ലോക ജനസംഖ്യയുടെ 7.8% വരുന്ന 64.5 കോടി ആളുകൾ 2025-ൽ പട്ടിണി നേരിട്ടതായി യുഎൻ റിപ്പോർട്ട് വെളിപ്പെടുത്തുന്നു. അഞ്ച് ഐക്യരാഷ്ട്രസഭാ (UN) ഏജൻസികൾ സംയുക്തമായി തയ്യാറാക്കിയ ‘ദി സ്റ്റേറ്റ് ഓഫ് ഫുഡ് സെക്യൂരിറ്റി ആൻഡ് ന്യൂട്രിഷൻ ഇൻ ദി വേൾഡ്’ (SOFI) റിപ്പോർട്ട് പ്രകാരം, കഴിഞ്ഞ വർഷം ലോകജനസംഖ്യയുടെ എട്ട് ശതമാനത്തോളം ആളുകൾ പട്ടിണി അനുഭവിച്ചു. ചില പുരോഗതികൾ ഉണ്ടായിട്ടുണ്ടെങ്കിലും, ആഗോളതലത്തിൽ ഇപ്പോഴും 65 കോടിയോളം ആളുകളെ ഈ പ്രതിസന്ധി ബാധിക്കുന്നുണ്ടെന്ന് റിപ്പോർട്ട് വ്യക്തമാക്കുന്നു.
2024-നെ അപേക്ഷിച്ച് പട്ടിണി അനുഭവിക്കുന്നവരുടെ എണ്ണത്തിൽ 1.4 കോടിയുടെയും, ഉയർന്ന നിരക്കിലായിരുന്ന 2022-നെ അപേക്ഷിച്ച് 4.3 കോടിയുടെയും കുറവുണ്ടായതായി എഫ്.എ.ഒ വ്യക്തമാക്കി. തെക്കേ അമേരിക്കയിലും തെക്കൻ ഏഷ്യയിലും ഭക്ഷ്യസുരക്ഷയിൽ കാര്യമായ പുരോഗതിയുണ്ടായിട്ടുണ്ട്.
എന്നിരുന്നാലും, ഭൗമരാഷ്ട്രീയ സംഘർഷങ്ങളും കാലാവസ്ഥാ വ്യതിയാനങ്ങളും ആഗോള ഭക്ഷ്യശൃംഖലയെ ബാധിക്കാനിടയുള്ളതിനാൽ അടിയന്തര നടപടികൾ ആവശ്യമാണെന്ന് യുഎൻ ഏജൻസികൾ മുന്നറിയിപ്പ് നൽകുന്നു.
അതേസമയം, ഇന്ധനവും കാർഷികോൽപന്നങ്ങളും കടത്തിവിടുന്ന പ്രധാന പാതയായ ഹോർമുസ് കടലിടുക്കിലെ തടസ്സങ്ങൾ വലിയ ആശങ്കയുണ്ടാക്കുന്നതായി എഫ്.എ.ഒ ചീഫ് ഇക്കണോമിസ്റ്റ് മാക്സിമോ ടോറെറോ പറഞ്ഞു. ആഫ്രിക്കയിൽ 30.9 കോടി ആളുകൾ (അഞ്ചിൽ ഒരാൾ വീതം) പോഷകാഹാരക്കുറവ് അനുഭവിക്കുന്നു. ജനസംഖ്യാ വർധനവ് കാരണം വരും വർഷങ്ങളിൽ ഇത് ഇനിയും ഉയർന്നേക്കാം. 2024-ൽ 20.3 ശതമാനമായിരുന്ന പട്ടിണിനിരക്ക് 2025-ൽ 20.0 ശതമാനമായി കുറഞ്ഞിട്ടുണ്ട്. 2017-ന് ശേഷം ആദ്യമായാണ് ഇവിടെ പട്ടിണി നിരക്കിൽ കുറവ് രേഖപ്പെടുത്തുന്നത്.
2030 ആകുമ്പോഴും ലോകത്ത് ഏകദേശം 52 കോടി ആളുകൾ പട്ടിണിയിലായിരിക്കാൻ സാധ്യതയുണ്ട്. ഇത് യുഎന്നിന്റെ പട്ടിണിരഹിത ലോകം എന്ന ലക്ഷ്യത്തിന് തിരിച്ചടിയാണ്. ഭക്ഷ്യ-കാർഷിക വിപണികൾ തുറന്നുനൽകുക, കയറ്റുമതി നിയന്ത്രണങ്ങൾ ഒഴിവാക്കുക, പാർശ്വവൽക്കരിക്കപ്പെട്ടവർക്കായുള്ള സാമൂഹിക സംരക്ഷണ പദ്ധതികൾ ശക്തിപ്പെടുത്തുക എന്നിവ ഏജൻസികൾ നിർദേശിക്കുന്നു.
വിത്തുവിതയ്ക്കൽ ഘട്ടത്തിന് മുൻപ് തന്നെ കർഷകർക്ക് വളം, മികച്ച വിത്തുകൾ, വെള്ളം, വായ്പ എന്നിവ ലഭ്യമാക്കണമെന്ന് സർക്കാരുകളോട് യുഎൻ അഭ്യർഥിച്ചു. കൂടാതെ, ജലസേചനം, കോൾഡ് സ്റ്റോറേജ്, ഗതാഗതം, മുൻകൂർ മുന്നറിയിപ്പ് സംവിധാനങ്ങൾ എന്നിവയിൽ ദീർഘകാല നിക്ഷേപം നടത്തുന്നത് പോഷകാഹാര ലഭ്യത വർധിപ്പിക്കാനും ചെലവുകൾ കുറയ്ക്കാനും സഹായിക്കും.
