സൈനികർ സുവിശേഷത്തിലെ നായകനെപ്പോലെ ദൈവത്തിൽ വിശ്വസിച്ച് മുന്നേറണമെന്ന് ലെയോ പാപ്പ ആഹ്വാനം ചെയ്തു. പോർച്ചുഗലിൽ നിന്നുള്ള സൈനിക പ്രതിനിധികളുമായി നടത്തിയ കൂടിക്കാഴ്ചയിലാണ് മാർപാപ്പ ഈ സന്ദേശം നൽകിയത്. രാജ്യത്തെയും ജനങ്ങളെയും സംരക്ഷിക്കുന്നതിൽ സൈനികർ കാണിക്കുന്ന സേവനസന്നദ്ധതയെ പാപ്പ ഏറെ പ്രശംസിക്കുകയും ചെയ്തു.
ആഗസ്റ്റ് 21 വെള്ളിയാഴ്ച റോഡപകടത്തിൽപ്പെട്ടയാളെ സഹായിക്കുന്നതിനിടെ ജീവൻ നഷ്ടപ്പെട്ട രണ്ട് യുവ പോർച്ചുഗീസ് സൈനികരെ മാർപാപ്പ പ്രാർഥനയോടെ ഓർത്തു. മറ്റുള്ളവരെ സഹായിക്കാൻ സ്വന്തം ജീവൻ നൽകിയ അവരുടെ ത്യാഗം വലിയ മാതൃകയാണെന്ന് പാപ്പ പറഞ്ഞു. അപകടത്തിൽപ്പെട്ട സൈനികരുടെ കുടുംബങ്ങളുടെ ദുഃഖത്തിൽ പങ്കുചേരുന്നതായും മാർപാപ്പ അറിയിച്ചു.
എത്ര വലിയ അധികാരവും ശക്തിയും ഉള്ള ആളാണെങ്കിലും മനുഷ്യന് ദൈവത്തിന്റെ കൃപ ആവശ്യമാണെന്ന് പാപ്പ ഓർമ്മിപ്പിച്ചു. സൈനികരുടെ ആത്മീയ വളർച്ചയ്ക്കായി പ്രവർത്തിക്കുന്ന സൈനിക ചാപ്ലിൻമാർക്ക് അദ്ദേഹം പ്രത്യേക നന്ദി രേഖപ്പെടുത്തി. സൈനികർക്കും അവരുടെ കുടുംബങ്ങൾക്കും എല്ലാവിധ പിന്തുണയും നൽകണമെന്നും മാർപാപ്പ കൂട്ടിച്ചേർത്തു.
