ജപ്പാനിലെ കുമമോട്ടോ പ്രവിശ്യയിലുണ്ടായ ശക്തമായ ഭൂകമ്പത്തെ തുടർന്ന് ദുരിതത്തിലായ ജനങ്ങൾക്ക് അടിയന്തര സഹായവും പുനരധിവാസ പിന്തുണയുമായി കത്തോലിക്കാ സഭ. ദുരന്തബാധിതരെ സഹായിക്കുന്നതിനായി പ്രാർഥനകൾക്കും സംഭാവനകൾക്കും ആഹ്വാനം ചെയ്തുകൊണ്ട് ഫുകുവോക്ക രൂപതയും കാരിത്താസ് ജപ്പാനും രംഗത്തെത്തി.
2016-ൽ നടന്ന വിനാശകരമായ കുമമോട്ടോ ഭൂകമ്പത്തിന്റെ പത്താം വാർഷികം പൂർത്തിയാകുന്ന വേളയിലാണ് പ്രദേശത്തെ വീണ്ടും നടുക്കി പുതിയ ഭൂകമ്പം ഉണ്ടായത്. ഉത്തോ (Uto), ഉക്കി (Uki), യാത്സുഷിറോ (Yatsushiro) എന്നീ നഗരങ്ങളെയും ഹികാവ (Hikawa) പട്ടണത്തെയുമാണ് ദുരന്തം ഏറ്റവും രൂക്ഷമായി ബാധിച്ചത്. ഫുകുവോക്ക രൂപതാ ബിഷപ്പ് ജോസെപ് മരിയ അബെല്ലെയുടെ (Josep M. Abella) നേതൃത്വത്തിൽ സഭാ പ്രതിനിധികൾ ദുരന്തബാധിത പ്രദേശങ്ങൾ സന്ദർശിച്ച് സ്ഥിതിഗതികൾ വിലയിരുത്തി. യാത്സുഷിറോ പള്ളിയുടെ (Yatsushiro Church) പ്രധാന മന്ദിരം, വൈദിക മന്ദിരം, പാരിഷ് ഹാൾ എന്നിവയ്ക്ക് ഗുരുതരമായ നാശനഷ്ടങ്ങൾ സംഭവിച്ചിട്ടുണ്ട്.
ഫുകുവോക്ക കത്തോലിക്കാ രൂപതയിലെ ഫുകുവോക്ക കാരിത്താസ് കമ്മിറ്റിയും കാരിത്താസ് ജപ്പാനും ചേർന്ന് അടിയന്തര ദുരിതാശ്വാസ നിധി രൂപീകരിച്ചു. ദുരന്തബാധിതർക്ക് ആവശ്യമായ ഭക്ഷണവും മറ്റ് അടിയന്തര സാമഗ്രികളും എത്തിക്കാനും, കേടുപാടുകൾ സംഭവിച്ച കെട്ടിടങ്ങൾ പുനർനിർമ്മിക്കാനും ഫണ്ട് ഉപയോഗിക്കും. ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങളെ അനുശോചനം അറിയിച്ച ബിഷപ്പ് അബെല്ലെ, ദുരിതമനുഭവിക്കുന്ന ജനതയ്ക്കൊപ്പം കത്തോലിക്കാ സഭ ഉറച്ചുനിൽക്കുമെന്നും സാധ്യമായ എല്ലാ സഹായങ്ങളും എത്തിക്കുമെന്നും ഉറപ്പുനൽകി.
