“ഒരു പ്രസംഗം തയ്യാറാക്കിക്കൊണ്ടല്ല ഞാൻ വന്നത്, പകരം ഒരു വിശപ്പോടെയാണ് ഞാൻ എത്തിയത്—നീതിക്കായുള്ള വിശപ്പ്, യഥാർത്ഥ കാരുണ്യത്തിനായുള്ള വിശപ്പ്. എല്ലാവർക്കുമായി വാതിലുകൾ തുറന്നിടാനും ഏവരെയും സ്വീകരിക്കാനും അറിയുന്ന ഒരു സഭയ്ക്കായുള്ള വിശപ്പ്. അവിടെ എല്ലാവർക്കും സ്നേഹം മാത്രമായിരിക്കും, ആരും ശത്രുക്കളാകില്ല. അവിടെ നാമെല്ലാവരും പരസ്പരം ഒത്തുതീർപ്പിലൂടെയും ക്ഷമയിലൂടെയും സമാധാനത്തോടെയും ജീവിക്കാൻ പഠിക്കും.” കാസിൽ ഗാഡോൾഫോയിലെ പ്രത്യേക ഉച്ചഭക്ഷണ വേളയിൽ ഒത്തുകൂടിയവരെ അഭിസംബോധന ചെയ്തുകൊണ്ട് ലെയോ പതിനാലാമൻ പാപ്പ പറഞ്ഞു.
പോപ്പിനൊപ്പമുള്ള ഉച്ചഭക്ഷണത്തിൽ പങ്കുചേർന്ന് അഭയാർഥികളും
റോം രൂപതയുടെയും അനുബന്ധ സന്നദ്ധ സംഘടനകളുടെയും സഹായത്തോടെ എത്തിയ, ദുരിതപൂർണ്ണമായ സാഹചര്യങ്ങളിൽ കഴിയുന്ന 40 കുട്ടികളടക്കം 200 പേരാണ് ഈ പരിപാടിയിൽ പങ്കെടുത്തത്. ‘ബോർഗോ ലൗദാത്തോ സി’ എന്ന സംരംഭത്തിന്റെ മനോഹാരിതയിലും ആത്മീയതയിലും മുഴുകിയാണ് അതിഥികൾ ഈ ദിവസം ചെലവഴിച്ചത്.
ഉന്നത വിദ്യാഭ്യാസത്തിനായുള്ള ലൗദാത്തോ സി സെന്റർ ഡയറക്ടർ ജനറൽ കർദിനാൾ ഫാബിയോ ബാജിയോ മുഖ്യകാർമ്മികത്വം വഹിച്ച വിശുദ്ധ കുർബാനയോടെയാണ് ഇന്നത്തെ പരിപാടികൾ ആരംഭിച്ചത്. കാരുണ്യ പ്രവർത്തനങ്ങൾക്കായുള്ള ഡിക്കാസ്റ്ററിയുടെ പ്രിഫെക്റ്റും പോപ്പിന്റെ അൽമൊണറുമായ ആർച്ച് ബിഷപ്പ് ലൂയിസ് മാരിൻ ഡി സാൻ മാർട്ടിനും കുർബാനയിൽ സഹകാർമ്മികനായിരുന്നു. തുടർന്ന് അതിഥികൾക്കായി ബോർഗോയിലൂടെ ഒരു ഗൈഡഡ് ടൂറും ഒരുക്കിയിരുന്നു.
എല്ലാ മനുഷ്യരോടുമുള്ള ദൈവത്തിന്റെ സ്നേഹം
ചടങ്ങിൽ പങ്കെടുത്തവരെ സ്വാഗതം ചെയ്തുകൊണ്ട്, അവിടെയെത്തിയ ഏവർക്കും പരിശുദ്ധ പിതാവ് നന്ദി പറയുകയും എല്ലാ മനുഷ്യരോടുമുള്ള ദൈവത്തിന്റെ സ്നേഹം പ്രകടിപ്പിക്കാനുള്ള സഭയുടെ ആഗ്രഹം വീണ്ടും ഉറപ്പിച്ചു പറയുകയും ചെയ്തു.
“നിങ്ങൾക്കറിയാവുന്നതുപോലെ, മാർപ്പാപ്പയുടെ പദവികളിൽ ഒന്ന് ‘പോന്തിഫ്’ (Pontiff) എന്നാണ്—അതായത് പാലങ്ങൾ പണിയുന്നവൻ. ഇന്ന് നിങ്ങളോടും നിങ്ങളുടെ കുടുംബങ്ങളോടും, അതുപോലെ നാമിനി ജീവിക്കാൻ ആഗ്രഹിക്കുന്ന സമൂഹത്തോടും ഒപ്പം ഒരു പാലം പണിയാൻ ഞങ്ങളും ആഗ്രഹിക്കുന്നു. നീതി പുലരുന്ന, ദാരിദ്ര്യത്തിന്റെ കാരണങ്ങൾ ഇല്ലാതാക്കപ്പെടുന്ന, ലോകത്ത് ഇന്നും നിലനിൽക്കുന്ന അനീതികൾക്ക് പരിഹാരം കാണുന്ന ഒരു സമൂഹമാണ് അത്.” പാപ്പ കൂട്ടിച്ചേർത്തു.
യേശു നമുക്കിടയിൽ സന്നിഹിതനാണ്
ഈ മനോഹരമായ ഉച്ചഭക്ഷണത്തിനും കൂട്ടായ്മയ്ക്കും പിന്നിൽ പ്രവർത്തിച്ചവർക്കും മാർപ്പാപ്പ നന്ദി അറിയിച്ചു. “നാം ഒരുമിച്ചുകൂടുമ്പോഴെല്ലാം, യേശുവും നമുക്കിടയിൽ സന്നിഹിതനായിരിക്കുന്ന ഈ ഒരേ മേശയ്ക്ക് ചുറ്റും ഒത്തുചേരലിന്റെ ഈ മനോഭാവം പങ്കുവെക്കുമ്പോഴെല്ലാം, നാം ഒരു പുതിയ ലോകം തന്നെയാണ് കെട്ടിപ്പടുക്കുന്നത്. പ്രത്യാശയുടെ ലോകം, നമുക്കിടയിൽ വെളിച്ചമായി മാറുന്ന ഒരു ലോകം,” പാപ്പ പറഞ്ഞു.
