വിശ്വാസത്തിന്റെ ദീപ്തിയിൽ അന്ത്യാളം ഇടവകയും വി. മത്തായി ശ്ലീഹായുടെ തിരുനാളും

പാലാ രൂപതയിലെ രാമപുരം ഫൊറോനയുടെ കീഴിലുള്ള പ്രശസ്തമായ അന്ത്യാളം ഇടവക 1891 ലാണ് സ്ഥാപിതമായത്. ഉദയംപേരൂർ സൂനഹദോസോടെ ലത്തീൻ ഭരണത്തിലും ആരാധനക്രമത്തിലുമായിത്തീർന്ന മാർത്തോമ ക്രിസ്ത്യാനികളുടെ സ്വാതന്ത്ര്യത്തിനായി പ്രവർത്തിച്ച തൊണ്ടനാട്ട് അന്തോണിച്ചൻ, മാർ അബ്ദീശോ എന്ന പേരിൽ മെത്രാൻ സ്ഥാനം സ്വീകരിച്ച ശേഷം സ്ഥാപിച്ചതാണ് ഈ ഇടവക. കേരളത്തിൽ വി. മത്തായി ശ്ലീഹായുടെ നാമത്തിലുള്ള അപൂർവം ചില പള്ളികളിലൊന്നാണ് അന്ത്യാളം സെന്റ് മാത്യൂസ് പള്ളി. ഈ വർഷത്തെ തിരുനാൾ ആഘോഷങ്ങൾ സെപ്റ്റംബർ 18, 19, 20, 21 തീയതികളിലായി വിപുലമായി നടക്കുന്നു.

വി. മത്തായി ശ്ലീഹായുടെ ചരിത്രവും പശ്ചാത്തലവും

ഹെബ്രായ ഭാഷയിൽ മത്തായി എന്ന വാക്കിന്റെ അർഥം ദൈവത്തിന്റെ ദാനം എന്നാണ്. അൽഫായിയുടെ മകനായ ഇദ്ദേഹം യേശുവിന്റെ വിളി കേൾക്കുന്നതിനു മുൻപ് ലേവി എന്ന പേരിലാണ് അറിയപ്പെട്ടിരുന്നത്. ചുങ്കപ്പിരിവുകാരനായിരുന്ന അദ്ദേഹം, റോമാസാമ്രാജ്യത്തിനും ഗലീലിയിലെ ഭരണാധികാരിക്കും വേണ്ടിയാണ് ജോലി ചെയ്തിരുന്നത്. രാജഭരണവുമായി നേരിട്ട് ബന്ധപ്പെട്ടിരുന്ന ഏക ക്രിസ്തുശിഷ്യനായിരുന്നു അദ്ദേഹം. ചുങ്കസ്ഥലത്തിരുന്ന മത്തായിയെ ഈശോ തന്റെ അടുത്തേക്ക് വിളിച്ച ആ നിമിഷം തന്നെ, യാതൊരു മടിയും കൂടാതെ അദ്ദേഹം സർവവും ഉപേക്ഷിച്ച് യേശുവിനെ അനുഗമിച്ചു.

സുവിശേഷകനായ വി. മത്തായി

പുതിയ നിയമത്തിലെ ആദ്യ ഗ്രന്ഥമായ മത്തായിയുടെ സുവിശേഷം രചിച്ചത് ഇദ്ദേഹമാണെന്ന് സഭാപാരമ്പര്യം സാക്ഷ്യപ്പെടുത്തുന്നു. പഴയനിയമ പ്രവചനങ്ങളുടെ പൂർത്തീകരണമാണ് യേശു എന്ന് യഹൂദ പശ്ചാത്തലത്തിലുള്ളവർക്കായി സമർഥിക്കുന്നതാണ് ഈ സുവിശേഷം. സുവിശേഷ പ്രഘോഷണത്തിനിടയിൽ വിശ്വാസത്തിനു വേണ്ടി അദ്ദേഹം രക്തസാക്ഷിത്വം വരിച്ചു. അദ്ദേഹത്തിന്റെ തിരുശേഷിപ്പ് ഇറ്റലിയിലെ സലേർനോ കത്തീഡ്രലിലാണ് സൂക്ഷിച്ചിരിക്കുന്നത്.

വി. മത്തായിയുടെ മാധ്യസ്ഥ്യം 

സെപ്റ്റംബർ 21 നാണ് ആഗോളസഭയിൽ വിശുദ്ധന്റെ തിരുനാൾ ആഘോഷിക്കുന്നത്. ഔദ്യോഗിക ജീവിതത്തിൽ കണക്കുകളും ധനകാര്യവും കൈകാര്യം ചെയ്തിരുന്നതിനാൽ, അക്കൗണ്ടന്റുകൾ, ബാങ്ക് ജീവനക്കാർ, നികുതി ഉദ്യോഗസ്ഥർ എന്നിവരുടെ പ്രത്യേക മധ്യസ്ഥനായും വി. മത്തായി വണങ്ങപ്പെടുന്നു. അദ്ദേഹത്തിന്റെ മാധ്യസ്ഥ്യം തേടി കേരളത്തിന്റെ നാനാഭാഗത്തു നിന്നും നിരവധി ഭക്തരാണ് അന്ത്യാളം പള്ളിയിലേക്ക് എത്തിച്ചേരുന്നത്.

അന്ത്യാളം ഇടവകയിലെ വിശുദ്ധന്‍

സർക്കാരും കോടതിയുമായി ബന്ധപ്പെട്ട കാര്യങ്ങളിൽ സഹായം തേടി പതിറ്റാണ്ടുകളായി വിശ്വാസികൾ മത്തായി ശ്ലീഹായുടെ മാധ്യസ്ഥ്യം തേടുന്നു. വഴക്കുകൾക്കും തർക്കങ്ങൾക്കും രമ്യമായ പരിഹാരം തേടിയും, കോടതിവ്യവഹാരങ്ങളിൽ നീതി ലഭ്യമാകുന്നതിനും വേണ്ടിയുമാണ് വിശ്വാസികളേറെയും ഇവിടെയെത്തുന്നത്. സിവിൽ, ക്രിമിനൽ കേസുകളിൽപെട്ട് നട്ടം തിരിഞ്ഞിരുന്നവർ ശ്ലീഹായുടെ മധ്യസ്ഥതയിൽ ആശ്വാസം കണ്ടെത്തിയതായി ദൈവാലയത്തിലെത്തി സാക്ഷ്യപ്പെടുത്താറുണ്ട്. കൂടാതെ, സാമ്പത്തിക തകർച്ചയിൽ ആശ്വാസം തേടിയും ബിസിനസ് അഭിവൃദ്ധിക്കുമായി പ്രാർഥിക്കാനെത്തുന്നവരും നിരവധിയാണ്.

തൂലിക എഴുന്നള്ളിക്കുന്ന പതിവ്

സാമ്പത്തിക കാര്യങ്ങളുടെ കണക്കെഴുത്തുകാരനായിരുന്ന ശ്ലീഹ, തന്റെ മാനസാന്തരത്തിനു ശേഷം വചനം തന്നെയായ ഈശോയെ ലോകത്തിന് വരച്ചുകാണിക്കുന്നതിനാണ് തന്റെ തൂലിക ഉപയോഗിച്ചത്. സുവിശേഷകൻ എന്ന നിലയിൽ തൂലികയേന്തിയ ശ്ലീഹായുടെ തിരുസ്വരൂപമാണ് ലോകമെങ്ങും പ്രചാരത്തിലുള്ളത്. തിരുനാളിനോടനുബന്ധിച്ച് തൂലിക എഴുന്നള്ളിക്കുന്ന സവിശേഷമായ പതിവ് അന്ത്യാളം പള്ളിയിൽ ആരംഭകാലം മുതൽക്കേ തുടർന്നുവരുന്നുണ്ട്.

ആദ്യാക്ഷരം കുറിപ്പിക്കല്‍

കാൽ നൂറ്റാണ്ടുകൾക്കു മുൻപാണ് സുവിശേഷകനായ ശ്ലീഹായുടെ തൂലിക ഉപയോഗിച്ച് കുട്ടികളെ ആദ്യാക്ഷരം കുറിക്കുന്ന പതിവ് അന്ത്യാളം പള്ളിയിൽ ആരംഭിച്ചത്. പ്രധാന തിരുനാൾ ദിനത്തിൽ നാടിന്റെ നാനഭാഗത്തു നിന്നായി നിരവധി കുട്ടികളാണ് അന്ത്യാളം പള്ളിയിൽ ആദ്യാക്ഷരം കുറിക്കാനായി എത്തുന്നത്.

മത്തായിമാരുടെ സംഗമം

വി. മത്തായി ശ്ലീഹായുടെ തിരുനാളിനോടനുബന്ധിച്ച് വർഷങ്ങളായി അന്ത്യാളം ഇടവകയിൽ മത്തായി നാമധാരികളുടെ സംഗമവും നടന്നുപോരുന്നുണ്ട്. കേരളത്തിന്റെ വിവിധ ഭാഗങ്ങളിൽ നിന്നുള്ള നൂറുകണക്കിന് മത്തായിമാരാണ് ഈ സ്നേഹസംഗമത്തിൽ പങ്കുകൊള്ളാനായി എത്തിച്ചേരുന്നത്.

ഫാ. ജോസഫ് ചെറുകരക്കുന്നേലാണ് ഇപ്പോഴത്തെ വികാരി

ചരിത്രത്തിന്റെയും വിശ്വാസത്തിന്റെയും ഇഴയടുപ്പം കൊണ്ട് അനുഗ്രഹീതമായ അന്ത്യാളം ഇടവക, തലമുറകളായി കേരളക്കരയുടെ ആത്മീയഭൂപടത്തിൽ ഒരു പ്രകാശസ്തംഭമായി നിലകൊള്ളുന്നു. വി. മത്തായി ശ്ലീഹായുടെ മധ്യസ്ഥതയിൽ ശരണം പ്രാപിച്ചുകൊണ്ട്, പ്രത്യാശയോടെയും നിറഞ്ഞ വിശ്വാസത്തോടെയും ഇവിടെയെത്തുന്ന ഓരോ വിശ്വാസിയും ആശ്വാസത്തിന്റെയും സമാധാനത്തിന്റെയും അനുഭവവുമായാണ് മടങ്ങുന്നത്. തിരുനാൾ ദിനങ്ങളിലെ പ്രാര്‍ഥനകളും തിരുകര്‍മങ്ങളും കൂട്ടായ്മകളും ഈ ഇടവകയുടെ പൈതൃകത്തെ കൂടുതൽ ദൃഢമാക്കാന്‍ കാരണമാകുന്നു.