‘ഗുഡ്ബൈ ജൂൺ’ എന്ന ചലച്ചിത്രം ഒരു കുടുംബത്തിന്റെ ഉള്ളിലെ വിള്ളലുകളെയും, അത് എങ്ങനെയാണ് ഒരു അമ്മയുടെ സ്നേഹത്താൽ ഒന്നിപ്പിക്കുന്നത് എന്നും ഹൃദയസ്പർശിയായി വരച്ചുകാട്ടുന്നു. 2025 ല് പ്രമുഖ ഹോളിവുഡ് നടി കേറ്റ് വിന്സ്ലേറ്റ് സംവിധാനം ചെയ്ത സിനിമയാണിത്. ഇതില്, മരണം വാതിൽപ്പടിയിൽ നിൽക്കുമ്പോഴും, തകർന്നുപോയ ഒരു കുടുംബത്തെ സ്നേഹത്തിന്റെ നൂലുകൾ കൊണ്ട് ഒന്നിച്ചുകൂട്ടാൻ ശ്രമിക്കുന്ന ജൂൺ ചെഷയർ എന്ന അമ്മയുടെ ജീവിതത്തെ നമുക്ക് കാണാം.
ചെഷയർ കുടുംബം പുറമെ ഒറ്റക്കെട്ടാണെങ്കിലും അകമേ അവർക്കിടയിൽ വലിയ അകലങ്ങളുണ്ടായിരുന്നു. അമ്മയായ ജൂണും അപ്പനായ ബര്ണിയും ജൂലിയ, മോളി, ഹെലന് എന്നീ മൂന്ന് പെണ്മക്കളും കോണർ എന്ന മകനും ചേരുന്നതാണ് കുടുംബം. വർഷങ്ങളായി സംസാരിക്കാത്ത ജൂലിയയും മോളിയും, കുടുംബത്തിൽ നിന്ന് വൈകാരികമായും ഭൗതികമായും അകന്നുകഴിയുന്ന ഹെലൻ, ജീവിതദിശ കണ്ടെത്താനാകാതെ അലയുന്ന കോണർ, വികാരങ്ങൾ ഉള്ളിലൊതുക്കുന്ന ബർണി – ഇങ്ങനെ ചിതറിപ്പോയ ഒരു കുടുംബത്തെയാണ് ജൂണിന്റെ രോഗാവസ്ഥ വീണ്ടും ഒരു കുടക്കീഴിൽ കൊണ്ടുവരുന്നത്.
ഈ കഥയുടെ കേന്ദ്രബിന്ദു ജൂൺ എന്ന അമ്മയാണ്. തന്റെ മക്കൾക്കു വേണ്ടി ജീവിതം ഉഴിഞ്ഞുവച്ച അവൾ, കാന്സറിന്റെ കഠിനമായ അവസ്ഥയിലൂടെ കടന്നുപോകുകയാണ്. മാരകമായ ആ രോഗം അവളെ ശാരീരികമായി തളർത്തുന്നുണ്ടെങ്കിലും, തന്റെ മക്കൾക്കു വേണ്ടി അവൾ കരുതിവച്ച സ്നേഹം ഒട്ടും കുറയുന്നില്ല. മരണം മുന്നിൽ നിൽക്കുമ്പോഴും സ്വന്തം വേദനകളേക്കാൾ ജൂൺ ആകുലപ്പെട്ടത് മക്കൾക്കിടയിലുള്ള പിണക്കങ്ങളെക്കുറിച്ചായിരുന്നു. മക്കൾ ഉള്ളുകൊണ്ട് പരസ്പരം സ്നേഹിക്കുന്നുണ്ടെന്ന് അറിയാമായിരുന്ന ജൂൺ, നഴ്സായ ആഞ്ചലിയുടെ സഹായത്തോടെ അവരെ പരസ്പരം ചേർത്തുനിർത്താൻ സാധ്യമായതെല്ലാം ചെയ്യുകയാണ്.
അങ്ങനെ, അതുവരെ മക്കൾക്കിടയിൽ ഉണ്ടായിരുന്ന അസ്വാരസ്യങ്ങളും പരസ്പരമുള്ള അകൽച്ചയും അപ്രത്യക്ഷമാകുന്നു. മരണം എന്ന യാഥാർഥ്യത്തിനു മുന്നിൽ തങ്ങളുടെ അഹങ്കാരങ്ങളും പിണക്കങ്ങളും എത്ര ചെറുതാണെന്ന് അവർ തിരിച്ചറിയുകയാണ്. അമ്മയുടെ സാമീപ്യം അനുഭവിക്കാൻ അവർക്ക് ലഭിക്കുന്ന ഓരോ നിമിഷവും ഒരു പുണ്യമായി അവർ കാണാൻ തുടങ്ങുന്നു. രോഗവസ്ഥയിലുള്ള അമ്മയുടെ ഇടപെടല്, തകരാൻ പോകുന്ന ഒരു കുടുംബത്തെ ഒന്നിപ്പിക്കുന്നത് നമുക്ക് ഈ സിനിമയില് കാണാം.
മനോഹരമായ നിരവധി സംഭാഷണങ്ങള് ഈ സിനിമയില് നമുക്ക് കേള്ക്കാം. മകളായ ഹെലന്റെ ഉദരത്തില് ഒരു കുഞ്ഞുണ്ട്. തന്റെ കുഞ്ഞ് ജനിക്കും മുന്പേ അമ്മ മരിക്കുമെന്ന് മനസ്സിലാക്കിയ അവള് വിലപിക്കുകയാണ്: ഈ ലോകത്തിലെ ഏറ്റവും നല്ല വല്യമ്മയെ കാണാന് എന്റെ കുഞ്ഞിന് സാധിക്കില്ലല്ലോ എന്ന്.
മഞ്ഞ് പെയ്യുന്നത് കാണാന് ആ അമ്മയ്ക്ക് വലിയ ഇഷ്ടമായിരുന്നു. ആശുപത്രിക്കിടക്കയില് ആയിരിക്കുമ്പോള് ഒരിക്കല് മഞ്ഞ് പെയ്തു. ജനാലയിലൂടെ അതു നോക്കിക്കൊണ്ട് അവര് മകളായ ജൂലിയയോടു പറഞ്ഞു:
“സാധിക്കുമെങ്കില് മരണശേഷം ഞാന് മഞ്ഞായി തിരിച്ചുവരും. അങ്ങനെയെങ്കില് നമുക്ക് ക്രിസ്തുമസ് കാലങ്ങളില് കാണാമല്ലോ.”
ജൂണിന്റെ അസുഖം വര്ധിച്ചതിനാല്, ക്രിസ്തുമസ് വരെ കാത്തുനിൽക്കാതെ കുടുംബം നേരത്തെ തന്നെ ഒരു ‘നേറ്റിവിറ്റി ഷോ’ (Nativity Play) ഒരുക്കാൻ തീരുമാനിച്ചു. ഒരുപക്ഷേ, തങ്ങളുടെ പ്രിയപ്പെട്ട അമ്മയ്ക്ക് നൽകാൻ കഴിയുന്ന ഏറ്റവും മനോഹരമായ അവസാന സമ്മാനം അതായിരിക്കുമെന്ന് അവർ കരുതി. അപ്പനും മക്കളും കൊച്ചുമക്കളും എല്ലാവരും ഷോയില് അവരവരുടെ റോളുകള് അഭിനയിക്കുന്നു. നാടകം അരങ്ങേറിക്കൊണ്ടിരിക്കുമ്പോൾ, ആ അമ്മ തന്റെ മക്കളെയും പേരക്കുട്ടികളെയും നോക്കി പുഞ്ചിരിച്ചുകൊണ്ട് ഈ ലോകത്തോട് വിടപറയുകയാണ്.
ഒരു വർഷത്തിനു ശേഷം, ക്രിസ്തുമസിന് ആ കുടുംബം വീണ്ടും ഒത്തുചേരുന്നത് സിനിമയുടെ ഒടുവില് കാണിക്കുന്നു. തലേവർഷം ആ കുടുംബത്തെ അകറ്റിയിരുന്ന പിണക്കങ്ങളുടെ കയ്പ്പൊന്നും അപ്പോള് അവര്ക്കിടയിലില്ല. അവര്ക്കിടയില് സ്നേഹം മാത്രമേയുള്ളൂ. ആ സ്നേഹത്തിന്റെ പൂര്ത്തീകരണം പോലെ അവരുടെ അമ്മയുടെ സാന്നിധ്യം പുറത്ത് മഞ്ഞായി പെയ്തുകൊണ്ടിരുന്നു.
മനുഷ്യജീവിതത്തിലെ ഏറ്റവും വലിയ സത്യമാണ് മരണം. എന്നാൽ, ആ മരണത്തെപ്പോലും സ്നേഹം കൊണ്ട് തോൽപിക്കാൻ കഴിയുമെന്ന് ഈ ചിത്രം നമ്മെ ഓർമ്മിപ്പിക്കുന്നു. തകർന്നുപോയ ഒരു കുടുംബത്തെ ഒന്നിപ്പിക്കാന് ഒരു അമ്മ കാണിച്ച ക്ഷമയും കരുതലുമാണ് ഈ സിനിമയുടെ നട്ടെല്ല്. താൻ ഇല്ലാതായാലും തന്റെ മക്കൾ പരസ്പരം ചേർന്നുനിൽക്കണമെന്ന ജൂണിന്റെ നിശ്ചയദാർഢ്യം, ഒടുവിൽ മക്കളെ സ്നേഹത്തില് ഒരുമിപ്പിക്കുന്നതു കാണുമ്പോൾ പ്രേക്ഷകരുടെ കണ്ണുകൾ നനയാതെ പോകില്ല. നമ്മുടെ ജീവിതത്തിൽ നാം പലപ്പോഴും മാറ്റിവയ്ക്കുന്ന, അല്ലെങ്കിൽ പറയാൻ മടിക്കുന്ന സ്നേഹപ്രകടനങ്ങളുടെ വിലയും, അകന്നുപോയവരെ തിരികെ വിളിക്കാനുള്ള അവസരം എപ്പോഴും നമുക്കില്ല എന്ന വലിയ തിരിച്ചറിവും ഈ ചിത്രം ഓരോ പ്രേക്ഷകനിലും എത്തിക്കുന്നു.
ജീവിതത്തിലെ എല്ലാവിധ തിരക്കുകൾക്കും പിണക്കങ്ങൾക്കുമപ്പുറം, കുടുംബമാണ് ഏറ്റവും വലിയ സമ്പാദ്യമെന്നും സ്നേഹം കൊണ്ട് എന്തും അതിജീവിക്കാൻ സാധിക്കുമെന്നുമുള്ള വലിയ പാഠം ‘ഗുഡ്ബൈ ജൂൺ’ പങ്കുവയ്ക്കുന്നു. മരണാനന്തരം മഞ്ഞായി മടങ്ങിവരുമെന്ന ജൂണിന്റെ വാക്കുകൾ, നഷ്ടപ്പെടലുകൾക്കിടയിലും പ്രതീക്ഷയുടെ വെളിച്ചം വീശുന്നു. ബന്ധങ്ങളുടെ തീവ്രതയും അമ്മയുടെ നിസ്സീമമായ സ്നേഹത്തിന്റെ കരുത്തും തിരിച്ചറിയാൻ ആഗ്രഹിക്കുന്ന ഏതൊരാളും കണ്ടിരിക്കേണ്ട ഒരു കാവ്യാനുഭവമാണ് ഈ ചലച്ചിത്രം. ഇതു കാണുമ്പോള് നമുക്ക് ബോധ്യമാകും, നഷ്ടപ്പെടുത്താന് നമുക്കിനി സമയമില്ല എന്ന സത്യം.
ഫാ. ജി. കടൂപ്പാറയിൽ MCBS
