ആരാണ് ‘ടൈം മാഗസിന്റെ’ കവർ പേജിൽ ഇടംനേടിയ ആ ഒൻപത്‌ വയസ്സുകാരൻ!

ലെഡ്ജർ മാൻ എന്ന ഒൻപതുവയസ്സുകാരൻ ഓട്ടിസം ബാധിതനാണ്. 2026-ലെ ടൈം മാഗസിന്റെ ‘കിഡ് ഓഫ് ദി ഇയർ’ (TIME’s Kid of the Year) ആയി തിരഞ്ഞെടുക്കപ്പെട്ടിരിക്കുകയാണ് ലെഡ്ജർ മാൻ. വിർജീനിയ സ്വദേശിയായ ലെഡ്ജർ തന്റെ ചെറിയ പ്രായത്തിൽ തന്നെ വളരെ ശ്രദ്ധേയമായ ഒരു കാര്യമാണ് ചെയ്തത്. അടിയന്തര സാഹചര്യങ്ങളിൽ ഓട്ടിസം ബാധിതരായ കുട്ടികളെ മികച്ച രീതിയിൽ പരിചരിക്കാൻ പൊലീസ് ഉദ്യോഗസ്ഥർ, അഗ്നിശമന സേനാംഗങ്ങൾ, പാരാമെഡിക്കുകൾ എന്നിവരെ സഹായിക്കുക എന്നതായിരുന്നു ലെഡ്ജർ മാൻ ഏറ്റെടുത്ത വലിയ ദൗത്യം.

ഓട്ടിസം ഉള്ളതുകൊണ്ട് തന്നെ, അടിയന്തര സാഹചര്യങ്ങളിൽ തന്നെപ്പോലെയുള്ള മറ്റുകുട്ടികൾക്ക് എന്തൊക്കെയാണ് ആവശ്യമായി വരിക എന്ന് കൃത്യമായി മനസ്സിലാക്കാൻ ലെഡ്ജറിന് കഴിയുമായിരുന്നു. അച്ഛനുമായുള്ള ഒരു ചെറിയ സംഭാഷണത്തിൽ നിന്നും, തന്റെ കൈയ്യിൽ സൂക്ഷിച്ചിരുന്ന 100 ഡോളറിൽ നിന്നുമാണ് ഈ വലിയ മാറ്റത്തിന് ലെഡ്ജർ മാൻ തുടക്കം കുറിച്ചത്.

പ്രിൻസ് ജോർജ് കൗണ്ടിയിലെ പൊലീസ് ഉദ്യോഗസ്ഥനായ ലെഡ്ജറിന്റെ അച്ഛൻ സർജന്റ് ജെ.ടി. മാൻ, കാണാതായ ഒരു കുട്ടിയെ തിരയുന്ന ദൗത്യത്തിന് ശേഷം വീട്ടിൽ തിരിച്ചെത്തിയ സാഹചര്യമാണ് ലെഡ്ജർ മാന്റെ മനസ്സിൽ ഇപ്രകാരം ഒരു ആശയം കൊണ്ടുവരാൻ കാരണമായത്. ഓട്ടിസം ബാധിതനായിരുന്ന ആ കുട്ടിയെ, അവന്റെ വീടിന്റെ ഡെക്കിലുള്ള ബാർബിക്യൂ ഗ്രില്ലിന് താഴെയുള്ള ഒരു സ്റ്റോറേജ് കാബിനറ്റിനുള്ളിൽ ഒളിച്ചിരിക്കുന്ന നിലയിൽ സുരക്ഷിതമായി കണ്ടെത്തുകയായിരുന്നു. നടന്ന സംഭവങ്ങൾ ജെ.ടി. തന്റെ കുടുംബത്തോട് വിവരിച്ചു. ഇതെല്ലാം ശ്രദ്ധയോടെ കേട്ടിരുന്ന ലെഡ്ജർ, ഭയന്നുപോയ ആ കുട്ടിയെക്കുറിച്ച് ചിന്തിക്കുകയും രക്ഷാപ്രവർത്തകർക്ക് അല്പം കൂടി സഹായം ആവശ്യമാണെന്ന് തിരിച്ചറിയുകയും ചെയ്തു.

തന്റെ ഫോണിലെ ഒരു വീഡിയോ കാണിച്ചാണ് അച്ഛൻ ആ കുട്ടിയെ പുറത്തേക്ക് കൊണ്ടുവന്നതെങ്കിലും, അമിതമായ മാനസിക സമ്മർദമുണ്ടാക്കുന്ന സാഹചര്യങ്ങളിൽ ഓട്ടിസം ബാധിതരായ കുട്ടികളെ ശാന്തരാക്കാൻ മറ്റ് പല സാധനങ്ങൾക്കും കഴിയുമെന്ന് ലെഡ്ജറിന് അറിയാമായിരുന്നു.

അമ്മ അമാൻഡ മാൻ പറയുന്നതനുസരിച്ച്, വെറും 10 മിനിറ്റിനുള്ളിൽ ‘എൽ.ജി.എം ബാഗുകൾ’ (LGM Bags) എന്ന ആശയം പിറവിയെടുത്തു. സോഫ്റ്റ് ടോയ്‌സ്, ഫിഡ്ജറ്റ് സ്പിന്നറുകൾ, ഹെഡ്‌ഫോണുകൾ, സൺഗ്ലാസുകൾ, പുതപ്പുകൾ തുടങ്ങിയ ആശ്വാസം നൽകുന്ന വസ്തുക്കൾ നിറച്ച സുതാര്യമായ (transparent) ബാക്ക്പാക്കുകളാണ് ഇവ. സംസാരിക്കാൻ ബുദ്ധിമുട്ടുള്ള കുട്ടികളെ ആശയവിനിമയം നടത്താൻ സഹായിക്കുന്നതിനായി ഒരു ചെറിയ വൈറ്റ്ബോർഡും ഇതിലുണ്ട്.

ബാഗുകൾ സുതാര്യമായിരിക്കണം എന്നതും ലെഡ്ജറിന്റെ ബുദ്ധിപരമായ ആശയമായിരുന്നു. ഭയന്നിരിക്കുന്ന ഒരു കുട്ടിയുടെ മാനസികാവസ്ഥ മനസ്സിലാക്കാൻ കഴിഞ്ഞതിനാൽ, വാക്കുകൾ കൊണ്ട് വിശദീകരിക്കാൻ ബുദ്ധിമുട്ടാതെ തന്നെ ബാഗിനുള്ളിലുള്ള സാധനങ്ങൾ കാണാനും തങ്ങൾക്ക് ആവശ്യമുള്ളതിലേക്ക് വിരൽ ചൂണ്ടാനും കഴിയുന്നത് എത്രത്തോളം പ്രധാനമാണെന്ന് അവൻ തിരിച്ചറിഞ്ഞു.

ഇതിനെല്ലാം പുറമെ, പണത്തിന്റെ കാര്യത്തിൽ വളരെ ശ്രദ്ധാലുവായ ലെഡ്ജർ, ആദ്യത്തെ നാല് ബാഗുകൾക്കുള്ള സാധനങ്ങൾ വാങ്ങുന്നതിനായി തന്റെ സ്വന്തം സമ്പാദ്യത്തിൽ നിന്ന് ഏകദേശം 100 ഡോളർ നൽകി.

താമസിയാതെ അവന്റെ കുടുംബവും, തുടർന്ന് അയൽക്കാരും, പള്ളികളും, സന്നദ്ധ സംഘടനകളും, ഈ ആശയത്തിന്റെ പ്രയോജനം തിരിച്ചറിഞ്ഞ രക്ഷാപ്രവർത്തകരും അവനോടൊപ്പം ചേർന്നു. ലെഡ്ജറിന്റെ അച്ഛൻ പറയുന്നതനുസരിച്ച്, ഈ പദ്ധതി ഒട്ടും അലക്ഷ്യമായല്ല അവൻ ചെയ്യുന്നത്: “അവന് ഇതിനായി ഒരു കൃത്യമായ രീതിയുണ്ട് (assembly line), എല്ലാം പൂർണ്ണതയോടെ തന്നെ ചെയ്യണമെന്ന് അവന് നിർബന്ധമാണ്.”

ഇന്ന് ആറ് അമേരിക്കൻ സംസ്ഥാനങ്ങളിലായി 475-ലധികം ബാഗുകൾ വിതരണം ചെയ്തു കഴിഞ്ഞു; മറ്റ് പല സമൂഹങ്ങളും ഇതിന്റെ മാതൃകയിൽ സ്വന്തമായി ബാഗുകൾ നിർമ്മിക്കാൻ തുടങ്ങിയിട്ടുണ്ട്. തീൻമേശയ്ക്ക് ചുറ്റുമിരുന്നുള്ള ഒരു സംഭാഷണത്തിൽ നിന്ന് പിറവിയെടുത്ത ഒരു ആശയത്തെയും, മകന്റെ വാക്കുകളെ ഗൗരവത്തോടെ കണ്ട മാതാപിതാക്കളെയും സംബന്ധിച്ചിടത്തോളം ഇത് വളരെ വലിയൊരു നേട്ടമാണ്.

സവിശേഷമായൊരു കവർ ബോയ്

ലെഡ്ജറിന്റെ ഈ നേട്ടം അവനെ ടൈം മാഗസിന്റെ കവർ പേജിൽ എത്തിച്ചിരിക്കുകയാണ്. ഈ അംഗീകാരം ആ കൊച്ചു കണ്ടുപിടുത്തക്കാരനെ അല്പം അദ്ഭുതപ്പെടുത്തിയിട്ടുണ്ട്. “രണ്ടുമൂന്ന് ബാഗുകൾ നൽകാം എന്നാണ് ഞാൻ കരുതിയിരുന്നത്, ഇത് ഇത്രത്തോളം വലിയ കാര്യമാകുമെന്ന് ഞാൻ അറിഞ്ഞിരുന്നില്ല,” അവൻ പ്രാദേശിക ടെലിവിഷൻ ചാനലായ സി.ബി.എസ് 6-നോട് (CBS 6) പറഞ്ഞു.

ഓട്ടിസം ബാധിതരായ കുട്ടികളെ വളർത്തുന്ന മറ്റ് കുടുംബങ്ങൾക്ക് ഈ അംഗീകാരം പ്രചോദനമാകുമെന്ന് അവന്റെ അച്ഛൻ പ്രതീക്ഷിക്കുന്നു. ജെ.ടി. പറഞ്ഞതുപോലെ, “ഓട്ടിസം സ്പെക്ട്രത്തിലുള്ള കുട്ടികൾക്ക് എന്തും ചെയ്യാൻ കഴിയും” എന്ന് ആളുകൾ കാണണമെന്ന് അദ്ദേഹം ആഗ്രഹിക്കുന്നു.

കണക്കും ലെഗോയും (LEGO) അമേരിക്കൻ ഫുട്ബോളും ഇഷ്ടപ്പെടുന്ന ലെഡ്ജറിന് ഇവിടെയൊന്നും നിർത്താൻ ഉദ്ദേശ്യമില്ല. രാജ്യത്തുടനീളമുള്ള അടിയന്തര സേവന വിഭാഗങ്ങളിലേക്ക് തന്റെ ബാഗുകൾ എത്തണമെന്നാണ് അവന്റെ ആഗ്രഹം. “ഇത് എല്ലായിടത്തും എത്തണമെന്നാണ് എന്റെ ആഗ്രഹം. അമേരിക്കയിൽ മുഴുവൻ!” അവൻ പ്രഖ്യാപിക്കുന്നു. അവൻ ആ ലക്ഷ്യം നേടുക തന്നെ ചെയ്യുമെന്ന് നമുക്കും പ്രതീക്ഷിക്കാം.

ഒൻപതാം വയസ്സിൽ തന്നെ, ഒരു കുട്ടിയുടെ അനുഭവങ്ങൾക്കും ആശയങ്ങൾക്കും സഹാനുഭൂതിക്കും വളരാൻ ഇടം നൽകിയാൽ എന്ത് സംഭവിക്കുമെന്ന് ലെഡ്ജർ കാണിച്ചുതന്നു. ടൈം മാഗസിന്റെ കവറിൽ പ്രത്യക്ഷപ്പെടുന്നത് വലിയൊരു നേട്ടമാണെങ്കിലും, ഭയന്നിരിക്കുന്ന ഒരു കുട്ടിക്ക് പെട്ടെന്ന് പരിചിതമായതോ ആശ്വാസം നൽകുന്നതോ ആയ ഒരു വസ്തു കൈയ്യിൽ കിട്ടുമ്പോൾ ആ കൊച്ചു ബാഗുകൾ അവരുടെ ജീവിതത്തിൽ ഉണ്ടാക്കുന്ന മാറ്റം ഒന്ന് സങ്കൽപ്പിച്ചു നോക്കൂ.

പത്ത് വയസ്സ് പോലും തികയാത്ത ഒരാളെ സംബന്ധിച്ചിടത്തോളം ഇത് തികച്ചും അവിസ്മരണീയമായ ഒരു നേട്ടം തന്നെയാണ്!

വായനക്കാരുടെ അഭിപ്രായങ്ങൾ ഇവിടെ എഴുതാവുന്നതാണ്.