പത്തു വർഷങ്ങൾക്ക് മുൻപ് മെഡിറ്ററേനിയൻ കടലിന്റെ ആഴങ്ങളിൽ അമ്മയെ നഷ്ടപ്പെട്ട്, ലാംപെദൂസ എന്ന ഇറ്റാലിയൻ ദ്വീപിന്റെ തീരത്തേക്ക് തികച്ചും ഒറ്റയ്ക്കാണ് ലെയോ എന്ന ആ കുഞ്ഞ് ഒഴുകിയെത്തിയത്. അന്ന് കരഞ്ഞുതളർന്ന അവന് ആരോ പേപ്പർ ചുരുട്ടി ഒരു പന്ത് ഉണ്ടാക്കി നൽകി. അതോടെ അവന്റെ കണ്ണീർ തോർന്നു. ജൂലൈ നാലിന് തന്റെ പത്താം വയസ്സിൽ അവൻ തന്റെ അതേ പേരുള്ള ലോകത്തിന്റെ വലിയ ഇടയനെ നേരിൽ കണ്ടു; കൈയിലൊരു ഫുട്ബോളും ഹൃദയം തൊടുന്നൊരു കത്തും നൽകി.
മെഡിറ്ററേനിയൻ കുടിയേറ്റ പ്രതിസന്ധിയുടെ പശ്ചാത്തലത്തിൽ, സിസിലിക്ക് തെക്കുള്ള ലാംപെദൂസ ദ്വീപിൽ ഒരു ദിവസത്തെ സന്ദർശനത്തിനായി എത്തിയതായിരുന്നു ലെയോ പതിനാലാമൻ മാർപാപ്പ. ദ്വീപിന്റെ തെക്കേ അറ്റത്തുള്ള ‘യൂറോപ്പിന്റെ കവാടം’ എന്ന സ്മാരകത്തിന് മുന്നിൽ നിൽക്കുമ്പോഴാണ് കുഞ്ഞ് ലെയോ, മാർപാപ്പയുടെ അടുത്തേക്ക് നടന്നുചെന്നത്. അവൻ നൽകിയ കത്തിൽ ഇങ്ങനെ എഴുതിയിരുന്നു:
“അന്ന് ആ പേപ്പർ പന്ത് കിട്ടിയ ദിവസം മുതൽ അത് എന്റെ ഹൃദയത്തിലുണ്ട്. ഞാൻ കളി നിർത്തിയിട്ടേയില്ല. ഇപ്പോൾ ഞാൻ അങ്ങേയ്ക്ക് തരുന്ന ഈ പന്ത് മറ്റേതെങ്കിലും ഒരു കുഞ്ഞിന്റെ കൈകളിൽ എത്തുമെന്നും എന്നെപ്പോലെ അവനെയും ഇത് സന്തോഷിപ്പിക്കുമെന്നും ഞാൻ പൂർണ്ണമായി വിശ്വസിക്കുന്നു.”
നിറഞ്ഞ കണ്ണുകളോടെയാണ് മാർപാപ്പ ആ സമ്മാനം സ്വീകരിച്ചത്. തുടർന്ന് അദ്ദേഹം കടലിന് അഭിമുഖമായി ഇരുന്ന് ഏറെനേരം ഏകാന്തമായി പ്രാർത്ഥിച്ചു.
എന്താണ് ‘യൂറോപ്പിന്റെ കവാടം’?
ഇറ്റാലിയൻ കലാകാരനായ മിമ്മോ പലാഡിനോ (Mimmo Paladino) 2008-ൽ രൂപകൽപന ചെയ്ത 16 അടി ഉയരമുള്ള സെറാമിക്-ഇരുമ്പ് കവാടമാണിത്. കടൽമാർഗം യൂറോപ്പിലേക്ക് കടക്കാൻ ശ്രമിക്കുന്നതിനിടെ ജീവൻ നഷ്ടപ്പെട്ട പതിനായിരക്കണക്കിന് അഭയാർഥികളുടെ സ്മാരകമായാണ് ഇത് നിർമ്മിച്ചിരിക്കുന്നത്. ഫ്രാൻസിസ് മാർപാപ്പ ഒരിക്കൽ ഈ കടലിനെ ‘യൂറോപ്പിലെ ഏറ്റവും വലിയ ശ്മശാനം’ എന്നാണ് വിശേഷിപ്പിച്ചത്.
ഈ കവാടത്തിന് വാതിലുകളോ, തടസ്സങ്ങളോ ഇല്ല. ഇതിന്റെ സെറാമിക് ഉപരിതലം സൂര്യന്റെയും ചന്ദ്രന്റെയും വെളിച്ചത്തെ പ്രതിഫലിപ്പിക്കുന്നതിനാൽ, ആഫ്രിക്കയിൽ നിന്ന് കടൽ കടന്നു വരുന്നവർക്ക് ഇതൊരു വഴികാട്ടിയായി ദൂരെയെങ്ങും ദൃശ്യമാകും.
ഈ സന്ദർശനത്തിൽ ലോകം ഓർക്കാൻ പോകുന്ന ഏറ്റവും മനോഹരമായ ചിത്രം ‘യൂറോപ്പിന്റെ കവാടത്തിൽ’ വെച്ച് ഒരു പത്തുവയസ്സുകാരൻ നൽകിയ ആ സമ്മാനമായിരിക്കും. എല്ലാം നഷ്ടപ്പെട്ട്, വെറുമൊരു പേപ്പർ പന്തിൽ നിന്ന് ജീവിതം തിരിച്ചുപിടിച്ച ഒരു കുട്ടി, തന്റെ പക്കലുള്ള ഏറ്റവും വിലപ്പെട്ട സമ്മാനം തന്റെ അതേ പേരുള്ള ലോകത്തിന്റെ വലിയ ഇടയന് കൈമാറിയിരിക്കുന്നു; തന്നേക്കാൾ ആവശ്യമുള്ള മറ്റാരെങ്കിലും ഇത് നൽകണമെന്ന ആഗ്രഹത്തോടെ!
