ഡൗൺ സിൻഡ്രോം ബാധിച്ച ഇരട്ടക്കുട്ടികൾ; ദൈവം നൽകിയ സമ്മാനമായി സ്വീകരിച്ച് ഒരമ്മ

“ഞാൻ അവരെ നന്നായി നോക്കുമെന്ന് ദൈവത്തിനറിയാം. അതിനാലാണ് അവരെ ദൈവം എനിക്ക് നൽകിയത്” – ഡൗൺ സിൻഡ്രോം ബാധിച്ച ഇരട്ടക്കുട്ടികളെ ദൈവം നൽകിയ സമ്മാനമായി സ്വീകരിച്ച ഒരമ്മയുടെ വാക്കുകളാണിത്.

കോംബ്‌സ് എന്ന അമ്മ ഗർഭിണി ആയിരിക്കുമ്പോൾ, ഇരട്ടക്കുട്ടികളാണ് തനിക്ക് ജനിക്കാൻ പോകുന്നതെന്ന് അവർക്കറിയാമായിരുന്നു. പക്ഷേ, അവർ ഡൗൺ സിൻഡ്രോം ബാധിച്ച കുഞ്ഞുങ്ങൾ ആയിരിക്കുമെന്ന് ആ അമ്മ അറിഞ്ഞില്ല. എന്നാൽ ദൈവം തന്ന തങ്ങളുടെ മക്കളെ ഒരു സമ്മാനമായി സ്വീകരിച്ച് പരിപാലിക്കുകയാണ് ഫ്ലോറിഡയിലെ ജാക്‌സൺവില്ലയിൽ നിന്നുള്ള ഈ കുടുംബം.

കുഞ്ഞുങ്ങൾക്ക് എന്തെങ്കിലും ആരോഗ്യപ്രശ്നങ്ങളുണ്ടോ എന്ന് പരിശോധനകൾ നടത്താൻ ആ അമ്മ സമ്മതിച്ചില്ല. “വൈകല്യങ്ങൾ ഉണ്ടോ എന്ന് പരിശോധനകൾ നടത്തിയാൽ അത് ചിലപ്പോൾ ഗർഭം അലസലിനു കാരണമാകും. അതിനാൽ ഞാൻ ഒഴിവാക്കി. എന്റെ കുഞ്ഞുങ്ങളെ നഷ്ടപ്പെടാൻ ഞാൻ ആഗ്രഹിക്കുന്നില്ല. എന്റെ മക്കൾ എങ്ങനെയാണോ ആ അവസ്ഥയിൽ അവരെ സ്നേഹിക്കാനായിരുന്നു എനിക്കിഷ്ട്ടം” – കോംബ്‌സ് എന്ന ഈ അമ്മ പറയുന്നു.

കെന്നാഡി റൂ, മക്കെൻലി അക്കർമാൻ എന്നീ ഇരട്ടപെൺകുട്ടികൾ ജനിച്ചപ്പോഴാണ് അവർ ഡൗൺ സിൻഡ്രോം ബാധിച്ചവരാണ് എന്നറിയുന്നത്. എങ്കിലും അവരോടുള്ള സ്നേഹത്തിന് ഒരു കുറവും ഈ അമ്മക്കുണ്ടായില്ല. അവർ മറ്റുള്ളവരെപ്പോലെയാണെന്ന് ലോകത്തോട് പങ്കുവയ്ക്കുകയാണ് ഈ അമ്മ.

“അവർക്ക് വികാരങ്ങളുണ്ട്. മിടിക്കുന്ന ഹൃദയമാണ് അവർക്കുള്ളത്. അവർക്ക് സംസാരിക്കാൻ അറിയാം. നിങ്ങൾ ചെയ്യുന്ന കാര്യങ്ങൾ എങ്ങനെ ചെയ്യണമെന്ന് അവർക്കറിയാം. അവർ കാര്യങ്ങൾ ചെയ്യുന്നത് ഒരു പടി പിന്നിലായിരിക്കാം. പക്ഷേ, അവർ എല്ലാ കാര്യങ്ങളും തനിയെ ചെയ്യും” – അവർ വെളിപ്പെടുത്തി.

ഇരട്ടക്കുട്ടികൾക്ക് രണ്ടു പേർക്കും ഡൗൺ സിൻഡ്രോം ഉണ്ടാകാനുള്ള സാധ്യത, രണ്ട് ദശലക്ഷത്തിൽ ഒന്ന് മാത്രമാണ്. ഈ അത്ഭുത ഇരട്ടകൾ കോംബ്സിന് ഒരു അനുഗ്രഹമാണ്.

സി. സൗമ്യ മുട്ടപ്പിള്ളിൽ DSHJ

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.