ഗ്വാട്ടിമാലയിലെ ഏറ്റവും മനോഹരമായ കത്തീഡ്രലുകളിൽ ഒന്നാണ് ഗ്വാട്ടിമാലയിലെ കത്തീഡ്രൽ ബസിലിക്ക എന്ന ബസിലിക്ക ഓഫ് ദി ബ്ലാക്ക് ക്രൈസ്റ്റ്. ഇവിടുത്തെ വലിയൊരു ആഘോഷം ഈ ബസിലിക്കയെ ചുറ്റിപ്പറ്റിയുള്ളതാണ്. ജനുവരി 15-16 തീയതികളിൽ, ലാറ്റിൻ അമേരിക്കയിലെമ്പാടുമുള്ള ആയിരക്കണക്കിന് തീർഥാടകർ കിഴക്കൻ ഗ്വാട്ടിമാലയിലെ എസ്ക്വിപുലസിലുള്ള ബസിലിക്ക ഓഫ് ദി ബ്ലാക്ക് ക്രൈസ്റ്റിലേക്ക് എത്തിച്ചേരുന്നു.
ഗ്വാട്ടിമാലയിലെ ഏറ്റവും വലുതും പ്രധാനപ്പെട്ടതുമായ ആഘോഷങ്ങളിൽ ഒന്നായ ഇത് ‘കറുത്ത ക്രിസ്തു’ വിനെയാണ് അനുസ്മരിക്കുന്നത്. 1594-ൽ ക്വിരിയോ കാറ്റാനോ സൃഷ്ടിച്ച ക്രിസ്തുവിന്റെ പ്രതിച്ഛായയാണ് ‘കറുത്ത ക്രിസ്തു’ അഥവാ ‘ബ്ലാക്ക് ക്രൈസ്റ്റ്’. 1740-ൽ നിർമ്മിച്ച ബസിലിക്കയ്ക്കുള്ളിൽ സ്ഥിതി ചെയ്യുന്ന കറുത്ത ക്രിസ്തുവിന്റെ രൂപം വളരെ പ്രസിദ്ധമാണ്. ഈ രൂപം ഇരുണ്ട മരം കൊണ്ട് കൊത്തിയെടുത്തതാണ്. ഇപ്പോൾ ഇത് വെളുത്ത സാറ്റിൻ കൊണ്ടും ആഭരണങ്ങൾ കൊണ്ടും അലങ്കരിച്ചിരിക്കുന്നു.
വർഷം മുഴുവനും എല്ലാ മതവിഭാഗങ്ങളിലുമുള്ള ആളുകൾക്ക് പ്രിയപ്പെട്ട ഒരു സ്ഥലമാണ് എസ്ക്വിപുലസിലെ കത്തീഡ്രൽ ബസിലിക്ക. മുൻകാലങ്ങളിൽ, തീർഥാടകർ ചുറ്റുമുള്ള ഗ്രാമങ്ങളിൽ നിന്ന് കാൽനടയായി എത്തുമായിരുന്നു. എന്നാൽ ആധുനിക കാലത്ത്, മിക്കവാറും എല്ലാ സന്ദർശകരും വാഹനങ്ങളിലാണ് വരുന്നത്. പ്രതിവർഷം ഏകദേശം 4.5 ദശലക്ഷം തീർഥാടകർ ഇവിടം സന്ദർശിക്കുന്നു.
1956-ൽ പയസ് പന്ത്രണ്ടാമൻ മാർപാപ്പ ഈ പള്ളിയെ കത്തീഡ്രൽ പദവിയിലേക്ക് ഉയർത്തി. കറുത്ത ക്രിസ്തുവിന്റെ ആരാധനയുടെ നാനൂറാം വാർഷികം ആഘോഷിക്കുന്നതിനായി ഗ്വാട്ടിമാലയിലേക്കുള്ള തന്റെ രണ്ടാമത്തെ അപ്പസ്തോലിക സന്ദർശന വേളയിൽ 1996 ഫെബ്രുവരി ആറിന് ജോൺ പോൾ രണ്ടാമൻ മാർപാപ്പ ഇവിടം സന്ദർശിച്ചിരുന്നു.
രോഗശാന്തി ശക്തിയുണ്ടെന്ന് പറയപ്പെടുന്ന ടിയറ സാന്താ കളിമൺ ഗുളികകൾക്കും എസ്ക്വിപ്പുലാസ് പ്രശസ്തമാണ്. എസ്ക്വിപ്പുലാസ് കത്തീഡ്രൽ സന്ദർശിക്കുന്നത് ഒരു മുഴുവൻ ദിവസത്തെ പരിപാടിയാണ്, കത്തീഡ്രലിനുള്ളിലെ കറുത്ത ക്രിസ്തുവിന്റെ രൂപം കാണുകയും എസ്ക്വിപ്പുലാസിലെ ഒരു റെസ്റ്റോറന്റിൽ പരമ്പരാഗത ഗ്വാട്ടിമാലൻ ഉച്ചഭക്ഷണം ആസ്വദിക്കുകയും തുടർന്ന് വീട്ടിലേക്ക് തിരികെ പോകുകയും ചെയ്യുന്നു.
