ലോകത്തെ ഒന്നാകെ നടുക്കിയ സെപ്റ്റംബർ 11 (9/11) ഭീകരാക്രമണത്തിന് കാൽ നൂറ്റാണ്ട് (25 വർഷം) തികയുമ്പോഴും അമേരിക്കൻ പ്രതിരോധ ആസ്ഥാനമായ പെന്റഗണിൽ കത്തോലിക്കാ വിശ്വാസ സമൂഹം വിശുദ്ധ കുർബാനയും പ്രാർഥനകളും തുടരുന്നു. 2001 സെപ്റ്റംബർ 11-ന് വിമാനം ഇടിച്ചുകയറി തകർന്ന പെന്റഗണിന്റെ അതേ ഭാഗത്ത് നിർമ്മിച്ച ചാപ്പലിൽ ദിവസവും ദിവ്യബലി തടസ്സമില്ലാതെ തുടരുകയാണ്.
2001 സെപ്റ്റംബർ 11 രാവിലെ 9:37-നാണ് അമേരിക്കൻ എയർലൈൻസിന്റെ ഫ്ലൈറ്റ് 77 വിമാനം പെന്റഗണിലേക്ക് ഇടിച്ചുകയറിയത്. വിമാനത്തിലുണ്ടായിരുന്ന 59 പേരും പെന്റഗണിലെ 125 ജീവനക്കാരും ഉൾപ്പെടെ 184 പേർ അന്ന് അവിടെ കൊല്ലപ്പെട്ടു. ആക്രമണം നടന്ന് ഒരു വർഷത്തിന് ശേഷം, തകർന്ന ഭാഗത്ത് ‘പെന്റഗൺ മെമ്മോറിയൽ ചാപ്പൽ’ ആരംഭിച്ചു.
ആക്രമണത്തിൽ മരിച്ച 184 പേരുടെ ഓർമ്മയ്ക്കായി സ്റ്റെയിൻലെസ്സ് സ്റ്റീൽ ബെഞ്ചുകളും പ്രത്യേക പ്രാർഥനാ മുറിയും അടങ്ങുന്ന സ്മാരകം ചാപ്പലിന് സമീപമുണ്ട്. നിലവിൽ ഈ ചാപ്പലിൽ ദിവ്യകാരുണ്യം (Eucharist) 24 മണിക്കൂറും സൂക്ഷിച്ചിരിക്കുന്നു. പെന്റഗൺ കത്തോലിക്കാ കമ്മ്യൂണിറ്റിയിൽ മിലിട്ടറി ജീവനക്കാരും സാധാരണക്കാരുമായി 175-ഓളം അംഗങ്ങളുണ്ട്. എല്ലാ പ്രവൃത്തിദിവസങ്ങളിലും രാവിലെ 11:30-ന് വിശുദ്ധ കുർബാനയും കുമ്പസാരവും നടക്കുന്നു. ഡോമിനിക്കൻ വൈദികരും മരിയൻ ഫാദേഴ്സുമാണ് ഇവിടുത്തെ ദിവ്യബലികൾക്ക് നേതൃത്വം നൽകുന്നത്.
9/11 ആക്രമണത്തിന്റെ വാർഷിക ദിനങ്ങളിൽ, ദുരന്തത്തിൽ ജീവൻ വെടിഞ്ഞവർക്കും രാജ്യത്തിന് വേണ്ടി ജീവൻ അർപ്പിച്ച സൈനികർക്കുമായി പ്രത്യേക പ്രാർഥനകൾ ചാപ്പലിൽ നടക്കുന്നു. ഒരു വമ്പൻ ഭീകരാക്രമണത്തിന്റെ കറുത്ത ഓർമ്മകൾ അവശേഷിക്കുന്ന മണ്ണിലും ദൈവസ്നേഹവും സമാധാനവും പുനഃസ്ഥാപിക്കപ്പെടുന്നു എന്നതിന്റെ പ്രതീകമായിട്ടാണ് വിശ്വാസികൾ ഈ ചാപ്പലിനെ കാണുന്നത്.
