സമൂഹത്തിന്‍റെ സാംസ്കാരിക നിലവാരം ഉയർത്താൻ പുസ്തകമേളകൾക്കു ഉള്ള പങ്കു വലുതാണെന്നു മാർ ജോസഫ് പൗവ്വത്തിൽ. കുരിശുംമൂട് മീഡിയാ വില്ലേജ് ഗ്രൗണ്ടിൽ റേഡിയോ മീഡിയാ വില്ലേജ് സംഘടിപ്പിച്ച സാഹിത്യ സംഗമവും പുസ്തക മേളയും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
“പുസ്തകങ്ങൾ നേരിട്ടു കാണാൻ അവസരമൊരുക്കുന്നത് വായനയെ പ്രോത്സാഹിപ്പിക്കുന്നു. മനുഷ്യ പുരോഗതിക്ക് അറിവിന്‍റെ വാതായനം തുറന്നു കൊടുക്കുക ആവശ്യമാണ്. സമൂഹത്തിൽ സാഹിത്യകാരന്മാരെ പ്രോത്സാഹിപ്പിക്കേണ്ടതു ഇന്നത്തെ കാലഘട്ടത്തിന്‍റെ ആവശ്യമാണ്” എന്ന് മാർ ജോസഫ് പൗവ്വത്തിൽ കൂട്ടിച്ചേർത്തു. മുനിസിപ്പൽ ചെയർമാൻ സെബാസ്റ്റ്യൻ മാത്യു മണമേൽ അധ്യക്ഷത വഹിച്ചു. മീഡിയാ വില്ലേജ് ഡയറക്ടർ ഫാ. ആന്‍റണി എത്തയ്ക്കാട്, റേഡിയോ സ്റ്റേഷൻ ഡയറക്ടർ ഫാ. സെബാസ്റ്റ്യൻ പുന്നശേരി, ഫാ. ജോബിൻ പെരുന്പള്ളത്തുശേരി, ഓൾ കേരള ഫോട്ടോഗ്രഫേഴ്സ് അസോസിയേഷൻ സംസ്ഥാന കമ്മിറ്റി അംഗം സാം തോമസ് തുടങ്ങിയവർ സമ്മേളനത്തിൽ ആശംസകൾ അർപ്പിച്ചു.
പുസ്തകമേളയോട് അനുബന്ധിച്ചു നടന്ന ചിത്രരചനയിൽ നാനൂറോളം കുട്ടികൾ പങ്കെടുത്തു. ഇന്ന് മൂന്നിന് സാഹിത്യ ക്വിസ് മത്സരം നടക്കും. മേള 30ന് സമാപിക്കും.
