സീറോ മലബാർ നസ്രാണി സഭയുടെ അഖിലേന്ത്യാ അജപാലനം പുനഃസ്ഥാപിക്കുന്നതിനായി പ്രയത്നിച്ച മാർ ജോൺ ബോസ്കോ തോട്ടക്കര, സുറിയാനി പണ്ഡിതനായ മാർ തെള്ളിയിൽ മാണി മൽപാൻ എന്നിവരുടെ അനുസ്മരണാഘോഷം പൂഞ്ഞാറിൽ നടന്നു.
ചെറുപുഷ്പാശ്രമ ദേവാലയത്തിൽ ഫാ. ഔസേപ്പ് ചെരുവിലിന്റെ മുഖ്യകാർമ്മികത്വത്തിൽ സുറിയാനി ഭാഷയിൽ വിശുദ്ധ കുർബാന അർപ്പിച്ചു. ആശ്രമ സെമിത്തേരിയിലെ പുണ്യപിതാക്കന്മാരുടെ കബറിടത്തിൽ പ്രാർത്ഥനാശുശ്രൂഷകൾ നടന്നു.
ഫാ. ടോമി കാരാംവേലിൽ സി.എം.ഐ. സന്ദേശവും, ആശ്രമ പ്രിയോർ ഫാ. ജെയിംസ് നീണ്ടൂശ്ശേരി സി.എം.ഐ. നന്ദിയും പറഞ്ഞു. അനുസ്മരണാഘോഷത്തിൽ പങ്കുചേർന്ന് പ്രാർത്ഥിക്കുവാനായി നിരവധി വിശ്വാസികൾ പൂഞ്ഞാറിൽ എത്തിയിരുന്നു.
