോഗത്തിനു പരിധി നിശ്ചയിക്കേണ്ടത് അത്യാവശ്യമാണ്. ചില പ്രത്യേക സന്ദർഭങ്ങളിൽ സ്മാർട്ട് ഫോണുകളുടെ ഉപയോഗം കുറയ്‌ക്കേണ്ടതാണ്; ഭക്ഷണം കഴിക്കുമ്പോഴും ഉറങ്ങാൻ കിടക്കുമ്പോഴും ഫോൺ ഉപയോഗം നിയന്ത്രിക്കുക അത്യാവശ്യമാണ്.
ആരോഗ്യകരമായ പ്രവർത്തനങ്ങളെ പ്രോത്സാഹിപ്പിക്കുക
സദാസമയവും കുട്ടികൾക്ക് ഒരു ഫോണും നൽകി രക്ഷിതാക്കൾ അവരുടെ ഉത്തരവാദിത്വങ്ങളിൽ മുഴുകുന്നതിനു പകരം സ്പോർട്സ്, ഹോബികൾ, ക്രിയാത്മകമായ പ്രവർത്തനങ്ങൾ തുടങ്ങി വൈവിധ്യമാർന്ന വിനോദങ്ങളിൽ പങ്കെടുക്കാൻ കുട്ടികളെ പ്രേരിപ്പിക്കണം. കുട്ടികൾക്ക് ഇഷ്ടമുള്ള കാര്യങ്ങൾ ചെയ്യാൻ മാതാപിതാക്കൾ അവരെ പ്രോത്സാഹിപ്പിക്കുക. അത് സ്മാർട്ട് ഫോൺ ഉപയോഗത്തിൽ നിന്നും കുറെയൊക്കെ കുട്ടികൾ അകന്നുനിൽക്കുന്നതിനു കാരണമാകും.
തുറന്ന ആശയവിനിമയം പ്രോത്സാഹിപ്പിക്കാം
മാതാപിതാക്കൾക്കും കുട്ടികൾക്കുമിടയിൽ തുറന്ന ആശയവിനിമയം അത്യന്താപേക്ഷിതമാണ്. കുട്ടികളുടെ അമിതമായ ഫോൺ ഉപയോഗത്തെ ആരോഗ്യകരമായി കൈകാര്യം ചെയ്യാൻ ഈ തുറന്ന ആശയവിനിമയം സഹായിക്കും.
കുട്ടികളുടെ സ്മാർട്ട് ഫോൺ ലോകം നിരീക്ഷിക്കാം
കുട്ടികൾ ഉപയോഗിക്കുന്ന ആപ്പുകളുടെ ഉള്ളടക്കവും സമൂഹമാധ്യമങ്ങളുമെല്ലാം നിർബന്ധമായും രക്ഷിതാക്കൾ നിരീക്ഷിക്കേണ്ടതാണ്. ഇത് കുട്ടികളുടെ വ്യക്തിസ്വാതന്ത്ര്യത്തിലേക്കുള്ള കടന്നുകയറ്റമല്ല, മറിച്ച് ഉണ്ടാകാൻ സാധ്യതയുള്ള അപകടങ്ങളിൽനിന്ന് കുട്ടികളെ സംരക്ഷിക്കലാണ്. നിരവധി ചതിക്കുഴികൾ പതിയിരിക്കുന്ന സൈബർ ലോകത്തിൽ മാതാപിതാക്കളുടെ സജീവമായ ഇടപെടൽ ആവശ്യമാണ്.
