സംസ്ഥാനത്ത് ശക്തമായ മഴ തുടരുന്നു. ഒമ്പത് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, ഇടുക്കി, തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് കടുത്ത ജാഗ്രതാനിർദേശം നൽകിയിരിക്കുന്നത്. അതിനിടെ, കനത്ത മഴയിലും ഉരുൾപൊട്ടലിലും പെട്ട് സംസ്ഥാനത്ത് ഇതുവരെ അഞ്ച് പേർ മരിച്ചു.
മറ്റു ജില്ലകളിൽ ജാഗ്രതയുടെ ഭാഗമായി ഓറഞ്ച് അലർട്ടും പ്രഖ്യാപിച്ചിട്ടുണ്ട്. മലവെള്ളപ്പാച്ചിലിനും മണ്ണിടിച്ചിലിനും സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. പമ്പ, അച്ചൻകോവിൽ, മണിമല, മീനച്ചൽ, മൂവാറ്റുപുഴ എന്നീ അഞ്ച് നദികളിൽ ജലനിരപ്പ് ഉയർന്നതിനാൽ തീരത്തുള്ളവർ മാറിനിൽക്കണം.
ഇടുക്കിയിലും പൂഞ്ഞാറിലും ഉണ്ടായ ഉരുൾപൊട്ടലിൽ വീടുകൾ തകർന്ന് നാലു പേരാണ് മരണപ്പെട്ടത്. മലപ്പുറത്ത് ഒഴുക്കിൽപ്പെട്ട് നാലു വയസ്സുള്ള കുട്ടിയും ജീവൻ വെടിഞ്ഞു. നാളെ എട്ട് ജില്ലകളിൽ ശക്തമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്.
