ദൈവഹിതമനുസരിച്ച് ജീവിക്കാൻ ആവശ്യമായ ശക്തിക്കായി പരിശുദ്ധ അമ്മയോട് പ്രാർത്ഥിക്കണമെന്ന് ഫ്രാൻസിസ് പാപ്പാ. ഏപ്രിൽ 18 -ന് സെന്റ് പീറ്റേഴ്സ് ചത്വരത്തിൽ നടന്ന യുവജനസമ്മേളനത്തിലാണ് പാപ്പാ ഇപ്രകാരം പറഞ്ഞത്.
“മാലാഖയുടെ സന്ദേശമനുസരിച്ച്, ഗർഭിണിയാകുമ്പോൾ പരിശുദ്ധ അമ്മ നന്നേ ചെറുപ്പമായിരുന്നു. അന്ന് പരിശുദ്ധ അമ്മ ദൈവഹിതത്തിനു കീഴ്വഴങ്ങിയതു പോലെ ദൈവഹിതം പ്രവർത്തിക്കാൻ ആവശ്യമായ കൃപയ്ക്കു വേണ്ടി നിങ്ങളും പരിശുദ്ധ അമ്മയോട് പ്രാർത്ഥിക്കുക” – പാപ്പാ പറഞ്ഞു. ആളുകൾ അവരുടെ ഭയം സമ്മതിക്കാൻ ഭയപ്പെടേണ്ടതില്ല. ഭയങ്ങൾ തുറന്നുപറയുകയും പ്രകടിപ്പിക്കുകയും വേണം. എങ്കിൽ മാത്രമേ അവയെ അതിജീവിക്കാൻ കഴിയൂവെന്നും പാപ്പാ കൂട്ടിച്ചേർത്തു.
ഇറ്റാലിയൻ ബിഷപ്പ്‌സ് കോൺഫറൻസാണ് ഈ യുവജനസമ്മേളനം സംഘടിപ്പിച്ചത്. 80,000 യുവജനങ്ങളാണ് ഇന്നേ ദിവസം വത്തിക്കാനിൽ സന്നിഹിതരായത്.
