മറ്റുള്ളവരെക്കുറിച്ച് അപവാദവും കുറ്റവും പറയുന്നത് പ്രശ്നങ്ങൾ പരിഹരിക്കുന്നതിന് പകരം സ്ഥിതിഗതികളെ കൂടുതൽ വഷളാക്കുകയും കാര്യങ്ങളെ നിശ്ചലമാക്കുകയുമാണ് ചെയ്യുകയെന്ന് ലെയോ പതിനാലാമൻ മാർപാപ്പ. വത്തിക്കാനിലെ അപ്പോസ്തോലിക കൊട്ടാരത്തിന്റെ ബാൽക്കണിയിൽ നിന്ന് ആഗസ്റ്റ് ആറിന് ആഞ്ചലൂസ് പ്രാർഥനയ്ക്ക് നേതൃത്വം നൽകി സംസാരിക്കുകയായിരുന്നു പാപ്പ.
സുവിശേഷ വചനങ്ങളെ ആസ്പദമാക്കി പരസ്പര സ്നേഹവും സഹോദര തുല്യമായ തിരുത്തലുകളും എങ്ങനെ പ്രായോഗികമാക്കാമെന്ന് വിശദീകരിക്കുകയായിരുന്നു മാർപാപ്പ. മറ്റുള്ളവരോട് പരാതി പറയുന്നതും കുറ്റം സംസാരിക്കുന്നതുമാണ് പലർക്കും എളുപ്പമുള്ള കാര്യം. എന്നാൽ അത് യാതൊരു പരിഹാരവും നൽകുന്നില്ലെന്ന് പാപ്പ ചൂണ്ടിക്കാട്ടി.
തിരുത്തൽ എന്നത് മറന്നുപോയതും എന്നാൽ വളരെ സൂക്ഷ്മതയോടെ ചെയ്യേണ്ടതുമായ ഒരു കലയാണെന്ന് മാർപാപ്പ അഭിപ്രായപ്പെട്ടു. നേരിട്ടും തുറന്ന മനസ്സോടെയും കാര്യങ്ങൾ പറയുകയും അതേസമയം ബന്ധങ്ങൾ തകരാതെ കാത്തുസൂക്ഷിക്കുകയുമാണ് ക്രൈസ്തവ രീതി. ക്രിസ്ത്യാനികൾ തമ്മിലുള്ള ബന്ധങ്ങളിൽ എപ്പോഴും പരസ്പര സ്നേഹം മാത്രമായിരിക്കണം ബാക്കിയുണ്ടാകേണ്ടത്. പ്രാർഥനയിലൂടെയും തുറന്ന സംഭാഷണങ്ങളിലൂടെയും പരസ്പരം ക്ഷമിക്കാനും കേൾക്കാനും സാധിക്കുമ്പോഴാണ് ക്രിസ്തീയ കൂട്ടായ്മ കൂടുതൽ ശക്തമാകുന്നതെന്നും അവിടുന്ന് കൂട്ടിച്ചേർത്തു.
