പുതുവർഷം, ഒരു കുടുംബമെന്ന നിലയിൽ എടുക്കേണ്ട ചില നല്ല തീരുമാനങ്ങൾ

ഒരു പുതുവർഷത്തിലേയ്ക്ക് പുത്തൻ തീരുമാനങ്ങളോടെ പ്രവേശിക്കാനുള്ള ഒരുക്കത്തിലാണ് നാം ഓരോരുത്തരും. നമ്മുടെ വ്യക്തിപരവും കുടുംബപരവും ആത്മീയവുമായ ജീവിതത്തെ കൂടുതൽ മെച്ചപ്പെടുത്തുവാൻ അനുയോജ്യമായ സമയമാണ് ഒരു പുതിയ വർഷം. നമ്മളിൽ പലരും വ്യക്തിപരമായി പുതുവത്സര തീരുമാനങ്ങൾ എടുക്കുന്നു. പക്ഷേ, ഒരു കുടുംബമെന്ന നിലയിൽ ചില നല്ല തീരുമാനങ്ങൾ എടുക്കേണ്ടതും വളരെ ആവശ്യമാണ്. അതിന് സഹായിക്കുന്ന ചില നിർദ്ദേശങ്ങൾ ഇതാ.

1. ചില കാര്യങ്ങൾ പുനർക്രമീകരിക്കുക

നമ്മുടെ വീടുകളിലെ ചില സ്ഥലങ്ങൾ, വസ്തുക്കൾ ഇവ ഒന്ന് പുനർക്രമീകരിക്കേണ്ട സമയമാണ് ഈ പുതുവർഷം. കാരണം, ഉപയോഗിക്കാത്ത വസ്തുക്കൾ, വസ്ത്രങ്ങൾ എന്നിവ വെടിപ്പോടെയും ഭംഗിയോടെയും ക്രമീകരിക്കുക. മാത്രമല്ല, ഉപയോഗിക്കാതെ അമിതമായി സൂക്ഷിച്ചുവച്ചിരിക്കുന്നവ ആവശ്യക്കാരിൽ എത്തിക്കാൻ പരിശ്രമിക്കുന്നത് നല്ലതാണ്.

വൃത്തിയാക്കുന്നത് ദൈനംദിന ജീവിതത്തെ ലളിതമാക്കുന്നു, പിരിമുറുക്കം കുറയ്ക്കുന്നു, സ്ഥലം ലാഭിക്കുന്നു, ഒപ്പം ആനന്ദത്തിന് ഇടം നൽകുകയും ചെയ്യുന്നു. വേണ്ടാത്തവ വലിച്ചെറിയുന്നതിനേക്കാൾ ഉപകാരപ്രദമായവരിൽ എത്തിക്കുന്നത് കുടുംബത്തിൽ നല്ല ശീലം വളരുന്നതിനും കാരണമാകും. ‘എനിക്ക് ഇത് ശരിക്കും ആവശ്യമുണ്ടോ?’ എന്ന് സ്വയം ചോദിക്കാൻ ശ്രമിക്കുക.

2. എല്ലാ ദിവസവും കുറച്ചു സമയം കുടുംബത്തോടൊപ്പം ചിലവഴിക്കാൻ മാറ്റിവയ്ക്കുക  

കുടുംബജീവിതത്തിന് അത്യന്താപേക്ഷിതമായ ഘടകമാണ് കുടുംബാംഗങ്ങൾ തമ്മിലുള്ള പരസ്പരമുള്ള ബന്ധം. ദമ്പതികൾ ഒറ്റയ്ക്ക് സമയം കണ്ടെത്തുന്നതുപോലെ തന്നെ കുടുംബത്തിലെ മറ്റ് അംഗങ്ങളോടോപ്പവും സമയം ചെലവഴിക്കണം. അങ്ങനെ കുടുബത്തിലെ സന്തോഷങ്ങളും വിഷമങ്ങളും പങ്കുവയ്ക്കുക. ജോലിസ്ഥലത്തെ കാര്യങ്ങൾ, പണം സംബന്ധമായ കാര്യങ്ങൾ, ആത്മീയകാര്യങ്ങൾ ഇവയെക്കുറിച്ചുള്ള ഒരു വിശകലനം ഒരു കുടുബത്തിൽ ആവശ്യമാണ്. ഒന്നിച്ചുകൂടിയിരുന്ന് ബൈബിൾ ഭാഗം ധ്യാനിക്കുന്നതും ഒരു നല്ല കുടുബം ഉണ്ടാകുവാൻ അത്യന്താപേക്ഷിതമാണ്.

3. ഓരോ കുട്ടിയോടൊപ്പവും വ്യക്തിപരമായി സമയം ചിലവഴിക്കുക

വീട്ടിൽ കുടുംബത്തോടൊപ്പം സമയം കണ്ടെത്തുന്നതുപോലെ തന്നെ പ്രധാനപ്പെട്ടതാണ് ഓരോ കുട്ടിയോടൊപ്പവും വ്യക്തിപരമായി കുറച്ചു സമയം ചിലവഴിക്കുക എന്നത്. അവരുടെ ചെറിയ പരിഭവങ്ങളും ആവശ്യങ്ങളും അറിയുവാനും അവരെ കൂടുതൽ മനസിലാക്കുവാനും ഇത് നല്ലതാണ്.

4. പരിസ്ഥിതിയെക്കുറിച്ച് കൂടുതൽ അവബോധം വളർത്തുക

ഇന്ന് വളരെ അത്യാവശ്യം വേണ്ട ഒരു വസ്തുതയാണ് പരിസ്ഥിതിസ്നേഹവും പരിസ്ഥിതിയെക്കുറിച്ചുള്ള അവബോധവും. അവ നമ്മുടെ വ്യക്തിജീവിതത്തിലും കുടുംബജീവിതത്തിലും വളർത്തേണ്ടത് അത്യന്താപേക്ഷിതമാണ്. അതിനായി ചില നല്ല ശീലങ്ങൾ പരിശീലിക്കുക. അത്യാവശ്യമില്ലാത്ത ലൈറ്റുകൾ ഉപയോഗശേഷം അണയ്ക്കുക, കുറച്ച് ജലം ഉപയോഗിക്കുക, കഴിയുന്നത്ര മലിനീകരണമില്ലാത്ത ഉൽപന്നങ്ങൾ വാങ്ങുക, മാലിന്യങ്ങൾ വലിച്ചെറിയാതിരിക്കുക, ഉപയോഗശൂന്യമായ ബാറ്ററികളും ലൈറ്റ് ബൾബുകളും അവയുടെ നിർദ്ദിഷ്ടസ്ഥലങ്ങളിൽ സ്ഥാപിക്കുക, ഒരു പൂന്തോട്ടം ഉണ്ടാക്കുക. ഇവയൊക്കെ ശീലിക്കുവാൻ പരിശ്രമിക്കുക.

5. ഒരു കുടുംബ കലണ്ടർ രൂപപ്പെടുത്തുക

കുടുംബത്തിലെ ആത്മീയവളർച്ചയ്ക്ക് ഉതകുന്ന ഒരു കുടുംബ കലണ്ടർ ഉണ്ടാക്കുകയും അതിൽ ആത്മീയജീവിതത്തെ സമ്പന്നമാക്കാനുള്ള നിർദേശങ്ങൾ ഉണ്ടായിരിക്കേണ്ടതും അത്യാവശ്യമാണ്. വിശുദ്ധ കുർബാന, സന്ധ്യാപ്രാർത്ഥന, കൂദാശകൾ എന്നിവയിലുള്ള ഭാഗഭാഗിത്വം കൂടുതൽ സജീവമാക്കുവാൻ ഇത്തരം കലണ്ടറിലൂടെ സാധ്യമാകും.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.