കാഞ്ഞിരപ്പള്ളി: വിദ്ധ്യാർത്ഥികൾ സോഷ്യൽ മീഡിയയുടെ അടിമകളാകാതെ ദൈവം നല്‍കിയ കഴിവുകളെ ഉപയോഗപ്പെടുത്തണമെന്ന് കോതമംഗലം രൂപതാധ്യക്ഷന്‍ മാര്‍ ജോർജ് മഠത്തിക്കണ്ടത്തിൽ. ആനക്കല്ല് സെന്‍റ് ആന്‍റണീസ് പബ്ലിക് സ്‌കൂളിലെ യംഗ് അച്ചീവേഴ്‌സ് ഡേയില്‍ മുഖ്യപ്രഭാഷണം നടത്തുകയായിരുന്നു ബിഷപ്.
ഓരോ കുട്ടികളും അമൂല്യരാണ്. പരീക്ഷകളില്‍ മാത്രം വിജയിച്ചാല്‍പ്പോരാ, നല്ല സ്വഭാവമുള്ള നാടിനും വീടിനും ഉപകാരികളായി കുട്ടികൾ ജീവിക്കണം അതിന് നല്ല കുടുംബാന്തരീക്ഷം ഒരുക്കിക്കൊടുക്കേണ്ട ഉത്തരവാദിത്വം മാതാപിതാക്കൾക്കുണ്ടാകണം എന്ന് ബിഷപ് കൂട്ടിച്ചേർത്തു.
സ്‌കൂള്‍ മാനേജര്‍ ഫാ. ഡൊമിനിക് കാഞ്ഞിരത്തിനാൽ അധ്യക്ഷത വഹിച്ചു. പ്രിന്‍സിപ്പല്‍ ഫാ. സണ്ണി കുരുവിള മണിയാക്കുപാറ പഠനപ്രവര്‍ത്തനങ്ങളുടെ റിപ്പോര്‍ട്ട് അവതരിപ്പിച്ചു. വൈസ് പ്രിന്‍സിപ്പല്‍ ഫാ. മനു കെ. മാത്യു, പിടിഎ പ്രസിഡന്‍റ് സോണി തോമസ്, ബനഡിക്ടന്‍ ഹോസ്റ്റല്‍ ഡയറക്ടര്‍ ഫാ. ജോസ് പുഴക്കര, സിസ്റ്റര്‍ ഗ്രെയ്‌സ്‌ന, സിസ്റ്റര്‍ മരിയ ജേക്കബ് എന്നിവര്‍ പ്രസംഗിച്ചു. പത്ത്, പന്ത്രണ്ട് ക്ലാസുകളില്‍ ഉന്നതവിജയം നേടിയ വിദ്യാർഥികള്‍ക്കുള്ള പുരസ്‌കാരങ്ങള്‍ സമ്മേളനത്തില്‍ വിതരണം ചെയ്തു.
