ഇറ്റാലിയൻ ബിഷപ്പ് പൗലോ മാർട്ടിനെല്ലിയെ ദക്ഷിണ അറേബ്യയിലെ അപ്പസ്തോലിക് വികാരിയായി നിയമിച്ച് ഫ്രാൻസിസ് പാപ്പാ. പ്രായാധിക്യം മൂലം സ്ഥാനമൊഴിഞ്ഞ ബിഷപ്പ് പോൾ ഹിൻഡറിന്റെ പിൻഗാമിയായാണ് മേയ് ഒന്നിന് ബിഷപ്പ് മാർട്ടിനെല്ലിയെ പാപ്പാ നിയമിച്ചത്.
1958 ഒക്ടോബർ 22- ന് ഇറ്റലിയിലെ മിലാനിലാണ് ബിഷപ്പ് മാർട്ടിനെല്ലി ജനിച്ചത്. 1978- ൽ ലോംബാർഡിയിലെ സാൻ കാർലോ പ്രവിശ്യയിൽ ഓർഡർ ഓഫ് ദി കപ്പൂച്ചിൻ ഫ്രയേഴ്സ് മൈനറിൽ പ്രവേശിച്ചു.1985 സെപ്റ്റംബറിൽ വൈദികനായി അഭിഷിക്തനായ അദ്ദേഹം വിവിധ പൊന്തിഫിക്കൽ സർവകലാശാലകളിൽ ദൈവശാസ്ത്രം പഠിക്കുകയും പഠിപ്പിക്കുകയും ചെയ്തിട്ടുണ്ട്. 2014 മേയ് 24- ന് അദ്ദേഹം മിലാനിലെ സഹായ മെത്രാനായി നിയമിതനായി. അദ്ദേഹത്തിന്റെ സ്ഥാനാരോഹണം 2014 ജൂൺ 28- ന് മെട്രോപൊളിറ്റൻ കത്തീഡ്രൽ ബസിലിക്കയിൽ വച്ചാണ് നടന്നത്.
