നാലു ദിവസത്തെ ഒൗദ്യോഗിക സന്ദർശനത്തിനായി സീറോ മലബാർ സഭ മേജർ ആർച്ച്ബിഷപ്പ് മാർ ജോർജ് ആലഞ്ചേരി ന്യൂസിലൻഡിലെത്തി. ന്യൂസിലൻഡ് അപ്പസ്തോലിക് വിസിറ്ററും മെൽബണ് രൂപത മെത്രാനുമായ മാർ ബോസ്കോ പുത്തൂർ, ന്യൂസിലൻഡ് സീറോ മലബാർ മിഷൻ കോർഡിനേറ്ററും ഓക്ലൻഡ് മിഷൻ ചാപ്ലിനുമായ ഫാ. ജോയി തോട്ടങ്കര, അസിസ്റ്റന്റ് ചാപ്ലിൻ ഫാ. തോമസ് ചെറുകാനായിൽ, ഹാമിൽട്ടണ് കമ്യൂണിറ്റി ചാപ്ലിൻ ഫാ. ജോബിൻ വന്യംപറന്പിൽ എന്നിവരുടെ നേതൃത്വത്തിൽ സ്വീകരിച്ചു.
വെള്ളിയാഴ്ച വൈകിട്ട് ഹാമിൽട്ടണിലും ശനിയാഴ്ച ക്രൈസ്റ്റ് ചർച്ചിലും അദ്ദേഹം വിശുദ്ധ ബലി അർപ്പിക്കുകയും രൂപതാധികാരികളുമായി കൂടിക്കാഴ്ച നടത്തുകയും ചെയ്യും. ഞായറാഴ്ച 25 കുട്ടികളുടെ പ്രഥമ ദിവ്യകാരുണ്യ സ്വീകരണവും സ്ഥൈര്യലേപനവും അദ്ദേഹത്തിന്റെ കാർമ്മികത്വത്തിൽ നടത്തും.
മാർ ബോസ്കോ പുത്തൂർ, ഓഷ്യാനിയ പ്രൊവിൻഷ്യൽ ഫാ. എഡ്മണ്ട് നിക്സണ്, കേരള പ്രൊവിൻഷ്യാൽ ഫാ. ജോയി പൂണേലി, ഓക്ലൻഡ് മിഷൻ സ്ഥാപക ചാപ്ലിൻ ഫാ. അലക്സ് വിരുതുകുളങ്ങര, ഫാ. മനോജ് കുന്നത്ത്, ഫാ. ജോബിൻ, ഫാ. തോമസ്, മറ്റു മലയാളി വൈദികരും തിരുകർമങ്ങളിൽ സഹകാർമികരാവും.
ഓക്ലൻഡ് സീറോ മലബാർ മിഷന്റെ പത്താം വാർഷികാഘോഷങ്ങൾ മാര് ആലഞ്ചേരി ഉദ്ഘാടനം ചെയ്യും. മിഷന്റെ വളർച്ചയിൽ പങ്കുവഹിച്ച വിവിധ വ്യക്തികളെയും സണ്ഡേസ്കൂൾ അധ്യാപകരേയും ചടങ്ങിൽ ആദരിക്കും. തുടർന്നു കലാപരിപാടികളും ബൈബിൾ നാടകം ‘വാഗ്ദത്തഭൂമി’യും, ഒടുവില് സ്നേഹവിരുന്നും ഉണ്ടായിരിക്കും.