തുടർച്ചയായ മൂന്നാം വർഷവും ലോകത്ത് പട്ടിണി നേരിടുന്നവരുടെ എണ്ണത്തിൽ കുറവുണ്ടായതായി ഐക്യരാഷ്ട്രസഭയുടെ പുതിയ റിപ്പോർട്ട് വെളിപ്പെടുത്തുന്നു. ഏഷ്യയും ലാറ്റിൻ അമേരിക്കയും കൈവരിച്ച വലിയ പുരോഗതിയും ആഫ്രിക്കൻ രാജ്യങ്ങളിലുണ്ടായ നേരിയ മാറ്റങ്ങളുമാണ് ഇതിന് കാരണമെന്ന് റിപ്പോർട്ട് ചൂണ്ടിക്കാണിക്കുന്നു. എങ്കിലും കാലാവസ്ഥാ വ്യതിയാനങ്ങൾ, വർധിച്ചുവരുന്ന ഭൗമരാഷ്ട്രീയ സംഘർഷങ്ങൾ, വ്യാപാര തടസ്സങ്ങൾ എന്നിവ ഈ പുരോഗതിക്ക് വൻ ഭീഷണിയാണെന്നും യുഎൻ മുന്നറിയിപ്പ് നൽകുന്നു.
യുഎന്നിന്റെ പ്രിൻസിപ്പൽ ഏജൻസികൾ സംയുക്തമായി പുറത്തുവിട്ട ‘സ്റ്റേറ്റ് ഓഫ് ഫുഡ് സെക്യൂരിറ്റി ആൻഡ് ന്യൂട്രീഷൻ ഇൻ ദി വേൾഡ്’ (SOFI) റിപ്പോർട്ടിലാണ് ഈ വിവരങ്ങളുള്ളത്. ലോക ജനസംഖ്യയുടെ 7.8% ആളുകളാണ് പട്ടിണിയിലുള്ളത്. ഇത് മുൻവർഷങ്ങളിലെ 8.1% (2024), 8.6% (2022) എന്നീ കണക്കുകളിൽ നിന്നുള്ള കുറവാണിത്.
ഏഷ്യയിലാണ് പട്ടിണി കുറയ്ക്കുന്നതിൽ ഏറ്റവും വലിയ പുരോഗതി രേഖപ്പെടുത്തിയത്. ഇന്ത്യയിലെ മികച്ച ക്ഷേമ പദ്ധതികളും കാർഷിക ഉത്പാദനക്ഷമത വർദ്ധിച്ചതും ഏഷ്യയ്ക്ക് വൻ കരുത്തായി. ഇന്ത്യയിൽ പട്ടിണി നിരക്ക് 10 ശതമാനത്തിൽ താഴെയായി കുറഞ്ഞു. ആഫ്രിക്കൻ രാജ്യങ്ങളിൽ നേരിയ പുരോഗതി പ്രകടമാണെങ്കിലും, ലോകത്ത് ഏറ്റവും കൂടുതൽ പട്ടിണി അനുഭവിക്കുന്ന ആളുകൾ ഇപ്പോഴും ഇവിടെയാണ്. വരും വർഷങ്ങളിൽ ആഗോളതലത്തിൽ പട്ടിണി നിരക്ക് ഇനിയും താഴുമെന്നാണ് പ്രതീക്ഷിക്കുന്നതെങ്കിലും, വിപണിയിലെയും കാലാവസ്ഥയിലെയും അനിശ്ചിതത്വങ്ങൾ വെല്ലുവിളിയായി തുടരുമെന്ന് ഐക്യരാഷ്ട്രസഭ വ്യക്തമാക്കുന്നു.
