രാജ്യത്ത് തുടർച്ചയായി വർധിച്ചുവരുന്ന ക്രമസമാധാന തകർച്ചയിലും അക്രമ സംഭവങ്ങളിലും കടുത്ത ആശങ്ക രേഖപ്പെടുത്തി മെക്സിക്കൻ കത്തോലിക്കാ സഭാ നേതൃത്വം. അക്രമ സംഭവങ്ങളെയും സംഘടിത കുറ്റകൃത്യങ്ങളെയും സ്വാഭാവിക കാര്യങ്ങളായി കണ്ട് ജനങ്ങൾ അവഗണിക്കരുതെന്നും, രാജ്യത്ത് ശാശ്വതമായ സമാധാനം കെട്ടിപ്പടുക്കാൻ ഭരണകൂടവും പൗരന്മാരും ഒരുമിച്ച് പ്രവർത്തിക്കണമെന്നും മെക്സിക്കോയിലെ മെത്രാൻ സമിതി ആഹ്വാനം ചെയ്തു.
മെക്സിക്കോയിൽ ഭീതി പരത്തുന്ന ലഹരിമരുന്ന് സംഘങ്ങളുടെ അക്രമങ്ങൾ, തട്ടിക്കൊണ്ടുപോകലുകൾ, അനധികൃത പണം തട്ടൽ, ജനങ്ങൾ കൂട്ടത്തോടെ വീടൊഴിഞ്ഞു പോകേണ്ടി വരുന്ന സാഹചര്യം എന്നിവയെല്ലാം വലിയ മനുഷ്യാവകാശ പ്രതിസന്ധിയാണ് സൃഷ്ടിക്കുന്നത്. ഒരു സമൂഹവും ഇത്തരം ഭയാനകമായ അന്തരീക്ഷവുമായി പൊരുത്തപ്പെടാൻ പാടില്ലെന്ന് സഭാ നേതൃത്വം ചൂണ്ടിക്കാട്ടി. ഭയമില്ലാതെ ജോലി ചെയ്യാനും വീടുകളിൽ നിന്ന് പുറത്തിറങ്ങാനും കുടുംബമായി ജീവിക്കാനുമുള്ള അന്തരീക്ഷമാണ് സാധാരണക്കാരായ ജനങ്ങൾക്ക് സമാധാനം എന്നതുകൊണ്ട് അർഥമാക്കുന്നത്.
കൊലപാതകങ്ങളും കാണാതായവരുടെ കേസും കൃത്യമായി അന്വേഷിച്ച് ഇരകൾക്ക് നീതി ലഭ്യമാക്കാൻ അധികാരികൾ തയ്യാറാകണമെന്നും സഹകരണവും ദൈവവിശ്വാസവും അടിസ്ഥാനമാക്കിയുള്ള ആത്മീയ-സാമൂഹിക മൂല്യങ്ങൾ സമൂഹത്തിൽ വളർത്തിയെടുക്കണമെന്നും സഭ ഓർമ്മിപ്പിച്ചു. രാജ്യത്തിന്റെ സുരക്ഷയ്ക്കായി പ്രാർഥനകൾ ഊർജ്ജിതമാക്കാനും പാവപ്പെട്ടവർക്കും അക്രമങ്ങൾക്ക് ഇരയായവർക്കും ആവശ്യമായ സഹായങ്ങൾ നൽകാനും സഭാ നേതൃത്വം ആഹ്വാനം ചെയ്തു.
