പാക്കിസ്ഥാനിൽ ക്രൈസ്തവരും മറ്റ് മതന്യൂനപക്ഷങ്ങളും അനുഭവിക്കുന്ന വിവേചനത്തിന്റെയും അനീതിയുടെയും ഞെട്ടിക്കുന്ന വിവരങ്ങൾ പുറത്തുവിട്ട് ‘എയിഡ് ടു ദി ചർച്ച് ഇൻ നീഡ്’ റിപ്പോർട്ട്. പാക്കിസ്ഥാൻ കത്തോലിക്കാ ബിഷപ്പ് കോൺഫറൻസിന്റെ നീതിക്കും സമാധാനത്തിനുമായുള്ള കമ്മീഷൻ തയ്യാറാക്കിയ ഈ പഠന റിപ്പോർട്ട്, രാജ്യത്ത് ക്രൈസ്തവരും ഇതര ന്യൂനപക്ഷ വിഭാഗങ്ങളും നേരിടുന്ന വ്യവസ്ഥാപിതമായ മനുഷ്യാവകാശ ലംഘനങ്ങളുടെ ആഴം വ്യക്തമാക്കുന്നു.
പാക്കിസ്ഥാനിൽ ന്യൂനപക്ഷങ്ങളെ ഉപദ്രവിക്കുന്നതിനും വ്യക്തിവൈരാഗ്യം തീർക്കുന്നതിനുമായി ദൈവദൂഷണ നിയമങ്ങൾ ദുരുപയോഗം ചെയ്യുന്നത് ഒരു പതിവു സംഭവമായി മാറിക്കഴിഞ്ഞു. നിസ്സാരമായ ആരോപണങ്ങളിൽ പോലും വധശിക്ഷയോ ജീവപര്യന്തമോ ലഭിക്കാവുന്ന ഈ നിയമം ന്യൂനപക്ഷങ്ങളുടെ തലയ്ക്കു മുകളിൽ വാളായി നിലനിൽക്കുന്നു. തടവിൽ കഴിയുന്ന നിരവധി ആളുകൾക്ക് പുറമെ, നിരവധി ക്രൈസ്തവർ ഇത്തരം ആരോപണങ്ങളാൽ വീടുകളും സ്വത്തുക്കളും ഉപേക്ഷിച്ച് പലായനം ചെയ്യാൻ നിർബന്ധിതരാകുന്നു എന്ന് റിപ്പോർട്ട് വെളിപ്പെടുത്തുന്നു.
സമൂഹത്തിൽ ഏറ്റവും വലിയ ആശങ്ക സൃഷ്ടിക്കുന്നത് ന്യൂനപക്ഷ വിഭാഗത്തിൽപ്പെട്ട പെൺകുട്ടികൾക്കെതിരെയുള്ള അതിക്രമങ്ങളാണ്. ക്രൈസ്തവ, ഹിന്ദു വിഭാഗങ്ങളിൽപ്പെട്ട പ്രായപൂർത്തിയാകാത്ത പെൺകുട്ടികളെ തട്ടിക്കൊണ്ടുപോയി നിർബന്ധിതമായി മതംമാറ്റുകയും അക്രമികൾക്ക് വിവാഹം കഴിച്ചുകൊടുക്കുകയും ചെയ്യുന്ന നിരവധി സംഭവങ്ങളാണ് റിപ്പോർട്ടിൽ അക്കമിട്ടു നിരത്തുന്നത്.
വിദ്യാഭ്യാസ മേഖലയിലും തൊഴിൽ രംഗത്തും നിലനിൽക്കുന്ന തീവ്രവാദ മനോഭാവവും വിവേചനവും ന്യൂനപക്ഷങ്ങളെ രണ്ടാംകിട പൗരന്മാരായി മാറ്റുന്നു. ശുചീകരണ ജോലികൾക്ക് മാത്രമായി ന്യൂനപക്ഷങ്ങളെ നീക്കിവയ്ക്കുന്ന വിവേചനപരമായ പരസ്യങ്ങൾക്കെതിരെ അടുത്തിടെ ഹൈക്കോടതി ഉത്തരവുണ്ടായെങ്കിലും, സാമൂഹികമായ അവഗണന ഇന്നും തുടരുന്നു.
മതസ്വാതന്ത്ര്യത്തിന്റെ കാര്യത്തിൽ ‘ഏറ്റവും കടുത്ത പീഡനം അനുഭവിക്കുന്ന രാജ്യം’ എന്ന വിഭാഗത്തിലാണ് എസിഎൻ പാക്കിസ്ഥാനെ ഉൾപ്പെടുത്തിയിരിക്കുന്നത്. സമത്വവും നീതിയും ഉറപ്പാക്കാൻ അന്താരാഷ്ട്ര സമൂഹത്തിന്റെ പിന്തുണയും ശക്തമായ നിയമപരിഷ്കാരങ്ങളും അടിയന്തിരമായി ആവശ്യമാണെന്ന് റിപ്പോർട്ട് അടിവരയിടുന്നു.
