
നവംബർ ആറു മുതൽ പതിനേഴുവരെ ലെയോ പതിനാലാമൻ പാപ്പ ഉറുഗ്വേ, അർജന്റീന, പെറു എന്നീ രാജ്യങ്ങൾ സന്ദർശിച്ചു. ലക്ഷക്കണക്കിന് വിശ്വാസികൾ പങ്കെടുത്ത വലിയ ചടങ്ങുകൾക്കിടയിലും, പാപ്പയുടെ ലാളിത്യവും സ്നേഹവും വിളിച്ചോതുന്ന നിരവധി ഹൃദയസ്പർശിയായ നിമിഷങ്ങൾ ഈ യാത്രയിലുണ്ടായി. അവയിൽ ശ്രദ്ധേയമായ ചില സംഭവങ്ങളിലൂടെ കടന്നുപോകാം.
1. പാപ്പയെ സന്തോഷിപ്പിച്ച ആലിംഗനം
ഉറുഗ്വേയിലെ സന്ദർശനത്തിനിടെ വീൽചെയറിൽ കഴിയുന്ന മഗ്ദലീന എന്ന നാലുവയസ്സുകാരി പാപ്പയെ കണ്ടയുടൻ കൈകൾ നീട്ടി. ഏറെ സന്തോഷത്തോടെ പാപ്പ അവളെ ചേർത്തുപിടിച്ച് ആലിംഗനം ചെയ്തത് ഏവരുടെയും കണ്ണ് നനയിച്ച സംഭവമായിരുന്നു.
2. കണ്ണുനീരിൽ കുതിർന്ന ഗാനം
മോന്തെവീദിയോയിലെ സ്റ്റേഡിയത്തിൽ നടന്ന യുവജന സംഗമത്തിൽ പ്രശസ്ത ഗായകൻ ലൂക്കാസ് സുഗോ ‘പെസ്കഡോർ ഡി ഹോംബ്രെസ്’ (മനുഷ്യരെ പിടിക്കുന്നവർ) എന്ന ഗാനം ആലപിച്ചു. അടുത്തിടെ ക്യാൻസർ ബാധിച്ച് മരിച്ച തന്റെ 23 വയസ്സുള്ള മകളുടെ ഓർമ്മയിൽ ഗായകൻ വികാരാധീനനായാണ് ഈ ഗാനം പൂർത്തിയാക്കിയത്.
3. പിതാവിന്റെ ഓർമ്മകളിൽ പാപ്പ
ഉറുഗ്വേയിലെ സാന്താ തെരേസിറ്റ ഇടവകയിൽ പാപ്പ നടത്തിയ അപ്രതീക്ഷിത സന്ദർശനത്തിനിടെ വിശുദ്ധ കൊച്ചുത്രേസ്യയോട് വലിയ ഭക്തിയുണ്ടായിരുന്ന തന്റെ പിതാവ് ലൂയിസ് പ്രെവോസ്റ്റിനെ പാപ്പ സ്നേഹപൂർവം അനുസ്മരിച്ചു.
4. ഉറുഗ്വേയിലെ ബാർബിക്യൂ
ഉറുഗ്വേയുടെ തനത് ഭക്ഷണരീതിയായ ബാർബിക്യൂ തയ്യാറാക്കുകയായിരുന്ന അന്റോണിയോ എന്ന ഇടവകാംഗത്തെ പാപ്പ നേരിട്ട് ചെന്ന് കാണുകയും സൗഹൃദം പങ്കിടുകയും ചെയ്തു.
5. നിശബ്ദരായി മുട്ടുകുത്തി പ്രാർഥിച്ച 25 ലക്ഷം ജനങ്ങൾ!
അർജന്റീനയിൽ പാപ്പ അർപ്പിച്ച വിശുദ്ധ കുർബാനയിൽ ഏകദേശം 25 ലക്ഷം ആളുകൾ പങ്കെടുത്തു. വിശുദ്ധ കുർബാനയുടെ കൂദാശാവേളയിൽ, അൾത്താരയിൽ നിന്ന് കിലോമീറ്ററുകൾ അകലെ നിന്നവർ പോലും പൂർണ്ണ നിശബ്ദരായി മുട്ടുകുത്തി പ്രാർഥിച്ചത് അവിസ്മരണീയമായ കാഴ്ചയായിരുന്നു.
6. പാപ്പയ്ക്കായി ബിഷപ്പുമാരുടെ ഗാനം
ബ്യൂണസ് അയേഴ്സിലെ അത്താഴവിരുന്നിനിടെ അർജന്റീനയിലെ ബിഷപ്പുമാർ പ്രശസ്തമായ ‘വോൾവർ’ എന്ന ടാംഗോ ഗാനം പാപ്പയ്ക്കായി ആലപിച്ചു. പുഞ്ചിരിയോടെയാണ് പാപ്പ ആ സ്നേഹോപഹാരം സ്വീകരിച്ചത്.
7. “എനിക്കും ഉറങ്ങണം”
അർജന്റീനയിലെത്തിയ ആദ്യ രാത്രിയിൽ പാപ്പ താമസിക്കുന്ന സ്ഥലത്തിന് പുറത്ത് വിശ്വാസികൾ തടിച്ചുകൂടി. പുറത്തുവന്ന പാപ്പ അടുത്ത ദിവസം തിരക്കുള്ളതിനാൽ തനിക്ക് ഉറങ്ങണമെന്ന് കൈകൾ തലയിണ പോലെ മുഖത്ത് വച്ച് ആംഗ്യം കാണിച്ചത് ജനങ്ങളിൽ ചിരി പടർത്തി.
8. തെരുവിലെ കുമ്പസാരങ്ങൾ
അർജന്റീനയിലെ യുവജന സംഗമത്തിന് മുന്നോടിയായി, ബ്യൂണസ് അയേഴ്സിലെ തെരുവുകൾ കുമ്പസാരക്കൂടുകളായി മാറിയ കാഴ്ച അവിസ്മരണീയമായ അനുഭവമായിരുന്നു.
9. ബസ്സിന് തൊട്ടരികിലൂടെ കടന്നുപോയ പാപ്പ; അടുത്ത് കാണാനായതിന്റെ ആവേശത്തിൽ യാത്രക്കാർ
പെറുവിലെ ലിമയിൽ വിമാനത്താവളത്തിൽ നിന്ന് നഗരത്തിലേക്ക് പോകുമ്പോൾ പാപ്പയുടെ വാഹനം ഒരു പൊതുഗതാഗത ബസ്സിന് തൊട്ടടുത്തുകൂടി കടന്നുപോയി. ബസ്സിനുള്ളിലിരുന്ന് പാപ്പയെ അടുത്ത് കാണാനായതിന്റെ ആവേശത്തിലായിരുന്നു യാത്രക്കാർ.
10. പെറുവിന്റെ ദേശീയഗാനം ആലപിച്ച പാപ്പ
പാപ്പയാകുന്നതിന് മുൻപ് വർഷങ്ങളോളം മിഷനറിയായും ബിഷപ്പായും പെറുവിൽ സേവനമനുഷ്ഠിച്ച വ്യക്തിയാണ് ലെയോ പതിനാലാമൻ പാപ്പ. സ്വീകരണ ചടങ്ങിൽ പെറുവിന്റെ ദേശീയഗാനം മുഴങ്ങിയപ്പോൾ വികാരാധീനനായി പാപ്പയും അതേറ്റ് പാടി.
11. കാലത്തെ അതിജീവിച്ച സൗഹൃദം
ലെയോ പതിനാലാമൻ മാർപാപ്പയോട് ഏറ്റവും അടുപ്പം പുലർത്തുന്ന വ്യക്തികളിൽ ഒരാളാണ് മോൺസിഞ്ഞോർ എഡ്ഗാർഡ് റിമൈകുന. പരിശുദ്ധ പിതാവ് അദ്ദേഹത്തെ തന്റെ പ്രൈവറ്റ് സെക്രട്ടറിയായി തിരഞ്ഞെടുത്തു; എന്നാൽ ഇവരുടെ സൗഹൃദം ആരംഭിച്ചത് വത്തിക്കാനിൽ വച്ചല്ല, മറിച്ച് വർഷങ്ങൾക്ക് മുമ്പ് റിമൈകുന ഒരു സെമിനാരി വിദ്യാർഥിയായിരുന്ന കാലത്താണ്.
ഫാദർ റോബർട്ട് പ്രെവോസ്റ്റ് പെറുവിൽ തന്റെ വൈദിക ശുശ്രൂഷ നിർവഹിച്ചിരുന്ന സമയത്താണ് ഇരുവരും കണ്ടുമുട്ടിയത്. പിന്നീട്, ‘ഡിക്കാസ്റ്ററി ഫോർ ബിഷപ്പ്സിന്റെ’ (Dicastery for Bishops) പ്രീഫെക്റ്റ് സ്ഥാനം ഏറ്റെടുക്കുന്നതിനായി വത്തിക്കാനിലേക്ക് വിളിക്കപ്പെട്ടപ്പോൾ, അദ്ദേഹം ഫാദർ റിമൈകുനയെയും തന്നോടൊപ്പം കൂട്ടി.
12. വിവാഹത്തിന് മുൻപുള്ള ആശീർവാദം
വിവാഹത്തിന് ദിവസങ്ങൾ മാത്രം ബാക്കിനിൽക്കെ, വധുവിന്റെ വേഷമണിഞ്ഞ് വഴിയരികിൽ കാത്തുനിന്ന സെലീൻ എന്ന യുവതിയെ പാപ്പ വാഹനത്തിലിരുന്ന് കാണുകയും ആശീർവദിക്കുകയും ചെയ്തു.
13. ചിക്ലായോയിലെ സെമിനാരി വിദ്യാർഥികൾ
പാപ്പ മുൻപ് ബിഷപ്പായിരുന്ന ചിക്ലായോയിലെ സെമിനാരിയിൽ പാപ്പ വീണ്ടുമെത്തി. തങ്ങളുടെ പ്രിയപ്പെട്ട ബിഷപ്പ് പാപ്പയായപ്പോൾ ആഘോഷിച്ച അതേ വിദ്യാർഥികളെ നേരിൽ കണ്ട് അനുഗ്രഹിച്ചു.
14. പാപ്പയുടെ ആത്മീയ പുത്രി
പെറുവിൽ മിഷനറിയായിരുന്ന കാലത്ത് താൻ ജ്ഞാനസ്നാനം നൽകിയ മിൽഡ്രഡ് എന്ന യുവതിയെയും അവളുടെ പിതാവ് ഹെക്ടർ കാമാച്ചോയെയും വലിയ ജനക്കൂട്ടത്തിനിടയിലും പാപ്പ തിരിച്ചറിഞ്ഞു. പഴയ സുഹൃത്തിന്റെ ശബ്ദം തിരിച്ചറിഞ്ഞ പാപ്പ, അദ്ദേഹത്തിന്റെ മകളുടെ വിശേഷങ്ങൾ ചോദിച്ചറിഞ്ഞത് ആ പഴയ ആത്മബന്ധത്തിന്റെ തെളിവായി.




