ഒരു ഫുട്ബോൾ മത്സരം പെനാൽറ്റി ഷൂട്ടൗട്ടിലേക്ക് നീങ്ങുമ്പോൾ കാണികൾക്ക് അത് ആവേശമാണെങ്കിലും കളിക്കാർക്ക് അത് കടുത്ത മാനസിക സമ്മർദ്ദത്തിന്റെ നിമിഷങ്ങളാണ്. 120 മിനിറ്റ് നീണ്ട കൂട്ടായ്മയുടെയും കഠിനാധ്വാനത്തിന്റെയും കളി ഒടുവിൽ ഗോൾകീപ്പറും കിക്കറും തമ്മിലുള്ള ഒരു ഒറ്റയാൾ പോരാട്ടമായി മാറുന്നു. ഇതിൽ നിന്നും നമ്മുടെ ജീവിതത്തിലേക്ക് പകർത്താൻ കഴിയുന്ന ചില ആത്മീയ പാഠങ്ങളുണ്ട്.
1. പ്രതിസന്ധികളിലെ ഒറ്റയാൾ പോരാട്ടം
നമ്മുടെ ജീവിതം കുടുംബവും സുഹൃത്തുക്കളും ഉൾപ്പെടുന്ന ഒരു വലിയ കൂട്ടായ്മയാണെങ്കിലും ചില നിർണായക നിമിഷങ്ങളിൽ നമ്മൾ തികച്ചും ഒറ്റയ്ക്കായിരിക്കും. ഒരു പെനാൽറ്റി ബോക്സിൽ ഗോൾകീപ്പറെ മാത്രം അഭിമുഖീകരിക്കുന്ന കളിക്കാരനെപ്പോലെ ജീവിതത്തിലെ വലിയ വെല്ലുവിളികളെ നേരിടേണ്ടി വരുന്നത് നമ്മൾ ഒറ്റയ്ക്കാണ്. ആ നിമിഷങ്ങളെ നമ്മൾ എങ്ങനെ നേരിടുന്നു എന്നതാണ് നമ്മുടെ വ്യക്തിത്വം നിശ്ചയിക്കുന്നത്.
2. പരാജയങ്ങൾ സ്വാഭാവികമാണ്
ലയണൽ മെസ്സിയെയും എംബാപ്പെയെയും പോലുള്ള ലോകത്തിലെ ഏറ്റവും മികച്ച കളിക്കാർ പോലും പെനാൽറ്റി കിക്കുകൾ കൈവിട്ടിട്ടുണ്ട്. ലോകകപ്പ് പോലെയുള്ള വലിയ വേദികളിൽ സമ്മർദ്ദത്തിന് അടിമപ്പെടുക എന്നത് മനുഷ്യസഹജമാണ്. ജീവിതത്തിൽ നമ്മൾ എത്ര മികച്ചവരാണെങ്കിലും ചിലപ്പോൾ പരാജയപ്പെടാം എന്ന യാഥാർത്ഥ്യം ഇത് നമ്മെ ഓർമ്മിപ്പിക്കുന്നു. പരാജയങ്ങൾ ജീവിതത്തിന്റെ അവസാനമല്ല മറിച്ച് മനുഷ്യസഹജമായ ഒരു അവസ്ഥ മാത്രമാണ്.
3. ധീരതയാണ് പ്രധാനം
ഓസ്ട്രേലിയയുടെ കൗമാരക്കാരനായ ലൂക്കാസ് ഹെറിംഗ്ടൺ എടുത്ത പെനാൽറ്റി കിക്ക് ലക്ഷ്യം കാണാതെ പോയപ്പോൾ രാജ്യം പുറത്തായെങ്കിലും ആ നിർണായക നിമിഷത്തിൽ അദ്ദേഹം കാണിച്ച ധീരതയാണ് ആരാധകർ നെഞ്ചിലേറ്റിയത്. ഫലം എന്തായാലും പ്രതിസന്ധികളെ ഭയപ്പെടാതെ നേരിടാനുള്ള ആത്മവിശ്വാസമാണ് പ്രധാനം.
പെനാൽറ്റി കിക്കുകൾ ഭാഗ്യത്തിന്റെയും കളിമിടുക്കിന്റെയും മാത്രമല്ല ആത്മനിയന്ത്രണത്തിന്റെയും പാഠമാണ്. ജീവിതത്തിലെ വലിയ പരീക്ഷണം നേരിടുമ്പോൾ ഫലത്തെക്കുറിച്ച് ആകുലപ്പെടാതെ പൂർണ്ണമായ ആത്മാർഥതയോടെയും ധീരതയോടെയും അതിനെ നേരിടുക എന്നതാണ് ഏറ്റവും വലിയ ആത്മീയ വിജയം.
സീനിയ എൽസ ഇഗ്നേഷ്യസ്
