ഒരു ചെറിയ റബ്ബർ താറാവ് വിചാരിച്ചാൽ ഒരു വലിയ സമൂഹത്തെ സഹായിക്കാൻ കഴിയുമോ? കഴിയും എന്നാണ് അമേരിക്കയിലെ ഇൻഡ്യാനയിലുള്ള വബാഷ് വാലി തെളിയിക്കുന്നത്. എല്ലാ വർഷവും ജൂലൈ നാലാം തീയതി ഇൻഡ്യാനയിലെ ‘കാത്തലിക് ചാരിറ്റീസ് ഓഫ് ടെറെ ഹോട്ട്’ എന്ന സംഘടനയുടെ നേതൃത്വത്തിൽ നടക്കുന്ന ഒരു അപൂർവ മത്സരമാണ് ‘വബാഷ് വാലി റബ്ബർ ഡക്ക് റെഗാട്ട’. ആയിരക്കണക്കിന് റബ്ബർ താറാവുകളെ ഒരു വലിയ വാട്ടർ സ്ലൈഡിലൂടെ ഒഴുക്കിവിട്ടാണ് ഈ മത്സരം നടത്തുന്നത്.
പ്രാദേശിക സമൂഹവുമായി കൂടുതൽ അടുക്കാനും ജീവകാരുണ്യ പ്രവർത്തനങ്ങൾക്കായി പണം കണ്ടെത്താനും 2018 – ലാണ് ഈ വേറിട്ട കാമ്പയിൻ ആരംഭിച്ചത്. തുടക്കത്തിൽ വബാഷ് നദിയിലായിരുന്നു മത്സരമെങ്കിലും സുരക്ഷാ കാരണങ്ങളാൽ ഇപ്പോൾ ഇത് മനുഷ്യനിർമ്മിതമായ ഒരു വലിയ വാട്ടർ സ്ലൈഡിലാണ് നടത്തപ്പെടുന്നത്. എങ്കിലും ജനങ്ങളുടെ ആവേശത്തിന് ഒട്ടും കുറവ് വന്നിട്ടില്ല.
എങ്ങനെയാണ് ഇതിന്റെ പ്രവർത്തനം?
മേയ് മാസം മുതൽ ജനങ്ങൾക്ക് ഈ മത്സരത്തിൽ പങ്കെടുക്കാനുള്ള റബ്ബർ താറാവുകളെ ‘ദത്തെടുക്കാൻ’ സാധിക്കും. അഞ്ച് ഡോളർ മാത്രമാണ് ഒരു താറാവിന്റെ വില. മത്സരത്തിനൊടുവിൽ ഒന്നാമതെത്തുന്ന ഭാഗ്യശാലിയായ താറാവിന്റെ ഉടമയ്ക്ക് 10,000 ഡോളർ (ഏകദേശം 8 ലക്ഷത്തിലധികം ഇന്ത്യൻ രൂപ) സമ്മാനമായി ലഭിക്കും.
ഈ പണം ആരുടെ കൈയിൽ
ഈ മത്സരത്തിലൂടെ ഓരോ വർഷവും ഏകദേശം 45,000 ഡോളറോളം സമാഹരിക്കാൻ സംഘടനയ്ക്ക് സാധിക്കുന്നുണ്ട്. ഈ തുക മുഴുവനായും കാത്തലിക് ചാരിറ്റീസ് നടത്തുന്ന നാല് പ്രധാന ജീവകാരുണ്യ പ്രവർത്തനങ്ങൾക്കായിട്ടാണ് ഉപയോഗിക്കുന്നത്.
ഭക്ഷണ വിതരണം: തങ്ങളുടെ ഫുഡ് ബാങ്ക് വഴി വർഷത്തിൽ ഏകദേശം 38 ലക്ഷം പേർക്ക് കഴിക്കാനുള്ള ഭക്ഷണം ഇവർ എത്തിച്ചുനൽകുന്നു.
യൂത്ത് പ്രോഗ്രാമുകൾ: ‘റൈവ്സ് യൂത്ത് സെന്റർ’ വഴി കുട്ടികൾക്ക് ട്യൂഷൻ, കൗൺസിലിംഗ്, പ്രീ-സ്കൂൾ വിദ്യാഭ്യാസം, സൗജന്യ ഭക്ഷണം എന്നിവ നൽകുന്നു.
അഭയകേന്ദ്രം: ‘ബഥനി ഹൗസ്’ എന്ന അടിയന്തര അഭയകേന്ദ്രത്തിലൂടെ ഭവനരഹിതരായ സ്ത്രീകൾക്കും കുടുംബങ്ങൾക്കും താമസവും, അവരെ സ്വയംപര്യാപ്തരാക്കാനുള്ള സഹായവും നൽകുന്നു.
ക്രിസ്മസ് സ്റ്റോർ: സാമ്പത്തികമായി പിന്നോക്കം നിൽക്കുന്ന കുടുംബങ്ങൾക്ക് ക്രിസ്മസ് കാലത്ത് വസ്ത്രങ്ങളും കളിപ്പാട്ടങ്ങളും മറ്റ് നിത്യോപയോഗ സാധനങ്ങളും സൗജന്യമായി നൽകുന്ന ഒരു പദ്ധതിയാണിത്.
”നാം ചെയ്യുന്ന ചെറിയ കാര്യങ്ങൾ പോലും മറ്റൊരാളുടെ ജീവിതത്തിൽ വലിയ മാറ്റങ്ങൾ ഉണ്ടാക്കും എന്ന വിശ്വാസമാണ് ഞങ്ങളെ മുന്നോട്ട് നയിക്കുന്നത്” എന്ന് സംഘടനയുടെ അസിസ്റ്റന്റ് ഡയറക്ടറായ ജെന്നിഫർ ടേംസ് പറയുന്നു. വരും വർഷങ്ങളിൽ കൂടുതൽ താറാവുകളെ വിറ്റഴിച്ചുകൊണ്ട് കാരുണ്യ പ്രവർത്തനങ്ങളുടെ വ്യാപ്തി കൂട്ടാനാണ് ഈ സംഘടന ലക്ഷ്യമിടുന്നത്.
