മതങ്ങൾക്കും വംശീയമായ അതിരുകൾക്കുമപ്പുറം മനുഷ്യരെ ഒന്നിപ്പിക്കുന്ന ദൈവകൃപയുടെ വലിയൊരു സാക്ഷ്യത്തിനാണ് ലെബനൻ ഇന്ന് സാക്ഷ്യം വഹിക്കുന്നത്. ലെബനനിലെ മാറോനൈറ്റ് കാത്തലിക് സഭയുടെ പ്രമുഖ മുൻ തലവനായിരുന്ന പാത്രിയാർക്കീസ് ഏലിയാസ് ഹോയക്കിനെ സഭ വാഴ്ത്തപ്പെട്ടവനായി പ്രഖ്യാപിക്കാൻ വഴിയൊരുക്കിയത് ഒരു മുസ്ലീം സഹോദരന് ലഭിച്ച അദ്ഭുതകരമായ രോഗശാന്തിയാണ്. സഭയുടെ കാനോനൈസേഷൻ നടപടികൾക്കായി വത്തിക്കാൻ അംഗീകരിച്ച ഈ സംഭവം, മിഡിൽ ഈസ്റ്റിലെ ക്രൈസ്തവ-മുസ്ലീം സൗഹാർദത്തിനും സൗഹാർദപരമായ സഹവർത്തിത്വത്തിനും വലിയൊരു പുതിയ വെളിച്ചം പകരുന്നു. ആ സംഭവത്തിലൂടെ ഒന്ന് കടന്നുപോകാം.
ഏലിയാസ് ഹോയക്കിന്റെ മധ്യസ്ഥതയാൽ നടക്കുകയും വാഴ്ത്തപ്പെട്ട പദവി പ്രഖ്യാപനത്തിന് വഴിയൊരുക്കുകയും ചെയ്ത അദ്ഭുതം സംഭവിച്ചത് മിഡിൽ ഈസ്റ്റിലെ ഒരു മതന്യൂനപക്ഷമായ ഡ്രൂസ് സമൂഹത്തിലാണ്. രാജ്യത്തെ വിവിധ സമൂഹങ്ങൾക്കിടയിലുള്ള സംവാദങ്ങൾക്കും സഹവർത്തിത്വത്തിനും വേണ്ടി പാത്രിയാർക്കീസ് ഹോയക്ക് നിരന്തരം നിലകൊണ്ടിരുന്നു എന്ന വസ്തുത മുൻനിർത്തി നോക്കുമ്പോൾ ഈ സംഭവം ഏറെ പ്രാധാന്യമർഹിക്കുന്ന ഒന്നായി കരുതപ്പെടുന്നു. ലെബനനിലെ ഹസ്ബയ (Hasbaya) സ്വദേശിയും, വിവാഹിതനും, മൂന്ന് മക്കളുടെ പിതാവും, ലെബനീസ് സൈന്യത്തിലെ ഉദ്യോഗസ്ഥനും ഡ്രൂസ് വംശജനായ ഒരു മുസ്ലീം സഹോദരനിലാണ് ഹോയക്കിന്റെ മധ്യസ്ഥതയാൽ രോഗശാന്തി സംഭവിച്ചത്.
വത്തിക്കാന്റെ വിശുദ്ധരുടെ പദവികൾക്കായുള്ള ഡികാസ്റ്ററിയുടെ വെബ്സൈറ്റ് അനുസരിച്ച്, 2005 മുതൽ നടുവിനും പുറത്തും കഠിനമായ വേദനയാൽ കഷ്ടപ്പെടുകയായിരുന്നു ഈ ഡ്രൂസ് വംശജൻ. എന്നാൽ ഏകദേശം അഞ്ച് മീറ്റർ ഉയരത്തിൽ നിന്ന് താഴേക്ക് വീണതിനെത്തുടർന്ന് അദ്ദേഹത്തിനുണ്ടായിരുന്ന ഈ വേദനകൾ അതിരൂക്ഷമാവുകയും അസഹനീയമാവുകയും ചെയ്തു. തുടർന്ന് നടന്ന പരിശോധനകളിൽ അദ്ദേഹത്തിന് ‘ബൈലാറ്ററൽ സ്പോണ്ടിലോലിസിസ്’ (bilateral spondylolysis) എന്ന രോഗാവസ്ഥയാണെന്ന് സ്ഥിരീകരിച്ചു. മാസങ്ങളോളം ഈ രോഗത്തിന്റെ തീവ്രത ഒരു മാറ്റവുമില്ലാതെ തുടർന്നു. വൈദ്യശാസ്ത്രത്തിന് ഇനി ഒന്നും ചെയ്യാനില്ലാ എന്ന് പറഞ്ഞു അവർ കൈയ്യൊഴിഞ്ഞു. എന്നാൽ ഈ ഘട്ടത്തിലാണ് ആ വ്യക്തിയിൽ അദ്ഭുതകരമായ സൗഖ്യം സംഭവിക്കുന്നത്.
ഒരു രാത്രിയിൽ അദ്ദേഹം ഒരു സ്വപ്നം കണ്ടു. വെള്ള വസ്ത്രം ധരിച്ച് കൈയിൽ വടിയുമേന്തി എത്തിയ ഒരു വയോധികൻ അദ്ദേഹത്തെ ആശ്വസിപ്പിക്കുകയും രോഗശാന്തി നൽകുകയും ചെയ്തു. പിന്നീട്, ഈ വയോധികൻ ആരാണെന്ന് തിരക്കിയപ്പോഴാണ് അത് ലെബനനിലെ പ്രശസ്തനായ മാറോനൈറ്റ് പാത്രിയാർക്കീസ് ഏലിയാസ് ഹോയക്കാണെന്ന് അദ്ദേഹം തിരിച്ചറിയുന്നത്. തുടർന്ന് നടന്ന വൈദ്യശാസ്ത്ര പരിശോധനകളിൽ അദ്ദേഹത്തിന്റെ രോഗം പൂർണ്ണമായും സൗഖ്യപ്പെട്ടതായി ഡോക്ടർമാർ സ്ഥിരീകരിച്ചു.
ഈ രോഗശാന്തി അദ്ഭുതം വത്തിക്കാൻ വിവിധ പഠനങ്ങൾക്കു വിധേയമാക്കുകയും ഔദ്യോഗികമായി അംഗീകരിക്കുകയും ചെയ്തതോടെ, പാത്രിയാർക്കീസ് ഏലിയാസ് ഹോയക്കിന്റെ വാഴ്ത്തപ്പെട്ട പദവി പ്രഖ്യാപനത്തിന് വഴിയൊരുങ്ങുകയായിരുന്നു. ലെബനൻ പോലെ വിവിധ മതവിഭാഗങ്ങൾ ജീവിക്കുന്ന ഒരു രാജ്യത്ത്, ഒരു മുസ്ലീം സഹോദരന് ക്രൈസ്തവ മേലധ്യക്ഷന്റെ മധ്യസ്ഥതയാൽ ലഭിച്ച ഈ സൗഖ്യം പരസ്പര സ്നേഹത്തിന്റെയും സൗഹാർദത്തിന്റെയും പുതിയ അധ്യായമാണ് തുറക്കുന്നത്.
