ഇന്നത്തെ ലോകത്ത് സ്ത്രീകളുടെ ജീവിതം ഏറെ അർഥവത്തും സന്തോഷപ്രദവുമാണെങ്കിലും, ജീവശാസ്ത്രപരവും സാമൂഹികവുമായ പലവിധ വെല്ലുവിളികളും അവർക്ക് നേരിടേണ്ടി വരാറുണ്ട്. ശാരീരികവും മാനസികവുമായ പ്രയാസങ്ങൾ, കുടുംബപ്രശ്നങ്ങൾ, കരിയറും കുടുംബവും തമ്മിലുള്ള സന്തുലിതാവസ്ഥ തുടങ്ങി ഓരോ ഘട്ടത്തിലും സ്ത്രീകൾക്ക് പ്രചോദനവും പിന്തുണയും നൽകാൻ ചില വിശുദ്ധർക്ക് സാധിക്കും. ജീവിതത്തിന്റെ വിവിധ സാഹചര്യങ്ങളിൽ സ്ത്രീകൾക്ക് മാതൃകയാക്കാവുന്ന 12 വിശുദ്ധർ ഇതാ:
1. വിശുദ്ധ ഫിലോമിന – യുവതികളുടെ സംരക്ഷക
പെൺകുട്ടികൾ യവ്വനത്തിലേക്ക് കടക്കുമ്പോൾ പലവിധ സാമൂഹിക സമ്മർദങ്ങൾക്കും പ്രലോഭനങ്ങൾക്കും ഇരയാകാറുണ്ട്. ചെറുപ്പത്തിൽത്തന്നെ രക്തസാക്ഷിത്വം വരിച്ച വിശുദ്ധ ഫിലോമിന, മൂല്യങ്ങളും വിശ്വാസവും മുറുകെപ്പിടിക്കാൻ ആഗ്രഹിക്കുന്ന യുവതികളുടെ സംരക്ഷകയാണ്. ലൗകിക സമ്മർദ്ദങ്ങൾക്ക് വഴങ്ങാതെ സ്വന്തം വ്യക്തിത്വത്തിലും വിശ്വാസത്തിലും ഉറച്ചുനിൽക്കാൻ വിശുദ്ധ ഫിലോമിന പ്രചോദനം നൽകുന്നു.
2. വിശുദ്ധ ഡ്വിൻവെൻ – സ്നേഹം കണ്ടെത്താൻ
അനുയോജ്യനായ ഒരു ജീവിതപങ്കാളിയെ കണ്ടെത്തുക എന്നത് പലർക്കും വലിയൊരു ആഗ്രഹമാണ്. അഞ്ചാം നൂറ്റാണ്ടിൽ ജീവിച്ചിരുന്ന വിശുദ്ധ ഡ്വിൻവെൻ, വിവാഹിതയായിരുന്നില്ലെങ്കിലും സത്യസന്ധമായ പ്രണയത്തിനും നല്ല ദാമ്പത്യത്തിനും വേണ്ടി പ്രാർഥിച്ചിരുന്ന വ്യക്തിയാണ്. ജീവിതത്തിൽ അനുയോജ്യമായ പ്രണയവും പങ്കാളിയെയും തിരയുന്നവർക്ക് ഈ വിശുദ്ധയോട് പ്രാർഥിക്കാം.
3. വിശുദ്ധ വാലന്റൈൻ – ദാമ്പത്യ സന്തോഷത്തിന്
സ്നേഹത്തിന്റെ മധ്യസ്ഥനായി പരക്കെ അറിയപ്പെടുന്ന വിശുദ്ധനാണ് വാലന്റൈൻ. റോമൻ ഭരണാധികാരികളുടെ എതിർപ്പിനെ മറികടന്ന് പ്രേമബദ്ധരായ ദമ്പതികളുടെ വിവാഹം രഹസ്യമായി നടത്തിക്കൊടുത്തു എന്നതാണ് അദ്ദേഹത്തിന്റെ ചരിത്രം. നല്ലൊരു പങ്കാളിയെ കണ്ടെത്താനും, വിവാഹശേഷമുള്ള ബന്ധങ്ങളിൽ സ്നേഹവും പരസ്പര ബഹുമാനവും നിലനിർത്താനും വിശുദ്ധ വാലന്റൈന്റെ മാധ്യസ്ഥം തേടാം.
4. വിശുദ്ധ മഗ്ദലന മറിയം – ആത്മാഭിമാനത്തിനും സ്വയം തിരിച്ചറിവിനും
സ്ത്രീയുടെ മൂല്യം അവളുടെ ശാരീരിക സൗന്ദര്യത്തിലല്ല എന്ന് ഓർമ്മിപ്പിക്കുന്ന വ്യക്തിത്വമാണ് വിശുദ്ധ മഗ്ദലന മറിയത്തിന്റേത്. യേശുവിനോടുള്ള അഗാധമായ ഭക്തിയിലൂടെയും വിശ്വാസത്തിലൂടെയും അവൾ തന്റെ ജീവിതം പരിവർത്തനം ചെയ്തു. ബാഹ്യമായ സൗന്ദര്യസങ്കൽപ്പങ്ങളിലും ശരീരത്തെക്കുറിച്ചുള്ള മാനസിക പ്രയാസങ്ങളിലും വീണുപോകാതെ, സ്വന്തം ആത്മാഭിമാനവും മൂല്യവും തിരിച്ചറിയാൻ മഗ്ദലന മറിയത്തിന്റെ ജീവിതം സ്ത്രീകളെ പഠിപ്പിക്കുന്നു.
5. വിശുദ്ധ അഗതാ – സ്തനാർബുദവും ആരോഗ്യപ്രശ്നങ്ങളും
ഇന്ന് സ്ത്രീകളിൽ ഏറ്റവും കൂടുതൽ കണ്ടുവരുന്ന രോഗങ്ങളിലൊന്നാണ് സ്തനാർബുദം. മൂന്നാം നൂറ്റാണ്ടിൽ ജീവിച്ചിരുന്ന വിശുദ്ധ അഗതാ, ഒരു റോമൻ ഉദ്യോഗസ്ഥന്റെ ക്രൂരമായ പീഡനങ്ങൾക്കിരയാവുകയും അവളുടെ സ്തനങ്ങൾ മുറിച്ചുമാറ്റപ്പെടുകയും ചെയ്തു. എന്നാൽ അദ്ഭുതകരമായി അവൾ സൗഖ്യം പ്രാപിച്ചു. ശാരീരിക വേദനകളും സ്തനാർബുദം പോലുള്ള ഗുരുതര ആരോഗ്യപ്രശ്നങ്ങളും നേരിടുന്ന സ്ത്രീകൾക്ക് ആശ്വാസവും സഹനശക്തിയും നൽകുന്ന വിശുദ്ധയാണ് അഗതാ.
6. അലക്സാണ്ട്രിയയിലെ വിശുദ്ധ കാതറിൻ – ഏകസ്ഥ ജീവിതം നയിക്കുന്ന സ്ത്രീകൾ
വിവാഹം കഴിക്കാതെ സ്വന്തം ഇഷ്ടപ്രകാരവും ലക്ഷ്യങ്ങളോടെയും ജീവിക്കാൻ ആഗ്രഹിക്കുന്ന സ്ത്രീകളെ സമൂഹം പലപ്പോഴും കുറ്റപ്പെടുത്താറുണ്ട്. കാതറിൻ തനിക്ക് വന്ന രാജകീയ വിവാഹാലോചന നിരസിച്ച്, സ്വന്തം വിശ്വാസത്തിനും ലക്ഷ്യങ്ങൾക്കുമായി ജീവിതം മാറ്റിവച്ച ബുദ്ധിമതിയായ രക്തസാക്ഷിയാണ്. വിവാഹം കഴിക്കാതെ തന്നെ സഫലമായ ജീവിതം നയിക്കാൻ ആഗ്രഹിക്കുന്ന സ്ത്രീകൾക്ക് വലിയൊരു ഊർജ്ജമാണ് ഈ വിശുദ്ധ.
7. വിശുദ്ധ ജെറാർഡ് മജെല്ല – ഗർഭധാരണത്തിനും സന്താനഭാഗ്യത്തിനും
കുഞ്ഞുങ്ങൾക്കായുള്ള കാത്തിരിപ്പും ഗർഭധാരണവുമായി ബന്ധപ്പെട്ട തടസ്സങ്ങളും പല സ്ത്രീകളുടെയും വലിയ നിരാശയാണ്. ഗർഭകാലത്തെ സങ്കീർണ്ണതകളിൽ പെട്ട ഒരു സ്ത്രീക്ക് വിശുദ്ധ ജെറാർഡ് മജെല്ലയുടെ പ്രാർഥനയാൽ അദ്ഭുതകരമായ സൗഖ്യവും ആരോഗ്യമുള്ള കുഞ്ഞും ലഭിച്ച ചരിത്രമുണ്ട്. അതിനാൽ സന്താനഭാഗ്യത്തിനായി പ്രാർഥിക്കുന്നവർക്കും ഗർഭിണികൾക്കും ജെറാർഡ് മജെല്ല പ്രത്യേക മധ്യസ്ഥനാണ്.
8. വിശുദ്ധ മോനിക്ക – കുടുംബപ്രശ്നങ്ങൾക്കും ക്ഷമയ്ക്കും
തന്റെ മകനായ വിശുദ്ധ അഗസ്റ്റിന്റെ വഴിപിഴച്ച ജീവിതത്തിൽ മനംനൊന്ത് വർഷങ്ങളോളം പ്രാർഥിക്കുകയും ഒടുവിൽ മകനെ സന്മാർഗത്തിലേക്ക് തിരികെ കൊണ്ടുവരികയും ചെയ്ത അമ്മയാണ് വിശുദ്ധ മോനിക്ക. കുടുംബത്തിലെ പ്രശ്നങ്ങൾ, കുട്ടികളുടെ ഭാവി, ദാമ്പത്യത്തിലെ അസ്വാരസ്യങ്ങൾ എന്നിവ കാരണം വിഷമിക്കുന്ന സ്ത്രീകൾക്ക് ക്ഷമയോടെ പ്രാർഥിക്കാനുള്ള വലിയൊരു മാതൃകയാണ് മോനിക്ക.
9. വിശുദ്ധ ഡിംഫ്ന – മാനസികാരോഗ്യത്തിന്
ആധുനിക ജീവിതത്തിലെ മാനസിക സമ്മർദം, വിഷാദം, ഉത്കണ്ഠ എന്നിവ അനുഭവിക്കുന്നവർക്ക് അഭയമാണ് ഏഴാം നൂറ്റാണ്ടിൽ ജീവിച്ചിരുന്ന വിശുദ്ധ ഡിംഫ്ന. വീട്ടുസാഹചര്യങ്ങളിലെ പീഡനങ്ങളിൽ നിന്ന് ഓടി രക്ഷപ്പെടേണ്ടി വന്ന ഡിംഫ്ന, മാനസികാരോഗ്യ വെല്ലുവിളികൾ നേരിടുന്നവർക്ക് സമാധാനവും മനക്കരുത്തും നൽകുന്ന വിശുദ്ധയായി അറിയപ്പെടുന്നു.
10. വിശുദ്ധ ജിയന്ന ബെറെറ്റ മൊള – ജോലി ചെയ്യുന്ന അമ്മമാർക്ക്
കരിയറും കുടുംബവും ഒരുമിച്ച് മുന്നോട്ട് കൊണ്ടുപോകാൻ പാടുപെടുന്ന ഇരുപത്തൊന്നാം നൂറ്റാണ്ടിലെ സ്ത്രീകൾക്ക് ഏറ്റവും മികച്ച മാതൃകയാണ് വിശുദ്ധ ജിയന്ന. ഒരു ഡോക്ടറും അമ്മയുമായിരുന്ന ജിയന്ന, തന്റെ ഗർഭകാലത്ത് സ്വന്തം ജീവനേക്കാൾ ഗർഭസ്ഥ ശിശുവിന്റെ ജീവന് പ്രാധാന്യം നൽകി. ജോലി ചെയ്യുകയും അതേസമയം കുടുംബത്തിന് പ്രാധാന്യം നൽകുകയും ചെയ്യുന്ന അമ്മമാർക്ക് വിശുദ്ധ ജിയന്ന വലിയൊരു പ്രചോദനമാണ്.
11. വിശുദ്ധ സിറ്റ – വീട്ടുജോലികളും ദൈനംദിന ഉത്തരവാദിത്തങ്ങളും
പാചകം, തുണി അലക്കൽ, വീട് വൃത്തിയാക്കൽ തുടങ്ങിയ ദൈനംദിന ജോലികൾ പലപ്പോഴും മടുപ്പുളവാക്കുന്നതും അവസാനമില്ലാത്തതുമായി തോന്നാറുണ്ട്. ഇറ്റലിയിൽ ഒരു വീട്ടുജോലിക്കാരിയായി ജീവിച്ച വിശുദ്ധ സിറ്റ, താൻ ചെയ്ത എല്ലാ നിസ്സാര ജോലികളും ദൈവസ്നേഹത്തോടും സന്തോഷത്തോടും കൂടിയാണ് ചെയ്തത്. വീട്ടുജോലികളിൽ തളർന്നുപോകുന്ന സ്ത്രീകൾക്ക് ആ ജോലികളിലും മഹത്വമുണ്ടെന്ന് സിറ്റയുടെ ജീവിതം കാണിച്ചുതരുന്നു.
12. വിശുദ്ധ അന്നാ – മുത്തശ്ശിമാർക്കും വാർധക്യകാലത്തിനും
മാതാവിന്റെ അമ്മയും യേശുവിന്റെ മുത്തശ്ശിയുമായ വിശുദ്ധ അന്ന, വാർധക്യത്തിലേക്ക് കടക്കുന്ന സ്ത്രീകൾക്കും മുത്തശ്ശിമാർക്കും അനുയോജ്യയായ വിശുദ്ധയാണ്. വാർധക്യത്തിൽ മറിയത്തിന് ജന്മം നൽകിയ അന്നാ, ജീവിതത്തിന്റെ ഓരോ ഘട്ടത്തിലും ദൈവത്തിന്റെ അനുഗ്രഹവും ഉദ്ദേശ്യവുമുണ്ടെന്ന് ഓർമ്മിപ്പിക്കുന്നു.
ജീവിതത്തിലെ ഏത് പ്രതിസന്ധി ഘട്ടത്തിലും ഈ വിശുദ്ധരുടെ ജീവിതത്തിലേക്ക് നോക്കുന്നതും അവരുടെ മാധ്യസ്ഥം അപേക്ഷിച്ച് പ്രാർഥിക്കുന്നതും സ്ത്രീകൾക്ക് വലിയൊരു മാനസിക സമാധാനവും ദിശാബോധവും നൽകും.
