കുട്ടികളെ എത്ര പ്രശംസിച്ചാലും അധികമാകില്ല എന്ന്‌ ചിലർ പറയുന്നു. മറ്റു ചിലരാകട്ടെ, കുട്ടികളെ കൂടുതൽ പ്രശംസിക്കുന്നത്‌, അവരെ വഷളാക്കുമെന്നും എന്തും ചെയ്യാനുള്ള അവകാശമുണ്ടെന്ന്‌ ചിന്തിക്കാൻ പ്രേരിപ്പിക്കുമെന്നും വിശ്വസിക്കുന്നു.
നിങ്ങൾ കുട്ടിയെ എത്രത്തോളം പ്രശംസിക്കുന്നവരാണെങ്കിലും ഏത്‌ രീതിയിലുള്ള പ്രശംസയാണ്‌ നൽകുന്നത്‌ എന്നതുകൂടെ കണക്കിലെടുക്കേണ്ടതുണ്ട്‌. എങ്ങനെയുള്ള പ്രശംസയാണ്‌ കുട്ടിയെ പ്രോത്സാഹിപ്പിക്കുന്നത്‌, ഏത്‌ പ്രശംസ കുട്ടിയെ ഹാനികരമായി ബാധിക്കും, ഏറ്റവും മികച്ച ഫലമുളവാക്കുന്ന പ്രശംസ എങ്ങനെ നൽകാം തുടങ്ങിയ കാര്യങ്ങളാണ് ഇവിടെ പ്രതിപാദിക്കുന്നത്.
എല്ലാത്തരം പ്രശംസയും ഒരുപോലെ ഗുണം ചെയ്യില്ല. നമ്മുടെ കുട്ടികളെ അമിതമായി പ്രശംസിക്കുന്നത്‌ ഹാനികരമായേക്കാം. ആത്മവിശ്വാസം വർധിപ്പിക്കുന്നതിനായി ചില മാതാപിതാക്കൾ കുട്ടികൾക്ക്‌ അർഹിക്കാത്ത പ്രശംസ അമിതമായി നൽകുന്നു. എന്നാൽ, മാതാപിതാക്കൾ കാര്യങ്ങൾ ഊതിവീർപ്പിക്കുകയാണെന്നും അവർ പറയുന്നത്‌ വെറുംവാക്കാണെന്നും മനസ്സിലാക്കാനുള്ള കഴിവ് കുട്ടികൾക്കുണ്ട്. മാത്രമല്ല, ലഭിച്ച പ്രശംസ യഥാർഥത്തിൽ അർഹിക്കുന്നതല്ലെന്നും അതിനാൽ മാതാപിതാക്കളെ വിശ്വസിക്കാൻ കഴിയില്ലെന്നും ഉള്ള നിഗമനത്തിൽ കുട്ടികൾ എത്തിച്ചേർന്നേക്കാം.
കഴിവുകളെ അടിസ്ഥാനപ്പെടുത്തിയുള്ള പ്രശംസ വളരെ നല്ലതാണ്. ഉദാഹരണത്തിന്‌ നിങ്ങളുടെ മകൾക്ക്‌ ചിത്രം വരയ്‌ക്കാനുള്ള കഴിവുണ്ടെന്നിരിക്കട്ടെ. സ്വാഭാവികമായും നിങ്ങൾ അവളെ പ്രശംസിക്കും. അത്‌ അവളുടെ കഴിവിൽ കൂടുതൽ പ്രാവീണ്യം നേടാൻ സഹായിക്കും. എന്നാൽ ഇതിന്‌ ചില പോരായ്‌മകളുമുണ്ട്‌. ജന്മസിദ്ധമായ കഴിവുകളെപ്രതി മാത്രം പ്രശംസിക്കുകയാണെങ്കിൽ അത്തരം കഴിവുകൾ ഉണ്ടെങ്കിലേ കാര്യമുള്ളൂ എന്ന്‌ കുട്ടി ചിന്തിച്ചേക്കാം. പുതിയ ദൗത്യങ്ങൾ ഏൽപ്പിച്ചാൽ പരാജയപ്പെടുമോ എന്ന പേടി കാരണം അവ ഏറ്റെടുക്കാൻ മടികാണിച്ചേക്കാം. അവൾ അല്‌പം ശ്രമം ചെയ്‌ത്‌ നേടിയെടുക്കേണ്ട കാര്യം വരുമ്പോൾ ‘ഞാൻ അതിനു പറ്റിയ ആളല്ല, എന്നെക്കൊണ്ട്‌ അതിന്‌ കഴിയില്ല. വെറുതെ എന്തിന്‌ ശ്രമിച്ച്‌ പരാജയപ്പെടണം’ എന്ന്‌ അവൾ ന്യായവാദം ചെയ്‌തേക്കാം. അതുകൊണ്ടു തന്നെ ചിലപ്പോഴെങ്കിലും മറ്റു കാര്യങ്ങൾ അവർ ചെയ്യുമ്പോഴും നാം അവരെ പ്രചോദിപ്പിക്കുന്നത് വളരെ നല്ലതാണ്.
നിരന്തരമായ ശ്രമത്തെ അടിസ്ഥാനമാക്കിയുള്ള പ്രശംസയാണ്‌ ഏറ്റവും മെച്ചം. ജന്മസിദ്ധമായി ലഭിച്ച കഴിവുകളെക്കുറിച്ച്‌ മാത്രം പ്രശംസിക്കുന്നതിനു പകരം കഠിനാധ്വാനവും നിരന്തരമായ ശ്രമവും ചെയ്‌തതിനെപ്രതി കുട്ടികളെ പ്രശംസിക്കുകയാണെങ്കിൽ അവർ ഒരു അടിസ്ഥാനസത്യം മനസ്സിലാകും. ഈ വസ്‌തുത അവർ മനസ്സിലാക്കിയാൽ ആഗ്രഹിക്കുന്ന ഫലം നേടിയെടുക്കാൻ എത്രത്തോളം കഠിനാധ്വാനം ചെയ്യേണ്ടതുണ്ടോ അത്‌ ചെയ്യാൻ അവർ തയാറായിരിക്കും. ഇതിനിടെ പിഴവുകൾ സംഭവിച്ചാൽ അതിനെ ഒരു പരാജയമായിട്ടല്ല, പകരം വിജയത്തിലേക്കുള്ള ചവിട്ടുപടിയായി അവർ വീക്ഷിക്കും.
നിങ്ങളുടെ കുട്ടിയുടെ കഠിനാധ്വാനത്തെ അഭിനന്ദിക്കുക. “ഈ ചിത്രം പൂർത്തിയാക്കാൻ നീ വളരെ കഠിനധ്വാനം ചെയ്‌തിട്ടുണ്ട്‌” എന്നു പറയുന്നതാണ്‌ “നീ ജന്മനാ ഒരു കലാകാരൻതന്നെ” എന്നു പറയുന്നതിനെക്കാൾ ഗുണം ചെയ്യുന്നത്‌. മേൽപ്പറഞ്ഞ രണ്ട്‌ പ്രസ്‌താവനകളും പ്രശംസ തന്നെയാണ്‌. എന്നാൽ, രണ്ടാമത്‌ പറഞ്ഞ പ്രസ്‌താവനയിലൂടെ, ജന്മസിദ്ധമായ കഴിവുകൾ പ്രകടമാക്കാനാകുന്ന മേഖലകളിൽ മാത്രമേ കുട്ടിക്ക്‌ തിളങ്ങാൻ കഴിയൂ എന്ന്‌ നിങ്ങൾപോലും അറിയാതെ അവന്റെ മനസ്സിൽ വിതയ്ക്കുകയാണ് ചെയ്യുന്നത്‌.
പ്രചോദനമേകുന്ന വിമർശനങ്ങൾ നൽകുക. കുട്ടിയുടെ പോരായ്‌മകളെക്കുറിച്ച്‌ ഉചിതമായ രീതിയിൽ പറയുകയുന്നത്‌ അവന്റെ ആത്മവിശ്വാസത്തെ തകർക്കുകയായിരിക്കില്ല, പകരം വളരാൻ സഹായിക്കുകയായിരിക്കും. ഒപ്പം അർഹിക്കുന്ന അഭിനന്ദനവും പതിവായി നൽകുമ്പോൾ കൂടുതലായ പുരോഗതിക്ക്‌ എന്തെല്ലാം ചെയ്യാൻ കഴിയും എന്നതിനെക്കുറിച്ചുള്ള ബുദ്ധിയുപദേശം അവൻ സ്വീകരിക്കാനാണ്‌ സാധ്യത. പിന്നീട്‌ അവൻ നേട്ടങ്ങൾ കൈവരിക്കുമ്പോൾ അത്‌ നിങ്ങൾക്ക്‌ ഇരുവർക്കും സന്തോഷിക്കാനുള്ള കാര്യമായിത്തീരുകയും ചെയ്യും.
