ഡൗൺ സിൻഡ്രോം ബാധിച്ച വ്യക്തികൾക്ക് സാധാരണ കുടുംബജീവിതം നയിക്കാനോ കുട്ടികളെ വളർത്താനോ സാധിക്കില്ലെന്നൊരു ധാരണ സമൂഹത്തിൽ നിലനിൽക്കുന്നുണ്ട്. എന്നാൽ ആത്മാർഥമായ സ്നേഹത്തിനും അർപ്പണബോധത്തിനും മുന്നിൽ ഏത് പ്രതിബന്ധവും വഴിമാറുമെന്ന് തെളിയിക്കുകയാണ് സിറിയക്കാരനായ ജാദ് ഇസ എന്ന പിതാവ്. ഡൗൺ സിൻഡ്രോം എന്ന അവസ്ഥയെ മറികടന്ന് സ്വന്തം മകനെ സ്നേഹത്തോടെ വളർത്തുക മാത്രമല്ല അവനെ ഒരു ഡോക്ടറാക്കി മാറ്റുകയും ചെയ്തിരിക്കുകയാണ് ഈ അച്ഛൻ.
സ്നേഹം നിറഞ്ഞ ബാല്യകാലം
ജാദിനും ഭാര്യക്കും മകൻ സദർ ജനിച്ചപ്പോൾ മറ്റേതൊരു കുടുംബത്തിലെയും പോലെ അളവറ്റ സ്നേഹത്തോടെയാണ് ആ കുഞ്ഞിനെ അവർ വരവേറ്റത്. കുട്ടിക്കാലത്ത് തന്നോടൊപ്പം കളിക്കാനും ഗുസ്തി പിടിക്കാനും സമയം കണ്ടെത്തിയിരുന്ന സ്നേഹനിധിയായ അച്ഛനെക്കുറിച്ചാണ് സദറിന് ഓർക്കാൻ ഏറെയുള്ളത്. വൈകല്യങ്ങളുടെ പേരിൽ മാറ്റിനിർത്താതെ ആ നാട്ടിലെ പ്രാദേശിക സമൂഹവും ഈ കുടുംബത്തെ നെഞ്ചോടു ചേർത്തുപിടിച്ചു.
മകന്റെ സ്വപ്നത്തിനായി ഗോതമ്പ് മില്ലിലെ കഠിനാധ്വാനം
ഒരു ഗോതമ്പ് മില്ലിലായിരുന്നു ജാദ് ജോലി ചെയ്തിരുന്നത്. തുച്ഛമായ വരുമാനമായിരുന്നു ലഭിച്ചിരുന്നതെങ്കിലും മകന് മികച്ച ഉന്നതവിദ്യാഭ്യാസം നൽകണമെന്നതായിരുന്നു അദ്ദേഹത്തിന്റെ ഏറ്റവും വലിയ സ്വപ്നം. മകന്റെ കോളേജ് പഠനത്തിനായി അദ്ദേഹം വർഷങ്ങളോളം തുക സമ്പാദിച്ചുവച്ചു. അച്ഛന്റെ ഈ കഠിനാധ്വാനവും ത്യാഗവുമാണ് തനിക്ക് പഠിക്കാനും ഉയർന്ന വിജയം നേടാനുമുള്ള പ്രചോദനമായതെന്ന് സദർ ഓർക്കുന്നു.
”എനിക്ക് ഇങ്ങനെയൊരു അച്ഛൻ ഇല്ലായിരുന്നുവെങ്കിൽ ജീവിതത്തിൽ എനിക്ക് ഇത്രയും ആവേശമോ ലക്ഷ്യബോധമോ ഉണ്ടാകുമായിരുന്നില്ല,” സദർ പറയുന്നു.
’ഇത് എന്റെ മകൻ, ഡോക്ടറാണ്’
സദർ ഇന്ന് അറിയപ്പെടുന്ന ഒരു ദന്തഡോക്ടറാണ്. മകന്റെ ഈ നേട്ടത്തിൽ ജാദിന്റെ സന്തോഷത്തിന് അതിരുകളില്ലായിരുന്നു. മകൻ പഠിക്കുന്ന കാലത്ത് പോലും പരിചയപ്പെടുന്നവരോടെല്ലാം കണ്ണുകളിൽ അഭിമാന തിളക്കത്തോടെ “ഇത് എന്റെ മകൻ, ഇവനൊരു ഡോക്ടറാണ്” എന്ന് ജാദ് പറയുമായിരുന്നു.
സ്റ്റീരിയോടൈപ്പുകളെ തച്ചുടച്ച കുടുംബം
വർഷങ്ങൾ പലത് കഴിഞ്ഞിട്ടും ജാദും ഭാര്യയും തമ്മിലുള്ള ബന്ധത്തിന് ഒട്ടും തിളക്കം കുറഞ്ഞിട്ടില്ല. ഇന്നലെ വിവാഹം കഴിഞ്ഞതുപോലെയാണ് അവർ പരസ്പരം സ്നേഹിക്കുന്നതെന്ന് സദർ പറയുന്നു. പരസ്പരം ആവശ്യങ്ങൾ കൃത്യമായി മനസ്സിലാക്കുന്ന ഇരുവരും ഒരുമിച്ച് നടക്കാൻ പോകുന്നതും മണിക്കൂറുകളോളം സംസാരിച്ചിരിക്കുന്നതും പതിവാണ്.
തന്റെ വിജയത്തിന്റെ മുഴുവൻ ക്രെഡിറ്റും അച്ഛന് നൽകുന്ന സദർ, അച്ഛൻ തന്നിൽ എത്രത്തോളം അഭിമാനിക്കുന്നുവോ അത്രത്തോളം തന്നെ അച്ഛനെ ഓർത്ത് താനും അഭിമാനിക്കുന്നുണ്ടെന്ന് വ്യക്തമാക്കുന്നു. ഒഴിവുസമയങ്ങളിൽ ഒരുമിച്ച് സിനിമകൾ കണ്ടും സംസാരിച്ചും ഈ അച്ഛനും മകനും സമയം ചെലവഴിക്കുന്നു.
ശാരീരികവും മാനസികവുമായ പരിമിതികൾ സ്നേഹത്തിന് തടസ്സമല്ലെന്നും നിസ്വാർഥമായ സ്നേഹം കൊണ്ട് ലോകത്തിലെ ഏത് അദ്ഭുതവും സൃഷ്ടിക്കാമെന്നും ഓർമ്മിപ്പിക്കുകയാണ് ജാദിന്റെയും മകൻ സദറിന്റെയും ജീവിതം.
സീനിയ എൽസ ഇഗ്നേഷ്യസ്
