1791 ഒക്ടോബര് 19 ന് ഇറ്റലിയിലെ നേപ്പിള്‍സിനു വടക്കുള്ള സെക്കോണ്ടിഗ്ലിയാനോയിലാണ് ഗേത്താനോ ജനിച്ചത്. അദ്ദേഹത്തിന് ഉത്തമമായ ക്രൈസ്തവ ജീവിതപരിശീലനമാണ് മാതാപിതാക്കള്‍ നല്‍കിയത്. പൗരോഹിത്യത്തോടും സന്യാസത്തോടുമുള്ള ആഗ്രഹം 14-ാമത്തെ വയസ്സില്‍ ഗേത്താനോയ്ക്ക് അനുഭവപ്പെട്ടു. ഗേത്താനോയ്ക്ക് ദിവ്യരക്ഷകസഭയും കപ്പൂച്ചിന്‍ സഭയും ഇഷ്ടമായിരുന്നു. പക്ഷേ, രണ്ടു സഭകളും പ്രായക്കുറവ് പരിഗണിച്ച് അദ്ദേഹത്തെ സ്വീകരിച്ചില്ല.
16-ാമത്തെ വയസ്സില്‍ നേപ്പിള്‍സിലെ അതിരൂപതാ സെമിനാരിയില്‍ സ്വീകൃതനാവുകയും 1808 ല്‍ പഠനം ആരംഭിക്കുകയും ചെയ്തു. കുടുംബത്തിന്റെ ധനസ്ഥിതി മോശമായിരുന്നതിനാല്‍ സെമിനാരിയിലെ ബോര്‍ഡിംഗില്‍ താമസിക്കാന്‍ കഴിഞ്ഞില്ല. അതിനാല്‍ അനുദിനം എട്ടു കിലോമീറ്റര്‍ നടന്നാണ് ഗേത്താനോ സെമിനാരിയിലേക്കു പോയിരുന്നത്.
1815 സെപ്തംബര്‍ 23 ന് നേപ്പിള്‍സിലെ വി. റെസ്റ്റീത്തൂത്തായുടെ കപ്പേളയില്‍വച്ച് കര്‍ദിനാള്‍ റഫോസില്ലാ അദ്ദേഹത്തെ പുരോഹിതനായി അഭിഷേകം ചെയ്തു; താമസിയാതെ അധ്യാപകനായും നിയമിക്കപ്പെട്ടു.
1818 ല്‍ ഗേത്താനോയുടെ ജീവിതത്തെ ആകമാനം മാറ്റിമറിച്ച ഒരു സംഭവമുണ്ടായി. ഒരു പുതിയ സന്യാസ സഭയ്ക്ക് രൂപംകൊടുക്കാന്‍ നിര്‍ദേശിച്ചുകൊണ്ട് വി. അല്‍ഫോന്‍സ് ലിഗോരി അദ്ദേഹത്തിനു പ്രത്യക്ഷപ്പെട്ടു. വ്യാകുലമാതാവിന്റെ മഹിമയ്ക്കായി സെക്കേമണ്ടിഗ്ലിയാനോയില്‍ ഒരു പള്ളി പണിയണമെന്ന് അദ്ദേഹത്തിന് നിര്‍ദേശം കിട്ടി. തങ്ങളുടെ ചെറിയ ഗ്രാമത്തില്‍ വ്യാകുലമാതാവിന്റെ മഹിമയ്ക്കായി ഒരു പള്ളിയുണ്ടാകാന്‍ ദൈവം ആഗ്രഹിക്കുന്ന വാര്‍ത്തയറിഞ്ഞ സെക്കേമണ്ടിഗ്ലിയാനോയിലെ ജനങ്ങള്‍ അത്യധികം സന്തോഷിച്ചു. എങ്കിലും ഒരുകൂട്ടം ആളുകള്‍ എതിര്‍ത്തുനിന്നു. എന്നാല്‍, എതിര്‍പ്പുകളെ വിഗണിച്ചുകൊണ്ട് ലക്ഷ്യപ്രാപ്തിക്കായി ഗേത്താനോ യത്നിച്ചു. 1830 ഡിസംബര്‍ ഒൻപതിനു പൂര്‍ത്തിയായ ദൈവാലയം ആശീര്‍വദിക്കപ്പെട്ടു.
1836 മാര്‍ച്ച് 14 ന് പുതിയ സന്യാസ സഭയും നിയമാവലിയും അംഗീകൃതമായി. ഒക്ടോബറില്‍ എട്ട് അർഥികളുമായി നവസന്യാസം ആരംഭിച്ചു. 1846 ആഗസ്റ്റ് ഏഴിന് പുതിയ സന്യാസ സഭയും നിയമാവലിയും അംഗീകരിച്ച് അപ്പസ്തോലിക ഉത്തരവ് പുറപ്പെടുവിച്ചു. പ്രഥമ സുപ്പീരിയര്‍ ജനറലായി ഗേത്താനോ തെരഞ്ഞെടുക്കപ്പെട്ടു.
പ്രസംഗിക്കാനോ, കുമ്പസാരിപ്പിക്കാനോ, ഈശോയുടെ തിരുശരീര-രക്തങ്ങള്‍ പരികര്‍മ്മം ചെയ്യാനോവേണ്ടി എത്രമാത്രം യാത്രചെയ്യാനും അദ്ദേഹം സന്നദ്ധനായിരുന്നു. പിതാവായ ദൈവത്തിന്റെ സ്നേഹത്തെ അനുസ്മരിക്കുന്നതായിരുന്നു അദ്ദേഹത്തിന്റെ സാന്ത്വനവും സാന്നിധ്യവും. തന്നിമിത്തം ഒരു വിശുദ്ധന്‍ എന്ന് ജനങ്ങള്‍ അദ്ദേഹത്തെക്കുറിച്ചു പറഞ്ഞിരുന്നു.
69-ാമത്തെ വയസ്സില്‍ 1860 ഒക്ടോബര് 29 ന് അദ്ദേഹം സ്വര്‍ഗത്തിലേക്കു യാത്രയായി. 2002 ഏപ്രില്‍ 14-ാം തീയതി ജോണ്‍ പോള്‍ രണ്ടാമന്‍ പാപ്പ ഗേത്താനോയെ വിശുദ്ധരുടെ പട്ടികയില്‍ ചേര്‍ത്തു.
വിചിന്തനം: നീ ദൈവവചനം ശ്രവിക്കുക, എങ്കില്‍ മനുഷ്യരുടെ പതിനായിരം വാക്കുകള്‍ നിന്നെ തെല്ലും കുലുക്കുകയില്ല.
ഇതരവിശുദ്ധര്‍: നാര്‍സിസ്സസ് (106-222)/ ആന്‍ (+820)/ ബോണ്ട് (ഏഴാം നൂറ്റാണ്ട്)/ കോള്‍മന്‍ (+632) അയര്‍ലണ്ട്/ ടെറെന്‍സ് (+520) മെറ്റ്സിലെ മെത്രാന്‍/ഡൊണാത്തൂസ്/ ഗുബിയോയിലെ വാഴ്ത്തപ്പെട്ട പീറ്റര്‍/ യൂസേിയാ (മൂന്നാം നൂറ്റാണ്ട്)/ സെനോസിയൂസ് (+310)/ തിയഡോര്‍ (+575)/ എമെര്‍ലിഡാ (+595) ബല്‍ജിയന്‍ സന്യാസി
ഫാ. ജെ. കൊച്ചുവീട്ടില്‍
