വെസ്റ്റ് ബാങ്കിലെ പലസ്തീൻ ജനവിഭാഗങ്ങൾക്കെതിരെ വർധിച്ചുവരുന്ന നിർബന്ധിത കുടിയൊഴിപ്പിക്കലുകളിലും കുടിയേറ്റക്കാരുടെ (Israeli Settlers) ആക്രമണങ്ങളിലും കടുത്ത ആശങ്ക രേഖപ്പെടുത്തി ഐക്യരാഷ്ട്രസഭയും അന്താരാഷ്ട്ര സഭാസംഘടനകളും. പുറത്തുവരുന്ന റിപ്പോർട്ടുകൾ അനുസരിച്ച്, സംഘർഷമേഖലകളിൽ വൻതോതിൽ വർധിച്ചുവരുന്ന അനധികൃത കുടിയേറ്റ അതിക്രമങ്ങളും തടസ്സങ്ങളും പലസ്തീൻ കുടുംബങ്ങളുടെ ജീവനും നിലനിൽപ്പിനും വലിയ ഭീഷണിയാകുകയാണ്.
2026 ൽ മാത്രം കുടിയേറ്റക്കാരുടെ ആക്രമണങ്ങളും കെട്ടിടങ്ങൾ പൊളിച്ചുമാറ്റലും കാരണം ആറായിരത്തിലധികം പലസ്തീനികളാണ് വെസ്റ്റ് ബാങ്കിൽ സ്വന്തം ഭവനങ്ങളിൽ നിന്നും കുടിയൊഴിപ്പിക്കപ്പെട്ടതെന്ന് ഐക്യരാഷ്ട്രസഭയുടെ ‘ഓച്ച’ (OCHA) റിപ്പോർട്ടുകൾ വ്യക്തമാക്കുന്നു. ക്രിസ്ത്യൻ ഭൂരിപക്ഷ ഗ്രാമമായ അൽ-തൈബ (Al-Taybeh) ഉൾപ്പെടെയുള്ള പ്രദേശങ്ങളിൽ ഭീഷണിയും ആക്രമണങ്ങളും പതിവാകുന്നതായി ഇടവക വികാരി ഫാ. ബഷാർ ഫവാദ്ലെ വ്യക്തമാക്കി. കൃഷിഭൂമിയിലേക്കുള്ള വഴി തടയുന്നതും ജനങ്ങളെ വിരട്ടി ഓടിക്കുന്നതും പതിവായിരിക്കുകയാണ്.
വെസ്റ്റ് ബാങ്കിലെ അഭയാർഥി ക്യാമ്പുകളിൽ നിന്നും ജനങ്ങളെ കൂട്ടത്തോടെ ഒഴിപ്പിക്കുന്ന നടപടികൾ അന്താരാഷ്ട്ര നിയമങ്ങളുടെ ലംഘനമാണെന്നും ഇത് വൻതോതിലുള്ള മാനുഷിക ദുരന്തത്തിലേക്കു നയിക്കുമെന്നും ഐക്യരാഷ്ട്രസഭയുടെ മനുഷ്യാവകാശ വിഭാഗം (OHCHR) മുന്നറിയിപ്പ് നൽകുന്നു. സമാധാനാന്തരീക്ഷം പുനഃസ്ഥാപിക്കാനും പലസ്തീനികളുടെ ഭൂമിയും അവകാശങ്ങളും സംരക്ഷിക്കാനും ഐക്യരാഷ്ട്രസഭയും ആഗോള ക്രിസ്ത്യൻ കൂട്ടായ്മകളും (ACT Alliance) അടിയന്തരമായി ഇടപെടണമെന്നും സഭാനേതൃത്വം ആവശ്യപ്പെട്ടു.
