കോട്ടയം ജില്ലയിലെ വട്ടമൂട്ടിൽ നിന്നുള്ള വേറിട്ടൊരു പിറന്നാളാഘോഷത്തിന്റെ വാർത്തയാണ് ഇപ്പോൾ ആളുകളുടെ മനസ്സ് നിറയ്ക്കുന്നത്. കനത്ത മഴയിൽ നാടും വീടും വെള്ളത്തിനടിയിലായപ്പോഴും, പ്രതിസന്ധികൾക്ക് മുന്നിൽ പതറാതെ കുരുന്നിന്റെ രണ്ടാം പിറന്നാൾ വള്ളത്തിലിരുന്ന് കേക്ക് മുറിച്ച് ആഘോഷിച്ച് ഒരു കുടുംബം. സന്തോഷ്-ശ്രീന ദമ്പതികളുടെ മകനായ സാവിയോണിന്റെ രണ്ടാം ജന്മദിനമാണ് ഇങ്ങനെ തികച്ചും വ്യത്യസ്തമായി അവർ ആഘോഷിച്ചത്.
പ്രദേശത്തെ മഴക്കെടുതി റിപ്പോർട്ട് ചെയ്യാനായി രാവിലെയോടെ മാധ്യമപ്രവർത്തകർ സ്ഥലത്തെത്തിയപ്പോഴാണ് ഈ കാഴ്ച ശ്രദ്ധയിൽപെടുന്നത്. വെള്ളപ്പൊക്കത്തെ തുടർന്ന് നാടൊട്ടുക്കും രക്ഷാപ്രവർത്തനം പുരോഗമിക്കുമ്പോഴാണ് നിർത്തിയിട്ടിരുന്ന ഒരു ചെറിയ വള്ളത്തിൽ ബലൂണുകൾ കെട്ടി അലങ്കരിച്ചിരിക്കുന്നത് ഇവർ കണ്ടത്. തുടർന്ന് വീട്ടുകാരോട് അന്വേഷിച്ചപ്പോഴാണ് ഇത്തരമൊരു മനോഹരമായ പിറന്നാളാഘോഷം പുറംലോകമറിയുന്നത്.
കുഞ്ഞിന്റെ രണ്ടാം പിറന്നാൾ ഭംഗിയായി ആഘോഷിക്കണമെന്നത് മാതാപിതാക്കളുടെ വലിയ ആഗ്രഹമായിരുന്നു. എന്നാൽ കനത്ത മഴ പെയ്ത് വീടിനുള്ളിൽ മുഴുവൻ വെള്ളം കയറിയതോടെ ആഘോഷങ്ങളെല്ലാം മുടങ്ങുന്ന അവസ്ഥയിലായി. എങ്കിലും നിരാശരാകാതെ, വീട്ടിലുണ്ടായിരുന്ന ഒരു ചെറിയ വള്ളം ബലൂണുകൾ കൊണ്ട് അലങ്കരിച്ച് അതിനുള്ളിലിരുന്ന് കേക്ക് മുറിച്ച് സാവിയോണിന്റെ പിറന്നാൾ അവർ സന്തോഷകരമാക്കി മാറ്റുകയായിരുന്നു.
വെള്ളപ്പൊക്ക ദുരിതത്തിനിടയിലും കുടുംബം കാണിച്ച ഈ ആത്മവിശ്വാസവും സന്തോഷവും ഇപ്പോൾ സമൂഹമാധ്യമങ്ങളിൽ ശ്രദ്ധേയമാവുകയാണ്. കുഞ്ഞു സാവിയോണിന് ജന്മദിനാശംസകൾ നേർന്നും, പ്രതിസന്ധിയിലും തളരാത്ത ആ കുടുംബത്തെ അഭിനന്ദിച്ചും നിരവധിയാളുകളാണ് പോസ്റ്റുകൾ പങ്കുവെക്കുന്നത്.
എത്ര വലിയ ദുരന്തങ്ങളും പ്രതിസന്ധികളും ജീവിതത്തിലേക്ക് കടന്നുവന്നാലും അതിനെയെല്ലാം പുഞ്ചിരിയോടെ നേരിടാനും, കൊച്ചുകൊച്ചു സന്തോഷങ്ങൾ കണ്ടെത്താനും നമ്മെ പ്രേരിപ്പിക്കുന്നതാണ് ഈ പിറന്നാളാഘോഷം. പ്രകൃതി ദുരന്തങ്ങൾക്ക് മുന്നിൽ തോറ്റു കൊടുക്കാതെ പ്രതീക്ഷയോടെ ജീവിക്കാൻ ഇവർ പ്രചോദനമേകുകയാണ്.
കടപ്പാട് മാതൃഭൂമി ന്യൂസ്
