വിശുദ്ധ ഷാർബേൽ മഖ്‌ലൂഫ്: ഇന്നും ലോകത്തോട് സംസാരിക്കുന്ന അദ്ഭുതങ്ങളുടെ നിശ്ശബ്ദ സന്ന്യാസി

കത്തോലിക്കാ സഭ ഇതുവരെ ഔദ്യോഗിമായി 33,000 ൽ കൂടുതൽ അദ്ഭുതങ്ങൾ വിശുദ്ധ ഷാർബേൽ മഖ്‌ലൂഫ് എന്ന വിശുദ്ധന്റെ പേരിൽ അംഗീകരിച്ചട്ടുണ്ട്. ഇന്ന് അദ്ദേഹത്തിന്റെ തിരുനാൾ ദിനമാണ്. “ലോകത്തിൽ നിന്ന് മറഞ്ഞ് ജീവിച്ച ഒരു സന്ന്യാസി, ലോകമെമ്പാടുമുള്ള കോടിക്കണക്കിനു മനുഷ്യരുടെ പ്രത്യാശയായി മാറി.” ചരിത്രത്തിൽ അനേകം വിശുദ്ധന്മാർ ലോകത്തെ സ്വാധീനിച്ചിട്ടുണ്ട്. ചിലർ ഉജ്വലമായ പ്രസംഗങ്ങളിലൂടെ, ചിലർ മഹത്തായ സേവനപ്രവർത്തനങ്ങളിലൂടെ, ചിലർ രക്തസാക്ഷിത്വത്തിലൂടെ. എന്നാൽ ലോകത്തോട് ഒന്നും പറയാതെ നിശ്ശബ്ദതയെത്തന്നെ തന്റെ ഭാഷയാക്കിയ ഒരു സന്ന്യാസിയുണ്ട്. ആ നിശ്ശബ്ദത ഇന്നും ലോകമെമ്പാടും മുഴങ്ങിക്കൊണ്ടിരിക്കുന്നു. ആ വിശുദ്ധനാണ് വിശുദ്ധ ഷാർബേൽ മഖ്‌ലൂഫ്.

ഇന്ന് അദ്ദേഹത്തിന്റെ കബറിടത്തിലേക്ക് ഒഴുകിയെത്തുന്നത് ലെബനോനിൽ നിന്നുള്ളവർ മാത്രമല്ല, വിവിധ മതങ്ങളിലും രാജ്യങ്ങളിലുമുള്ള ലക്ഷക്കണക്കിന് മനുഷ്യരാണ്. അവരെല്ലാം ഒരേ വിശ്വാസത്തോടെയാണ് എത്തുന്നത്-ദൈവം ഇന്നും തന്റെ വിശുദ്ധനിലൂടെ അദ്ഭുതങ്ങൾ പ്രവർത്തിക്കുന്നു എന്ന വിശ്വാസത്തോടെ.

മലമുകളിലെ ഗ്രാമത്തിലുദിച്ച വിശുദ്ധൻ

1828 മെയ് എട്ടിന് ലെബനോനിലെ മനോഹരമായ മലനിരകളിൽ സ്ഥിതിചെയ്യുന്ന ബെകാഅ്‌കഫ്ര എന്ന കൊച്ചുഗ്രാമത്തിലാണ് യൂസഫ് അന്റൂൺ മഖ്‌ലൂഫ് ജനിച്ചത്. ഒരു കർഷക കുടുംബമായിരുന്നു അദ്ദേഹത്തിന്റേത്. സമ്പത്ത് കുറവായിരുന്നെങ്കിലും വിശ്വാസത്തിന്റെ സമ്പത്ത് ആ കുടുംബത്തിൽ ധാരാളമുണ്ടായിരുന്നു.

മൂന്നാം വയസ്സിൽ തന്നെ പിതാവിനെ നഷ്ടപ്പെട്ട യൂസഫിനെ ദൈവഭക്തിയിൽ വളർത്തിയത് അമ്മയായിരുന്നു. ബാല്യത്തിൽ ആടുകളെ മേയ്ക്കുമ്പോൾ, ആട്ടിൻകൂട്ടം വിശ്രമിക്കുന്ന നേരം സമീപത്തുള്ള ഒരു ഗുഹയിൽ കയറി പരിശുദ്ധ അമ്മയുടെ സന്നിധിയിൽ മുട്ടുകുത്തി പ്രാർഥിക്കുമായിരുന്നു അവൻ. മറ്റു കുട്ടികൾ കളിച്ചുനടന്ന പ്രായത്തിൽ ഈ ബാലൻ ദൈവത്തോടൊപ്പം സമയം ചെലവഴിക്കുകയായിരുന്നു. ആ ഗുഹയിൽ ആരംഭിച്ച പ്രാർഥന പിന്നീട് ലോകത്തെ അദ്ഭുതപ്പെടുത്തിയ വിശുദ്ധിയുടെ പാതയായി മാറി.

എല്ലാം ഉപേക്ഷിച്ച് ദൈവത്തെ തിരഞ്ഞെടുത്ത യുവാവ്

കുടുംബം അദ്ദേഹത്തെ വിവാഹം കഴിപ്പിച്ച് നാട്ടിൽ തന്നെ നിർത്താൻ ആഗ്രഹിച്ചെങ്കിലും, യൂസഫിന്റെ ഹൃദയം മറ്റൊരു വിളി കേട്ടു; ദൈവത്തിന് പൂർണ്ണമായി സ്വന്തമാകാനുള്ള വിളി. ഇരുപതാം വയസ്സിൽ അദ്ദേഹം ലെബനീസ് മറോനൈറ്റ് സന്ന്യാസ സഭയിലെ മെയ്‌ഫൂക്ക് ആശ്രമത്തിൽ ചേർന്നു. അവിടെ രണ്ടാം നൂറ്റാണ്ടിലെ രക്തസാക്ഷിയായ വിശുദ്ധ ഷാർബേലിന്റെ നാമം സ്വീകരിച്ചു. സന്ന്യാസജീവിതത്തിൽ അദ്ദേഹം ആരെയും വിസ്മയിപ്പിച്ചത് അസാധാരണ കഴിവുകൾ കൊണ്ടല്ല; അസാധാരണമായ വിനയവും അനുസരണവും കൊണ്ടാണ്.

ഏതു ജോലിയും അദ്ദേഹം സന്തോഷത്തോടെ ഏറ്റെടുത്തു. അടുക്കളയിലായാലും വയലിലായാലും പ്രാർഥനാമുറിയിലായാലും അതെല്ലാം അദ്ദേഹത്തിന് ദൈവസേവനമായിരുന്നു. 1859 ജൂലൈ 23 ന് അദ്ദേഹം വൈദികപട്ടം സ്വീകരിച്ചു. തുടർന്ന് അന്നായയിലെ വിശുദ്ധ മാറോൻ ആശ്രമത്തിൽ 16 വർഷം വിശുദ്ധജീവിതം നയിച്ചു.

വെള്ളം കൊണ്ട് കത്തിയ വിളക്ക്

ഏകാന്തതയിൽ ദൈവത്തോടൊപ്പം ജീവിക്കാൻ ഷാർബേലിന്റെ ഹൃദയം കൊതിച്ചു. അതിനാൽ ആശ്രമത്തിനടുത്തുള്ള ഹെർമിറ്റേജിലേക്ക് (ഏകാന്തവാസ കേന്ദ്രത്തിലേക്ക്) മാറാൻ അദ്ദേഹം അപേക്ഷിച്ചു. എന്നാൽ, മേലധികാരികൾക്ക് ഉടനടി തീരുമാനമെടുക്കാൻ കഴിഞ്ഞില്ല. ദൈവഹിതമറിയാൻ അവർ പ്രാർഥിച്ചു. അന്ന് രാത്രി ഒരു അദ്ഭുതം സംഭവിച്ചു. ഷാർബേലിന്റെ മുറിയിൽ കത്തിക്കൊണ്ടിരുന്ന വിളക്കിൽ എണ്ണയായിരുന്നില്ല, വെള്ളമായിരുന്നു. എന്നിട്ടും അത് പ്രകാശത്തോടെ ജ്വലിച്ചു. ഇത് ദൈവത്തിന്റെ വ്യക്തമായ അടയാളമാണെന്ന് മനസ്സിലാക്കിയ മേലധികാരികൾ 1875 ഫെബ്രുവരി 15 ന് അദ്ദേഹത്തിന് ഹെർമിറ്റേജിലേക്ക് പോകാൻ അനുമതി നൽകി. ആ ദിവസം ലോകത്തിന് ഒരു സന്ന്യാസിയെ നഷ്ടമായി; സ്വർഗത്തിന് ഒരു വിശുദ്ധൻ കൂടുതലായി ലഭിക്കുകയും ചെയ്തു.

നിശ്ശബ്ദതയിൽ എഴുതപ്പെട്ട വിശുദ്ധിയുടെ മഹാകാവ്യം

തുടർന്നുള്ള 23 വർഷം വിശുദ്ധ ഷാർബേൽ ലോകത്തിന്റെ കണ്ണിൽപെടാതെ ജീവിച്ചു. പ്രാർഥന, ഉപവാസം, കഠിനാധ്വാനം, മൗനം, ദിവ്യകാരുണ്യാരാധന-ഇവയായിരുന്നു അദ്ദേഹത്തിന്റെ ജീവിതത്തിന്റെ അഞ്ച് അടിസ്ഥാനസ്തംഭങ്ങൾ. മണിക്കൂറുകളോളം മുട്ടുകുത്തി ദിവ്യകാരുണ്യനാഥന്റെ മുൻപിൽ ആരാധനയിൽ അദ്ദേഹം മുഴുകിയിരുന്നു. അത്യാവശ്യമെങ്കിൽ മാത്രമേ സംസാരിക്കുമായിരുന്നുള്ളൂ; അതും ചുരുക്കം വാക്കുകളിൽ. എന്നാൽ, ആ വാക്കുകൾ സ്നേഹവും സമാധാനവും നിറഞ്ഞതായിരുന്നു. ലോകം അദ്ദേഹത്തെ മറന്നിരിക്കാം. എന്നാൽ ദൈവം തന്റെ വിശുദ്ധനെ ലോകത്തിനു വേണ്ടി ഒരുക്കുകയായിരുന്നു അപ്പോൾ.

കുർബാനയിൽ ആരംഭിച്ച് കുർബാനയിൽ അവസാനിച്ച ജീവിതം

1898 ഡിസംബർ 16 ന് വിശുദ്ധ കുർബാന അർപ്പിക്കുന്നതിനിടെ അദ്ദേഹത്തിന് പക്ഷാഘാതം സംഭവിച്ചു. എട്ട് ദിവസം മരണശയ്യയിൽ കിടന്ന അദ്ദേഹം അവസാനശ്വാസം വരെയും കുർബാനയിലെ പ്രാർഥനകൾ ഉരുവിട്ടുകൊണ്ടിരുന്നു. അദ്ദേഹത്തിന്റെ അധരങ്ങളിൽ നിരന്തരം മുഴങ്ങിയ വാക്കുകൾ ഇവയായിരുന്നു: “അബൂ ത്‌ക്കോഷ്തോ” – “പരിശുദ്ധ പിതാവേ!”

ക്രിസ്തുമസ് തലേന്നായ 1898 ഡിസംബർ 24 ന് അദ്ദേഹം നിത്യസമ്മാനത്തിനായി  യാത്രയായി. ഒരു വിശുദ്ധന്റെ ഭൗമികജീവിതം അവസാനിച്ചു. എന്നാൽ, അദ്ഭുതങ്ങളുടെ ചരിത്രം അവിടെ ആരംഭിച്ചു.

ഇന്നും അദ്ഭുതങ്ങൾ ഒഴുകുന്ന കബറിടം

സംസ്കാരത്തിനു ശേഷം അദ്ദേഹത്തിന്റെ കബറിടത്തിനു മുകളിൽ പ്രകാശം തെളിഞ്ഞതായി പലരും സാക്ഷ്യപ്പെടുത്തി. പിന്നീട് കല്ലറ തുറന്നപ്പോൾ ശരീരം അദ്ഭുതകരമായി കേടുകൂടാതെ സൂക്ഷിക്കപ്പെട്ട നിലയിൽ കണ്ടെത്തി. 1950 ലും 1952 ലും ശരീരം വീണ്ടും പരിശോധിച്ചപ്പോഴും അത് കേടുപാടുകളില്ലാതെയും വഴക്കമുള്ളതുമായി തുടർന്നു. അന്നായയിലെ വിശുദ്ധ ഷാർബേലിന്റെ കബറിടം പിന്നീട് ലോകത്തിലെ ഏറ്റവും വലിയ തീർഥാടനകേന്ദ്രങ്ങളിലൊന്നായി മാറി. ഇന്നുവരെ മുപ്പത്തിമൂവായിരത്തിലധികം അദ്ഭുതകരമായ രോഗശാന്തികൾ അദ്ദേഹത്തിന്റെ മാധ്യസ്ഥത്തിലൂടെ ലഭിച്ചതായി രേഖപ്പെടുത്തിയിട്ടുണ്ട്.

ആധുനിക കാലത്തെ ഒരു അദ്ഭുതം

2023 ൽ തെരേസ യൂസഫ് അൽ-ഖൗരി ഫഹ്ദിന് മസ്തിഷ്കത്തിൽ വലിയൊരു മുഴ കണ്ടെത്തി. ശസ്ത്രക്രിയ മാത്രമാണ് പോംവഴിയെന്ന് ഡോക്ടർമാർ വിധിയെഴുതി. നിരാശയോടെ അവർ അന്നായയിലെ വിശുദ്ധ ഷാർബേലിന്റെ കബറിടത്തിലെത്തി. വിശ്വാസത്തോടെ പ്രാർഥിച്ചു, കബറിടത്തിലെ മണ്ണ് ഭക്തിയോടെ സ്വീകരിച്ചു, അനുഗ്രഹീത എണ്ണയും ഉപയോഗിച്ചു. തുടർന്ന് നടത്തിയ പരിശോധനയിൽ ഡോക്ടർമാർ പോലും വിസ്മയിച്ചു-മുഴ പൂർണ്ണമായും അപ്രത്യക്ഷമായിരുന്നു. ദൈവം തന്റെ വിശുദ്ധന്റെ മാധ്യസ്ഥത്തിലൂടെ ഇന്നും പ്രവർത്തിക്കുന്നു എന്നതിന് അതൊരു പുതിയ തെളിവായി മാറി.

ലോകത്തിനാകെയുള്ള വിശുദ്ധൻ

1965 ഡിസംബർ അഞ്ചിന് വിശുദ്ധ പോൾ ആറാമൻ മാർപാപ്പ ഷാർബേലിനെ വാഴ്ത്തപ്പെട്ടവനായി പ്രഖ്യാപിച്ചു. 1977 ഡിസംബർ ഒൻപതിന് റോമിലെ വിശുദ്ധ പത്രോസിന്റെ ബസിലിക്കയിൽ അദ്ദേഹം വിശുദ്ധനായി പ്രഖ്യാപിക്കപ്പെട്ടു. ഇന്ന് അദ്ദേഹം ലെബനോന്റെ മധ്യസ്ഥവിശുദ്ധനാണ്. എന്നാൽ യഥാർഥത്തിൽ അദ്ദേഹം മുഴുവൻ ലോകത്തിന്റെയും വിശുദ്ധനാണ്.

വിശുദ്ധ ഷാർബേൽ: ഇന്നത്തെ ലോകത്തിനും സംസാരിക്കുന്ന വിശുദ്ധൻ

വിശുദ്ധ ഷാർബേലിന്റെ വിശുദ്ധി കാലാതീതമാണെന്ന് വീണ്ടും ലോകത്തെ ഓർമ്മിപ്പിച്ച ഒരു സുപ്രധാന സംഭവം 2025 ഡിസംബർ ഒന്നിന് നടന്നു. ലെബനോനിലേക്കുള്ള തന്റെ അപ്പസ്തോലിക സന്ദർശനത്തിന്റെ രണ്ടാം ദിവസം പരിശുദ്ധ പിതാവ് ലെയോ പതിനാലാമൻ മാർപാപ്പ അന്നായയിലെ വിശുദ്ധ ഷാർബേലിന്റെ കബറിടത്തിൽ പ്രാർഥിക്കാനെത്തി. അവിടെ ദീർഘനേരം വ്യക്തിപരമായ പ്രാർഥനയിൽ അദ്ദേഹം മുഴുകി. ലെബനീസ് മറോനൈറ്റ് സന്ന്യാസ സഭയുടെ സുപ്പീരിയർ ജനറലിന്റെ സ്വീകരണത്തിനു ശേഷം വിശുദ്ധ ഷാർബേലിന്റെ ജീവിതസാക്ഷ്യത്തെക്കുറിച്ച് ഹൃദയസ്പർശിയായ ഒരു സന്ദേശം അദ്ദേഹം നൽകി. അന്ന് വൈകുന്നേരം ലെബനോനിലെ യുവജനങ്ങളോട് സംസാരിക്കുമ്പോഴും അദ്ദേഹം വീണ്ടും വിശുദ്ധ ഷാർബേലിനെ മാതൃകയായി ചൂണ്ടിക്കാട്ടി.

വിശുദ്ധ ഷാർബേൽ ഒരു ഗ്രന്ഥവും രചിച്ചിട്ടില്ല. ലോകത്തിന്റെ ശ്രദ്ധയിൽ നിന്നകന്ന്, അന്നായയിലെ മലമുകളിലുള്ള ചെറിയ ഹെർമിറ്റേജിൽ നിശ്ശബ്ദമായി ജീവിച്ച വ്യക്തിയായിരുന്നു അദ്ദേഹം. എന്നിട്ടും അദ്ദേഹത്തിന്റെ ജീവിതം ലോകത്തോട് പറഞ്ഞ സന്ദേശം അനന്തമായ ആഴമുള്ളതാണെന്ന് ലെയോ പതിനാലാമൻ ഊന്നിപ്പറഞ്ഞു. മാർപാപ്പയുടെ വാക്കുകളിൽ, പരിശുദ്ധാത്മാവ് വിശുദ്ധ ഷാർബേലിനെ ലോകത്തിന് നാല് മഹത്തായ ജീവിതപാഠങ്ങൾ പഠിപ്പിക്കാൻ വേണ്ടി രൂപപ്പെടുത്തി:

“ദൈവമില്ലാതെ ജീവിക്കുന്നവരെ പ്രാർഥിക്കാൻ പഠിപ്പിക്കാൻ, ശബ്ദകോലാഹലങ്ങളിൽ മുങ്ങിക്കിടക്കുന്നവരെ നിശ്ശബ്ദതയുടെ മൂല്യം പഠിപ്പിക്കാൻ, ആഡംബരത്തിൽ ജീവിക്കുന്നവരെ എളിമയിലേക്കു നയിക്കാൻ, സമ്പത്തിനെ പിന്തുടരുന്നവരെ ദാരിദ്ര്യത്തിന്റെ സുവിശേഷം പഠിപ്പിക്കാൻ.” ഈ നാല് മൂല്യങ്ങളും ഇന്നത്തെ ലോകത്തിന്റെ ചിന്താഗതിക്ക് വിരുദ്ധമാണെന്ന് മാർപാപ്പ ചൂണ്ടിക്കാട്ടി. എന്നാൽ, അതുതന്നെയാണ് അവയുടെ സൗന്ദര്യമെന്നും അദ്ദേഹം കൂട്ടിച്ചേർത്തു. മരുഭൂമിയിൽ ദാഹിച്ചു നടക്കുന്ന ഒരാളെ ശുദ്ധജലം ആകർഷിക്കുന്നതു പോലെ, ആത്മീയദാഹം അനുഭവിക്കുന്ന ഇന്നത്തെ മനുഷ്യനെ വിശുദ്ധ ഷാർബേലിന്റെ ജീവിതം ആകർഷിക്കുന്നു.

തുടർന്ന് ലെയോ പാപ്പ പറഞ്ഞു: “വിശുദ്ധ ഷാർബേലിന്റെ അചഞ്ചലമായ വിശ്വാസവും സമൂലവും അതേസമയം അത്യന്തം വിനീതവുമായ ജീവിതവും എല്ലാ ക്രൈസ്തവർക്കുമുള്ള ശക്തമായ സന്ദേശമാണ്. ഭൂമിയിൽ ജീവിച്ചിരുന്ന കാലത്ത് തന്നെ അനേകർ ആശ്വാസത്തിനും പാപമോചനത്തിനും ദൈവഹിതമറിയുന്നതിനുമായി അദ്ദേഹത്തെ സമീപിച്ചിരുന്നു. എന്നാൽ, അദ്ദേഹത്തിന്റെ മരണശേഷം ആ പ്രവർത്തനം അവസാനിച്ചില്ല, മറിച്ച് ദൈവകാരുണ്യത്തിന്റെ ഒഴുകുന്ന ഒരു മഹാനദിപോലെ അത് ലോകമെമ്പാടും വ്യാപിച്ചു.”

ഈ വാക്കുകൾ വിശുദ്ധ ഷാർബേലിന്റെ ജീവിതത്തിന്റെ സാരാംശം തന്നെയാണ്. അദ്ദേഹം വേദികളിൽ നിന്ന് പ്രസംഗിച്ചില്ല. ഗ്രന്ഥങ്ങൾ എഴുതിയില്ല. പ്രശസ്തി തേടിയില്ല. എന്നാൽ അദ്ദേഹത്തിന്റെ നിശ്ശബ്ദജീവിതം ഇന്നും ലോകമെമ്പാടുമുള്ള കോടിക്കണക്കിന് മനുഷ്യരെ പ്രാർഥനയിലേക്കും വിശുദ്ധിയിലേക്കും നയിച്ചുകൊണ്ടിരിക്കുന്നു. ഇന്നത്തെ മനുഷ്യന് വിശുദ്ധ ഷാർബേൽ നൽകുന്ന സന്ദേശം വളരെ ലളിതമാണ്:

ശബ്ദത്തിൽ നിന്ന് നിശ്ശബ്ദതയിലേക്ക്…
സ്വാർഥതയിൽ നിന്ന് സമർപ്പണത്തിലേക്ക്…
ആഡംബരത്തിൽ നിന്ന് എളിമയിലേക്ക്…
ഭൗതികസമ്പത്തിൽ നിന്ന് ദൈവസമ്പത്തിലേക്ക്…
പ്രാർഥനയിൽ നിന്ന് വിശുദ്ധിയിലേക്ക്…

ഇതാണ് വിശുദ്ധ ഷാർബേലിന്റെ ജീവിതം. ഇതാണ് അദ്ദേഹത്തിന്റെ അദ്ഭുതങ്ങളുടെ യഥാർഥ ഉറവിടം. ഇതാണ് ഇന്നും ലോകത്തെ മാറ്റിമറിച്ചുകൊണ്ടിരിക്കുന്ന അദ്ദേഹത്തിന്റെ നിശ്ശബ്ദ സുവിശേഷം.

വിശുദ്ധ ഷാർബേൽ ഇന്നും നമ്മോട് പറയുന്നത്, വിശുദ്ധ ഷാർബേലിന്റെ ഏറ്റവും വലിയ അദ്ഭുതം രോഗശാന്തികളല്ല, ദൈവത്തെ പൂർണ്ണമായി സ്നേഹിച്ച ഒരു മനുഷ്യജീവിതമാണ്. ലോകം പ്രശസ്തരാകാൻ നമ്മെ പഠിപ്പിക്കുന്നു; വിശുദ്ധ ഷാർബേൽ വിശുദ്ധരാകാൻ പഠിപ്പിക്കുന്നു. ലോകം സംസാരിക്കാൻ പഠിപ്പിക്കുന്നു; അദ്ദേഹം നിശ്ശബ്ദമായി പ്രാർഥിക്കാൻ പഠിപ്പിക്കുന്നു. ലോകം സമ്പത്ത് ശേഖരിക്കാൻ പഠിപ്പിക്കുന്നു; അദ്ദേഹം ദൈവത്തെ സ്വന്തമാക്കാൻ പഠിപ്പിക്കുന്നു. അദ്ദേഹത്തിന്റെ ജീവിതം ഓരോ വിശ്വാസിയോടും ഒരേയൊരു സന്ദേശമാണ് നൽകുന്നത്: “ദൈവത്തോട് അടുത്തുചെല്ലുക. പ്രാർഥനയിൽ ജീവിക്കുക. ദിവ്യകാരുണ്യനാഥനെ സ്നേഹിക്കുക. അപ്പോൾ ദൈവം നിങ്ങളുടെ ജീവിതത്തെയും തന്റെ കൃപയുടെ അദ്ഭുതമാക്കി മാറ്റും.”

അതുകൊണ്ടാണ് വിശുദ്ധ ഷാർബേൽ ഇന്നും ലോകമെമ്പാടുമുള്ള അനേകം ഹൃദയങ്ങളിൽ പ്രത്യാശയുടെ ദീപമായി ജ്വലിക്കുന്നത്. അദ്ദേഹത്തിന്റെ നിശ്ശബ്ദ ജീവിതം ഇന്നും ആയിരക്കണക്കിന് പ്രസംഗങ്ങളേക്കാൾ ശക്തമായി മനുഷ്യഹൃദയങ്ങളോട് സംസാരിച്ചുകൊണ്ടിരിക്കുന്നു.

ഫാ. ജയ്സൺ കുന്നേൽ MCBS