കുടിയേറ്റക്കാരെയും അഭയാർത്ഥികളെയും സ്വീകരിക്കണമെന്ന് ആഹ്വാനം ചെയ്ത് ഫ്രാൻസിസ് മാർപാപ്പ. ജൂൺ 20- ന് ലോക അഭയാർത്ഥി ദിനത്തോടനുബന്ധിച്ച് പുറത്തുവിട്ട ട്വിറ്റർ സന്ദേശത്തിലാണ് പാപ്പാ ഇപ്രകാരം പറഞ്ഞത്.
“ഭാവി കെട്ടിപ്പടുക്കുന്നതിൽ നമ്മുടെ സ്വർഗീയ പിതാവുമായി സഹകരിക്കണമെങ്കിൽ, കുടിയേറ്റക്കാരും അഭയാർത്ഥികളുമായ നമ്മുടെ സഹോദരീ സഹോദരന്മാരെ നമ്മൾ സ്വീകരിക്കണം. ഭാവി ആരംഭിക്കുന്നത് നാം ഓരോരുത്തരിൽ നിന്നുമാണ്”- പാപ്പാ പറഞ്ഞു. ലോക കുടിയേറ്റ ദിനത്തിലും കുടിയേറ്റക്കാരെയും അഭയാർത്ഥികളെയും സ്വീകരിക്കുന്നതിനെക്കുറിച്ച് പാപ്പാ സംസാരിച്ചിരുന്നു. എല്ലാ മനുഷ്യരെയും അംഗീകരിക്കുന്നതും ബഹുമാനിക്കുന്നതും ശോഭനമായ ഭാവി പടുത്തുയർത്താൻ സഹായകമാണെന്നും പാപ്പാ കൂട്ടിച്ചേർത്തു.
