ഭർത്താവിന്റെ ക്രൂരമർദനങ്ങളിൽ നിന്നും ലഹരി ഉപയോഗത്തിൽ നിന്നും മോചനം തേടി കോടതിയെ സമീപിച്ച അഫ്ഗാൻ യുവതിക്ക് നേരിടേണ്ടിവന്നത് ഞെട്ടിക്കുന്ന അനുഭവങ്ങൾ. 13 വർഷത്തെ പീഡനത്തിനൊടുവിൽ വിവാഹമോചനം തേടിയെത്തിയ കമല (31) എന്ന യുവതിയോട് താലിബാൻ ജഡ്ജി ലൈംഗികച്ചുവയോടെ സംസാരിച്ചതായും കൈക്കൂലിയായി ശരീരം ആവശ്യപ്പെട്ടതായും റിപ്പോർട്ട്. റുഖ്ഷാന മീഡിയയാണ് ഈ വാർത്ത പുറത്തുവിട്ടത്.
തന്റെ ഭർത്താവ് കൈകാലുകൾ ഒടിയുന്ന തരത്തിൽ ക്രൂരമായി മർദിക്കാറുണ്ടെന്ന് കാട്ടിയാണ് കമല കോടതിയെ സമീപിച്ചത്. എന്നാൽ ഭർത്താവ് ഭാര്യയെ അടിക്കുന്നത് ഇസ്ലാമിൽ തെറ്റല്ലെന്നും സഹിച്ച് ജീവിക്കാൻ പഠിക്കണമെന്നുമാണ് കോടതിയിലെ മറ്റ് ഉദ്യോഗസ്ഥരും ജഡ്ജിയും പറഞ്ഞത്. ഒടുവിൽ വിവാഹമോചനം അനുവദിച്ചെങ്കിലും, ജഡ്ജിയുടെ ലൈംഗികച്ചുവയോടെയുള്ള സമീപനങ്ങൾക്ക് വഴങ്ങാത്തതിന്റെ പ്രതികാരമായി കമലയുടെ നാല് മക്കളെയും കസ്റ്റഡി പ്രതിയായ ഭർത്താവിന് നൽകുകയായിരുന്നു. മക്കളെ കാണാൻ പോലും അനുവദിക്കാതെയാണ് കോടതി ഉത്തരവിട്ടത്.
2021-ൽ താലിബാൻ അധികാരം പിടിച്ചെടുത്തതിന് പിന്നാലെ കുടുംബ കോടതികളും ഗാർഹിക പീഡനത്തിനിരയാകുന്ന സ്ത്രീകൾക്കായുള്ള ഷെൽട്ടറുകളും പൂട്ടിയിരുന്നു. ഇതിനുപുറമെ, അടുത്തിടെ പുറത്തിറക്കിയ പുതിയ ഉത്തരവുകൾ സ്ത്രീകൾക്ക് വിവാഹമോചനം നേടുന്നത് കൂടുതൽ ദുഷ്കരമാക്കിയിരിക്കുകയാണ്. താലിബാൻ ഭരണത്തിന് കീഴിൽ അഫ്ഗാൻ സ്ത്രീകൾ നേരിടുന്ന ദയനീയമായ അവസ്ഥയുടെ നേർക്കാഴ്ചയാണ് ഈ സംഭവം വ്യക്തമാക്കുന്നത്.
