2008-ന് ശേഷമുള്ള ആദ്യത്തെ ഔദ്യോഗിക പേപ്പൽ സന്ദർശനത്തിനായി ഫ്രാൻസിലെത്തിയ ലെയോ പതിനാലാമൻ മാർപാപ്പ പാരീസിലെ തന്റെ ആദ്യദിന പരിപാടികൾ പൂർത്തിയാക്കവെ, സെപ്റ്റംബർ 26 ശനിയാഴ്ച രാത്രി നഗരത്തിലെത്തുന്ന പരിശുദ്ധ പിതാവിനെ സ്വീകരിക്കാനുള്ള ഒരുക്കങ്ങളിലാണ് ലൂർദിലെ (Lourdes) തീർഥാടകരും സംഘാടകരും വ്യാപാരികളും.
“സാധാരണയായി ലൂർദിൽ തങ്ങുന്ന ആളുകളുടെ ശരാശരി എണ്ണം പതിനായിരത്തോളമാണ്. എന്നാൽ ഞായറാഴ്ചത്തെ വിശുദ്ധ കുർബാനയിൽ പങ്കെടുക്കാൻ ഏകദേശം 1,50,000 ആളുകൾ എത്തും. വാരാന്ത്യത്തിൽ ആകെ രണ്ടര ലക്ഷത്തോളം ആളുകളുടെ പങ്കാളിത്തമാണ് ഞങ്ങൾ പ്രതീക്ഷിക്കുന്നത്,” ലൂർദിലെ ഏറ്റവും വലിയ ഹോട്ടൽ ശൃംഖലയായ ‘ഹോട്ടൽസ് വിനുവാലെസ്’ (Hôtels Vinuales) ഉടമ പാട്രിക് വിനുവാലെസ് പറഞ്ഞു. ലൂർദിലെ ഒരു പ്രധാന മേഖലയാണ് ടൂറിസം. വെറും 10,000 നിവാസികൾ മാത്രമുള്ള ഒരു ചെറുനഗരത്തിന് അപൂർവമായി, പാരിസ് കഴിഞ്ഞാൽ ഫ്രാൻസിൽ ഏറ്റവും കൂടുതൽ ഹോട്ടലുകളുള്ള സ്ഥലമായി ലൂർദ് കണക്കാക്കപ്പെടുന്നു. ഈ അവസരം ഹോട്ടൽ ഉടമകൾ പരമാവധി പ്രയോജനപ്പെടുത്തിയിട്ടുണ്ട്.
പ്രധാന ചടങ്ങുകളിൽ പങ്കെടുക്കാൻ ടൂറിസ്റ്റുകൾ മുൻകൂട്ടി രജിസ്റ്റർ ചെയ്തിരിക്കണം. അല്ലാത്തപക്ഷം അവർക്ക് തീർഥാടനലയത്തിലേക്ക് പ്രവേശനം ലഭിക്കില്ല. 1983-ലും 2004-ലും ജോൺ പോൾ രണ്ടാമൻ മാർപാപ്പ ലൂർദ് സന്ദർശിച്ചിരുന്നു. 2007-ൽ ബനഡിക്ട് പതിനാറാമൻ മാർപാപ്പയും സന്ദർശനം നടത്തിയിരുന്നു.
സംഘടിത തീർഥാടക സംഘങ്ങളായി എത്തുന്നവരുടെ എണ്ണത്തിലും വലിയ വർധനവാണ് ഈ സന്ദർശനം ഉണ്ടാക്കിയിരിക്കുന്നത്. ലൂർദിലെത്തുന്ന ഭൂരിഭാഗം സന്ദർശകരും തങ്ങളുടെ പ്രാദേശിക രൂപതകൾക്കൊപ്പമാണ് ഇത്തരത്തിൽ എത്തുന്നത്.
