സാൻ മരീനോയിലും റിമിനിയിലുമായി നടത്തിയ ഏകദിന ഇടയസന്ദർശനത്തിന്റെ സമാപനത്തിൽ അർപ്പിച്ച വിശുദ്ധ കുർബാനയിൽ സംസാരിക്കവെ, ഏത് തലത്തിലും അധികാരം എന്നത് ഒരു സേവനമാണെന്ന് ലെയോ പാപ്പ ഓർമ്മിപ്പിച്ചു. മാനവരാശിയെ സേവിക്കാനായി മനുഷ്യനായി അവതരിച്ച യേശുക്രിസ്തുവിന്റെ പാത പിന്തുടർന്ന് സേവന രംഗത്തേക്ക് ഇറങ്ങാനുള്ള നമ്മുടെ വിളിയുടെ അടിസ്ഥാനം വിശുദ്ധ പത്രോസിന്റെ വിശ്വാസമാണെന്ന് ലിയോ പതിനാലാമൻ മാർപാപ്പ വിശ്വാസികളെ ഓർമ്മിപ്പിച്ചു.
അന്നത്തെ സുവിശേഷ ഭാഗത്തിൽ പരാമർശിക്കുന്ന, യേശുവാണ് മിശിഹായെന്ന വിശുദ്ധ പത്രോസിന്റെ വിശ്വാസപ്രഖ്യാപനം അനുസ്മരിച്ചുകൊണ്ടാണ് പരിശുദ്ധ പിതാവ് തന്റെ പ്രസംഗം ആരംഭിച്ചത്. “യേശുവാണ് മിശിഹായെന്നും, ‘സേവിക്കാനും അനേകരുടെ മോചനദ്രവ്യമായി സ്വന്തം ജീവൻ കൊടുക്കാനുമായി’ ലോകത്തിലേക്ക് അയക്കപ്പെട്ട പിതാവിന്റെ നിത്യപുത്രനാണെന്നും നാം വിശ്വസിക്കുന്നതുകൊണ്ടാണ് നാം ഇവിടെ ഒത്തുചേർന്നിരിക്കുന്നത്,” ലെയോ മാർപാപ്പ പറഞ്ഞു.
സ്വർഗ്ഗരാജ്യത്തിന്റെ താക്കോലുകൾ യേശു പത്രോസിനെ ഏൽപ്പിച്ച സംഭവം നാം മനസ്സിലാക്കേണ്ടത് ഈ അർത്ഥത്തിലാണെന്ന് ലിയോ മാർപാപ്പ വ്യക്തമാക്കി. സഭയിൽ അധികാരം എന്നത് ഒരു സേവനമാണെന്നാണ് ഈ പ്രവർത്തനം നമ്മെ കാണിക്കുന്നത്. മെത്രാന്മാരും വൈദികരും മാത്രമല്ല, മാമോദീസ സ്വീകരിച്ച ഓരോ വ്യക്തിയും “പാപത്താലും അതിന്റെ അനന്തരഫലങ്ങളാലും ബന്ധനസ്ഥരായ ഏവരെയും” ആശ്ലേഷിക്കാനും, ഒന്നിപ്പിക്കാനും, സ്വീകരിക്കാനും, സ്വതന്ത്രരാക്കാനും, മാപ്പുനൽകാനും മോചിപ്പിക്കാനും വിളിക്കപ്പെട്ടവരാണെന്ന് പാപ്പ പറഞ്ഞു.
വ്യക്തികൾ എന്ന നിലയിലും പ്രസ്ഥാനങ്ങൾ എന്ന നിലയിലും, ആതിഥ്യമര്യാദയിലൂടെയും ധ്യാനത്തിലൂടെയും സഹായിക്കാനും ദാനധർമ്മം ചെയ്യാനുമുള്ള സന്നദ്ധതയിലൂടെയും ക്രിസ്തീയ സമൂഹം ഈ അനുഭവം വളർത്തിയെടുക്കാൻ വിളിക്കപ്പെട്ടിരിക്കുന്നുവെന്ന് പാപ്പ പറഞ്ഞു.
