കെനിയയിലെ പ്രമുഖ മാധ്യമ സ്ഥാപനമായ ‘സ്റ്റാൻഡേർഡ് ഗ്രൂപ്പിന്റെ’ അസോസിയേറ്റ് എഡിറ്റർ അലക്സ് കിപ്രോട്ടിച്ച് അജ്ഞാതരുടെ സംഘത്തിന്റെ തടങ്കലിൽ നിന്ന് മോചിതനായി. സെപ്റ്റംബർ ഒന്നിന് രാത്രിയാണ് അദ്ദേഹത്തെ ആയുധധാരികളായ സംഘം തട്ടിക്കൊണ്ടുപോയത്. മണിക്കൂറുകൾക്ക് ശേഷം 200 കിലോമീറ്ററിലധികം അകലെയുള്ള മസിംഗ അണക്കെട്ടിന് സമീപം അദ്ദേഹത്തെ ഉപേക്ഷിച്ച നിലയിൽ കണ്ടെത്തുകയായിരുന്നു.
നകുരു നഗരത്തിന് സമീപത്തുനിന്നും ചൊവ്വാഴ്ച രാത്രി 9:20-ഓടെയാണ് കിപ്രോട്ടിചിനെ മാസ്ക് ധരിച്ച നാലംഗ സംഘം തട്ടിക്കൊണ്ടുപോയത്. ഇതിന്റെ ദൃശ്യങ്ങൾ മാധ്യമ സ്ഥാപനം പുറത്തുവിട്ടിരുന്നു. തുടർന്ന് നടത്തിയ തെരച്ചിലിനൊടുവിലാണ് ആഗസ്റ്റ് രണ്ടിന് പുലർച്ചെയോടെ അദ്ദേഹത്തെ സുരക്ഷിതനായി കണ്ടെത്തിയത്. ആരോഗ്യനില തൃപ്തികരമാണെങ്കിലും അദ്ദേഹം കടുത്ത മാനസിക ആഘാതത്തിലാണ്.
തടവിലാക്കിയ സമയത്ത് പത്രത്തിന്റെ വാർത്താ ഉറവിടങ്ങളെക്കുറിച്ചും തലക്കെട്ടുകളെക്കുറിച്ചും തട്ടിക്കൊണ്ടുപോയവർ ചോദ്യം ചെയ്തതായി കിപ്രോട്ടിച്ച് സഹപ്രവർത്തകരോട് വെളിപ്പെടുത്തി. മാധ്യമപ്രവർത്തനം ശക്തമായി തുടരുന്നതിന്റെ പേരിൽ തന്നെ ലക്ഷ്യം വച്ചുള്ള ആക്രമണമാണിതെന്ന് ‘സ്റ്റാൻഡേർഡ് ഗ്രൂപ്പ്’ സിഇഒ ചച്ച മിത വ്യക്തമാക്കി. കഴിഞ്ഞ ജൂൺ മാസത്തിലും അദ്ദേഹത്തെ തട്ടിക്കൊണ്ടുപോകാൻ ശ്രമം നടന്നിരുന്നു.
