പരിശുദ്ധ മറിയത്തിന്റെ ദൈവാലയ സമർപ്പണ തിരുനാളിന് പിന്നിലെ ചരിത്രം

    എല്ലാ വർഷവും ഫെബ്രുവരി രണ്ടിന് കത്തോലിക്കർ ‘കർത്താവിന്റെ ദൈവാലയ സമർപ്പണ തിരുനാൾ’ ആഘോഷിക്കാറുണ്ട്. മറിയവും യൗസേപ്പും ഉണ്ണിയേശുവിനെ ദൈവാലയത്തിൽ കാഴ്ചവയ്ക്കുന്ന ലൂക്കായുടെ സുവിശേഷത്തിലെ രംഗമാണിത്. എന്നാൽ എല്ലാ വർഷവും നവംബർ 21-ന് സഭ അത്രയൊന്നും ശ്രദ്ധിക്കപ്പെടാത്ത, എന്നാൽ ഏറെ പ്രാധാന്യമുള്ള മറ്റൊരു തിരുനാൾ അനുസ്മരിക്കുന്നു. അത് പരിശുദ്ധ കന്യകാമറിയത്തിന്റെ ദൈവാലയ സമർപ്പണ തിരുനാൾ ആണ്.

    ഗബ്രിയേൽ മാലാഖ പ്രത്യക്ഷപ്പെടുന്നതിന് എത്രയോ മുൻപുതന്നെ ദൈവം മറിയത്തിന്റെ ഹൃദയത്തെ എങ്ങനെയാണ് ഒരുക്കിയതെന്ന് പരിശുദ്ധ മറിയത്തിന്റെ ദൈവാലയ സമർപ്പണ തിരുനാൾ നമ്മെ ഓർമ്മിപ്പിക്കുന്നു. തങ്ങളുടെ കുഞ്ഞുമകളെ പൂർണ്ണമായും ദൈവത്തിന് സമർപ്പിച്ച മറിയത്തിന്റെ മാതാപിതാക്കളായ വിശുദ്ധ യോവാക്കീമിനെയും വിശുദ്ധ അന്നയെയും സഭ ആദരിക്കുന്ന ദിവസമാണിത്.

    മറിയത്തിന്റെ ദൈവാലയ സമർപ്പണത്തെക്കുറിച്ച് അറിഞ്ഞിരിക്കേണ്ട ആറ് കാര്യങ്ങൾ ഇതാ:

    1. ഈ സംഭവം ബൈബിളിലല്ല, ആദിമ ക്രൈസ്തവ പാരമ്പര്യത്തിലാണ് ഉള്ളത്

    യേശുവിന്റെ ദൈവാലയ സമർപ്പണത്തിൽ നിന്ന് വ്യത്യസ്തമായി, മറിയത്തിന്റെ സമർപ്പണത്തെക്കുറിച്ച് പുതിയ നിയമത്തിൽ പരാമർശമില്ല. പകരം, ക്രിസ്തുവർഷം 200-ന് മുൻപ് രചിക്കപ്പെട്ട ‘യാക്കോബിന്റെ സുവിശേഷം’ (Protoevangelium of James) എന്ന ആദിമ ക്രൈസ്തവ ഗ്രന്ഥത്തിലാണ് ഇതിനെക്കുറിച്ചുള്ള വിവരണമുള്ളത്. വിശുദ്ധ ഗ്രന്ഥത്തിന്റെ ഭാഗമല്ലെങ്കിലും, ഈ ഗ്രന്ഥം ആദരണീയമായ അപ്പസ്തോലിക പാരമ്പര്യങ്ങളെ കാത്തുസൂക്ഷിക്കുന്നുണ്ട്. വിശുദ്ധ പോൾ ആറാമൻ മാർപാപ്പ 1974-ൽ പുറത്തിറക്കിയ ‘മരിയാലിസ് കുൾത്തൂസ്’ (Marialis Cultus) എന്ന അപ്പസ്തോലിക പ്രബോധനത്തിൽ ഇക്കാര്യം എടുത്തുപറയുന്നുണ്ട്.

    2. മറിയത്തിന് അന്ന് മൂന്ന് വയസ്സ് മാത്രമേ ഉണ്ടായിരുന്നുള്ളൂ

    ആദിമ പാരമ്പര്യമനുസരിച്ച്, മറിയത്തെ ദൈവസേവനത്തിനായി സമർപ്പിക്കാമെന്ന തങ്ങളുടെ വാഗ്ദാനം നിറവേറ്റാൻ യോവാക്കീമും അന്നയും അവൾക്ക് മൂന്ന് വയസ്സാകുന്നതുവരെ കാത്തിരുന്നു.

    കത്തിച്ച വിളക്കുകളേന്തിയ കന്യകമാരുടെ അകമ്പടിയോടെ ജറുസലേം ദൈവാലയത്തിലേക്ക് ആനയിക്കപ്പെട്ട മറിയത്തെ ദൈവാലയത്തിലെ പുരോഹിതൻ സ്വീകരിക്കുകയും ചുംബിക്കുകയും ആശീർവദിക്കുകയും ചെയ്തുകൊണ്ട് ഇങ്ങനെ പ്രഘോഷിച്ചു: “കർത്താവ് എല്ലാ തലമുറകളിലും നിന്റെ നാമത്തെ മഹത്വപ്പെടുത്തിയിരിക്കുന്നു. നിന്നിലൂടെ കർത്താവ് ഇസ്രായേൽ മക്കൾക്ക് തന്റെ വീണ്ടെടുപ്പ് വെളിപ്പെടുത്തും.”

    ദൈവാലയത്തിന്റെ മൂന്നാം പടിയിൽ നിർത്തപ്പെട്ട ആ കൊച്ചുബാലിക സന്തോഷത്താൽ നൃത്തം ചെയ്തതായും, അവളുടെ മാതാപിതാക്കൾ ദൈവത്തെ മഹത്വപ്പെടുത്തിക്കൊണ്ട് നസ്രത്തിലേക്ക് മടങ്ങിയതായും പാരമ്പര്യം പറയുന്നു.

    3. അന്ന എന്ന പ്രവാചകയായിരിക്കാം മറിയത്തെ പരിശീലിപ്പിച്ചത്

    ദൈവാലയത്തിൽ, ദൈവത്തിനായി ജീവിതം സമർപ്പിച്ച വിശുദ്ധരായ സ്ത്രീകളുടെ സംരക്ഷണയിൽ, വിശുദ്ധ ഗ്രന്ഥപഠനവും പ്രാർഥനയും അതിപരിശുദ്ധ സ്ഥലത്തിന്റെ സാന്നിധ്യവും നിറഞ്ഞ അന്തരീക്ഷത്തിലാണ് മറിയം വളർന്നത്. ലൂക്കായുടെ സുവിശേഷത്തിൽ ഉണ്ണിയേശുവിന്റെ ദൈവാലയ സമർപ്പണ വേളയിൽ ശിശുവായ യേശുവിനെ തിരിച്ചറിയുന്ന വയോധികയായ ‘അന്ന’ പ്രവാചകയായിരിക്കാം മറിയത്തെ പരിപാലിച്ച ആ സ്ത്രീകളിൽ ഒരാളെന്ന് വേദപണ്ഡിതർ ചൂണ്ടിക്കാണിക്കുന്നു.

    4. എ.ഡി. 543-ൽ ജറുസലേമിലെ ഒരു ദൈവാലയ പ്രതിഷ്ഠയോടെയാണ് ഇതിന് തുടക്കമായത്

    എ.ഡി. 543 നവംബർ 21-ന് ജസ്റ്റീനിയൻ ചക്രവർത്തി ജറുസലേം ദൈവാലയത്തിന് സമീപം ‘പരിശുദ്ധ മറിയത്തിന്റെ ബസിലിക്ക’ (Basilica of St. Mary the New) പ്രതിഷ്ഠിച്ചതുമായി നേരിട്ട് ബന്ധപ്പെട്ടാണ് ഈ ആരാധനാക്രമ തിരുനാൾ ആരംഭിക്കുന്നത്. വിശുദ്ധ ജെർമാനൂസ്, വിശുദ്ധ ജോൺ ഡമാസ്കീൻ തുടങ്ങിയ ആദിമ സഭാപിതാക്കന്മാർ ഈ തിരുനാളിനെക്കുറിച്ച് പ്രസംഗിച്ചിട്ടുണ്ട്. ബൈസന്റൈൻ സഭ തങ്ങളുടെ 12 വലിയ തിരുനാളുകളിൽ ഒന്നായി ഇത് ആഘോഷിക്കുന്നുണ്ടെങ്കിലും, പാശ്ചാത്യ സഭയിൽ ഇത് വേരൂന്നാൻ നൂറ്റാണ്ടുകളെടുത്തു. 1373-ൽ ഫ്രാൻസിലെ അവിഞ്ഞോണിലാണ് ഈ തിരുനാൾ ആദ്യമായി ഔദ്യോഗികമായി ആഘോഷിക്കപ്പെട്ടത്; തുടർന്ന് 1472-ൽ സിക്സ്റ്റസ് നാലാമൻ മാർപാപ്പ ഇത് ആഗോള സഭയിലേക്ക് വ്യാപിപ്പിച്ചു.

    5. മറിയത്തിന്റെ സമ്പൂർണ്ണ ആത്മസമർപ്പണത്തെയും ഏകാന്തവാസികളായ സന്ന്യാസിനിമാരെയും മാർപാപ്പമാർ ചൂണ്ടിക്കാണിക്കുന്നു

    ജറുസലേം ദൈവാലയത്തിലേക്കുള്ള മറിയത്തിന്റെ പ്രവേശനം, സർവശക്തന്റെ യഥാർഥവും ജീവിക്കുന്നതുമായ വാസസ്ഥലമായി മാറുക എന്ന അവളുടെ ആത്യന്തിക ദൈവവിളിയുടെ മുന്നോടിയായിരുന്നുവെന്ന് നൂറ്റാണ്ടുകളായി മാർപാപ്പമാർ ഊന്നിപ്പറയുന്നു. ദൈവത്തിന് മുന്നിലുള്ള മറിയത്തിന്റെ സമ്പൂർണ്ണ സമർപ്പണത്തെക്കുറിച്ച് ബെനഡിക്ട് പതിനാറാമൻ മാർപാപ്പ ഇപ്രകാരം എഴുതി:

    “മറിയം വിശുദ്ധ ഇസ്രായേലാണ്: അവൾ കർത്താവിനോട് ‘ആമ്മേൻ’ (സമ്മതം) പറയുന്നു, അവൾ തന്നെത്തന്നെ പൂർണ്ണമായും അവിടുത്തെ കരങ്ങളിൽ ഏൽപ്പിക്കുന്നു, അങ്ങനെ അവൾ ദൈവത്തിന്റെ ജീവിക്കുന്ന ആലയമായി മാറുന്നു.”

    അതുപോലെ, വിശുദ്ധ ജോൺ പോൾ രണ്ടാമൻ മാർപാപ്പ ഈ തിരുനാളിനെ ചൂണ്ടിക്കാണിച്ചുകൊണ്ട് ഇങ്ങനെ പറഞ്ഞു: “തന്റെ ബാല്യകാലം മുതൽക്കുതന്നെ യാതൊരു ഉപാധികളുമില്ലാതെ, പൂർണ്ണമായും കർത്താവിന്റേതായിരിക്കാൻ അവൾ ആഗ്രഹിച്ചിരുന്നു; എല്ലാ വർഷവും നവംബർ 21-ന് അനുസ്മരിക്കുന്ന ദൈവാലയ സമർപ്പണ തിരുനാൾ ഇതിന് സാക്ഷ്യം വഹിക്കുന്നു” (ആഞ്ചലൂസ് പ്രാർഥന, ഡിസംബർ 8, 1978).

    ദൈവാലയത്തിലെ മറിയത്തിന്റെ നിശബ്ദമായ പ്രാർഥനാ ജീവിതം മുൻനിർത്തി, നവംബർ 21 സഭ ‘പ്രോ ഒറാന്തിബസ് ദിനം’ (Pro Orantibus Day) അഥവാ ‘ഏകാന്തവാസികളായ സന്ന്യാസികളുടെ ആഗോള ദിനം’ (World Day of Cloistered Life) ആയും ആചരിക്കുന്നു. വിശുദ്ധ ജോൺ പോൾ രണ്ടാമൻ ഈ ദിവസത്തെ വിശേഷിപ്പിച്ചത് ഇങ്ങനെയാണ്: “നിശബ്ദതയിലും ഏകാഗ്രതയിലും പ്രാർഥനയ്ക്കായി പ്രത്യേകമായി ജീവിതം സമർപ്പിച്ച ഏകാന്തവാസികളായ സന്ന്യാസിനിമാർക്കായുള്ള ഒരു ദിനം.”

    6. മാതാപിതാക്കളുടെ ത്യാഗത്തെയും നമ്മുടെ മാമ്മോദീസ വിളിയെയും ഇത് ആഘോഷിക്കുന്നു

    നവംബർ 21 ഒരു കടമുള്ള തിരുനാളോ വലിയ ആഘോഷമോ അല്ലാതെ കേവലം ഒരു ‘ഓർമ്മത്തിരുനാൾ’ (Memorial) മാത്രമായി തരംതിരിച്ചിരിക്കുന്നതിനാൽ, പലപ്പോഴും അത് ശ്രദ്ധിക്കപ്പെടാതെ കടന്നുപോകാൻ സാധ്യതയുണ്ട്. എങ്കിലും, ആഴമേറിയ രണ്ട് യാഥാർഥ്യങ്ങളെ ആദരിക്കാൻ ഈ തിരുനാൾ കത്തോലിക്കരെ ക്ഷണിക്കുന്നു: ദൈവഹിതം നിറവേറ്റാൻ തങ്ങളുടെ ഏകമകളെ പൂർണ്ണമായും വിട്ടുകൊടുത്ത വിശുദ്ധ യോവാക്കീമിന്റെയും അന്നയുടെയും ധീരമായ ത്യാഗത്തെയും, ദൈവത്തോടുള്ള മറിയത്തിന്റെ അചഞ്ചലമായ ‘സമ്മതത്തെയും’ ഈ തിരുനാൾ അനുസ്മരിപ്പിക്കുന്നു.

    നമ്മുടെ മാമ്മോദീസയിലൂടെ, അതേ സമ്പൂർണ്ണ ആത്മസമർപ്പണത്തിലേക്ക് ദൈവം നമ്മെയും ഓരോരുത്തരെയും ക്ഷണിക്കുന്നു. ഒപ്പം ആ വഴിയിലൂടെ നമ്മെ നയിക്കാൻ ആർദ്രതയുള്ള ഒരു അമ്മയായി ഏറ്റവും നിർമ്മലയായ കന്യകാമറിയത്തെ നമുക്ക് നൽകുകയും ചെയ്യുന്നു.

    വായനക്കാരുടെ അഭിപ്രായങ്ങൾ ഇവിടെ എഴുതാവുന്നതാണ്.