വഴിയില്‍ വച്ചുളള തര്‍ക്കം (9:34) കാരണം ശിഷ്യര്‍ക്ക് നഷ്ടപ്പെട്ടത് എന്താണ്? യേശുവിന്റെ പഠനത്തിന്റെ ഹൃദയം തന്നെ (9:31) – യേശുവിന്റെ തിരുവചനം തന്നെ. ആരാണ് വലിയവന്‍ എന്നതാണ് ശിഷ്യരുടെ തര്‍ക്കം (9:34). എല്ലാ തര്‍ക്കങ്ങളുടെയും ഹൃദയം ഇതാണ് – ഞാനാണ് വലിയവന്‍ എന്ന ചിന്ത; ഞാനാണ് ശരിയെന്ന വാദം. മാത്രവുമല്ല, മറ്റുളളവരെല്ലാം തെറ്റാണെന്ന ബോധ്യവും.
നിന്റെ ബന്ധങ്ങളില്‍ തര്‍ക്കങ്ങള്‍ ഉയരുമ്പോള്‍ നിനക്ക് നഷ്ടമാകുന്നത് ദൈവസ്വരം തന്നെയാണ്. നിന്റെ ബന്ധങ്ങളില്‍ അഹങ്കാരത്തിന്റെ ആധിപത്യത്തിനു പകരം ശുശ്രൂഷയുടെ എളിമ നിറയുമ്പോഴാണ് നിനക്ക് ദൈവസ്വരം തിരിച്ചറിയാനാവുന്നത്. നിന്റെ സ്‌നേഹബന്ധങ്ങളിലും നിന്റെ വീട്ടിലും വഴക്കുണ്ടാകുന്നതിന്റെ മൂലകാരണമിതാണ്. ഞാനാണ് വലിയവനെന്ന ചിന്ത. എങ്കില്‍ സമാധാനവും സ്‌നേഹവും ഉണ്ടാകാനുളള മാര്‍ഗ്ഗമെന്താണ്? അല്‍പം താഴാനും ശുശ്രൂഷിക്കാനുമുളള മനസ്സ് (9:35).
