സ്പെയിനിലെ സെൻട്രൽ ടോളിഡോയിൽ അതിവേഗ ട്രെയിനുകൾ കൂട്ടിയിടിച്ചുണ്ടായ അപകടത്തിൽ ലെയോ പതിനാലാമൻ മാർപാപ്പ അനുശോചനവും പ്രാർഥനയും അറിയിച്ചു. ഉർദ നഗരത്തിൽ രണ്ട് അതിവേഗ ട്രെയിനുകൾ കൂട്ടിയിടിച്ചാണ് ദുരന്തമുണ്ടായത്. അപകടത്തിൽ 68 പേർ മരണപ്പെടുകയും 53 -ഓളം പേർക്ക് പരിക്കേൽക്കുകയും ചെയ്തു. ഇതിൽ 15 പേരുടെ നില ഗുരുതരമായി തുടരുകയാണ്.
ടോളിഡോ ആർച്ച്ബിഷപ്പ് ഫ്രാൻസിസ്കോ സെറോ ഷാവേസിന് അയച്ച ടെലഗ്രാമിലൂടെയാണ് മാർപാപ്പ അനുശോചന സന്ദേശം അറിയിച്ചത്. രക്ഷാപ്രവർത്തനം തുടരുന്ന ദുരന്തനിവാരണ സേനാംഗങ്ങൾക്ക് മാർപാപ്പ പിന്തുണയും പ്രാർഥനയും വാഗ്ദാനം ചെയ്തു. അപകടത്തെ തുടർന്ന് സ്പെയിൻ സർക്കാർ രാജ്യത്ത് മൂന്ന് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചിട്ടുണ്ട്.
