മനുഷ്യജീവിതത്തിൽ അധ്വാനത്തിന് ദൈവികമായ ഒരു തലം നൽകിയ വിശുദ്ധനാണ് യൗസേപ്പിതാവ്. പ്രശസ്ത ചിത്രകാരൻ പിയെത്രോ അന്നിഗോണി 1964-ൽ പൂർത്തിയാക്കിയ ‘തൊഴിലാളിയായ വിശുദ്ധ യൗസേപ്പിതാവ്’ ( St. Joseph, the Worker) എന്ന ചിത്രം ഈ ആത്മീയ സത്യത്തെ കലയുടെ ചായക്കൂട്ടുകളിലൂടെ മനോഹരമായി ആവിഷ്കരിച്ചിരിക്കുന്നു. ഫ്ലോറൻസിലെ ബസിലിക്ക ഓഫ് സാൻ ലോറെൻസോയിലെ നവോത്ഥാന വിസ്മയങ്ങൾക്കിടയിൽ ഒരു ആധുനിക രചനയായി തിളങ്ങിനിൽക്കുന്ന ഈ ചിത്രം, തൊഴിലാളിയുടെ അന്തസ്സും കുടുംബജീവിതത്തിലെ സ്നേഹവും ഒരുപോലെ വരച്ചുകാട്ടുന്നു. തന്റെ പണിശാലയിൽ ബാലനായ യേശുവിനെ മരപ്പണി പഠിപ്പിക്കുന്ന യൗസേപ്പിതാവിന്റെ കരുത്തുറ്റ ഈ ചിത്രം വിശ്വാസികൾക്ക് വലിയൊരു പ്രചോദനമാണ്.
ചിത്രത്തിന്റെ ഇടതുഭാഗത്തെ ചരിഞ്ഞ വരകൾ കാഴ്ചക്കാരന്റെ ശ്രദ്ധ താഴെ കിടക്കുന്ന മരപ്പലകയിൽ നിന്ന് ആകാശത്ത് തെളിയുന്ന സ്വർണ്ണ പ്രകാശത്തിലേക്ക് നയിക്കുന്നു. കുരിശിന്റെ ആകൃതിയിൽ നാനാഭാഗത്തേക്ക് വ്യാപിക്കുന്ന ഈ ദിവ്യപ്രകാശം യൗസേപ്പിതാവും യേശുവും നിൽക്കുന്ന പണിശാലയിലേക്ക് ഒഴുകിയിറങ്ങുന്നതായി കാണാം. കരുത്തുറ്റ ശരീരപ്രകൃതിയുള്ള യൗസേപ്പിതാവ് നീല വസ്ത്രവും ഏപ്രണും ധരിച്ച് തന്റെ പ്രിയപ്പെട്ട മകനെ ശ്രദ്ധയോടെ നോക്കുന്നു. സ്വർണ്ണത്തലമുടിയുള്ള ബാലനായ യേശു കൗതുകത്തോടെ മരപ്പണി പഠിക്കാൻ ശ്രമിക്കുന്നതും, പിതാവ് മകന്റെ തലയിൽ കൈ വച്ചിരിക്കുന്നതും ഹൃദയസ്പർശിയായ കാഴ്ചയാണ്.
ചിത്രത്തിൽ ബാലനായ യേശുവിന്റെ കൈയ്യിലിരിക്കുന്ന മൂന്ന് ആണികൾ ഏറെ പ്രതീകാത്മകമാണ്. ഒരു മരപ്പണിക്കാരന്റെ പണിശാലയിലെ സാധാരണ വസ്തുക്കളാണെങ്കിലും, ഭാവിയിൽ ലോകരക്ഷയ്ക്കായി യേശു സഹിക്കാനിരിക്കുന്ന പീഡാനുഭവങ്ങളെയും കുരിശുമരണത്തെയും ഇത് സൂചിപ്പിക്കുന്നു. യേശുവിന്റെ കാലുകൾക്ക് സമീപമുള്ള ചുവന്ന പാടുകളും വരാനിരിക്കുന്ന രക്തച്ചൊരിച്ചിലിന്റെ അടയാളമായി ചിത്രകാരൻ ഉൾപ്പെടുത്തിയിരിക്കുന്നു. ‘തച്ചന്റെ മകൻ’ എന്ന് ലോകം വിളിച്ച യേശുവിന് അധ്വാനത്തിന്റെ ആദ്യപാഠങ്ങൾ പകർന്നുനൽകിയത് യൗസേപ്പിതാവായിരുന്നു എന്നതും ആ ബന്ധത്തിന്റെ ആഴം വർധിപ്പിക്കുന്നു.
വിശുദ്ധ പൗലോസ് ശ്ലീഹാ പഠിപ്പിക്കുന്നത് പോലെ, ‘നിങ്ങളുടെ ജോലി എന്തുതന്നെയായിരുന്നാലും മനുഷ്യനെയല്ല, ദൈവത്തെ സേവിക്കുന്നതുപോലെ ഹൃദയപരമാർഥതയോടെ ചെയ്യുവിൻ’ (കൊളോ 3:23). അത് തന്നെയാണ് ഈ ചിത്രം നമ്മോടും ആഹ്വാനം ചെയ്യുന്നത്. അനിശ്ചിതത്വം നിറഞ്ഞ പശ്ചാത്തലത്തിലും തന്റെ ഉത്തരവാദിത്തങ്ങളിൽ നിന്ന് വ്യതിചലിക്കാതെ ജോലി ചെയ്യുന്ന യൗസേപ്പിതാവ്, ഓരോ തൊഴിലാളിക്കും മാതൃകയാണ്. ചുറ്റുമുള്ള ലോകത്തിന്റെ അരക്ഷിതാവസ്ഥയല്ല, മറിച്ച് കൂടെയുള്ള ദൈവസാന്നിധ്യമാണ് നമ്മുടെ പ്രവർത്തികളെ ധന്യമാക്കുന്നത്. തന്റെ ദൈവത്വം മറച്ചുവെച്ച് ഒരു സാധാരണ തൊഴിലാളിയായി ജീവിച്ച ക്രിസ്തുവാണ് അധ്വാനത്തിന്റെ യഥാർഥ അന്തസ്സ്.
മെയ് ഒന്നിന് തൊഴിലാളികളുടെ മധ്യസ്ഥനായ വി. യൗസേപ്പിതാവിനെ വണങ്ങുമ്പോൾ, നമ്മുടെ അധ്വാനങ്ങളെയും ഈ മഹാവിശുദ്ധനെപ്പോലെ ദൈവത്തിനുള്ള ആരാധനയായി മാറ്റാൻ നമുക്ക് ശ്രമിക്കാം.
