ദുബായിൽ സെപ്റ്റംബര് 30 മുതല് ഒക്ടോബര് രണ്ട് വരെ നടക്കുന്ന കത്തോലിക്ക കോണ്ഗ്രസിന്റെ പ്രഥമ ആഗോളസംഗമത്തിന്റെ ലോഗോ പ്രകാശനം ചെയ്തു. സീറോ മലബാര് സഭയിലെ 34 രൂപതകളില് നിന്നുള്ള അല്മായ പ്രതിനിധികള് സംഗമത്തിൽ പങ്കെടുക്കും. പാലാരിവട്ടം പിഒസി-യില് നടന്ന ചടങ്ങില് സീറോ മലബാര് സഭ മേജര് ആര്ച്ച്ബിഷപ്പ് കര്ദ്ദിനാള് മാര് ജോര്ജ്ജ് ആലഞ്ചേരി ലോഗോ പ്രകാശനം നിര്വ്വഹിച്ചു.
സഭയുടെ വളര്ച്ചയില് കത്തോലിക്ക കോണ്ഗ്രസ് വഹിക്കുന്ന പങ്ക് സ്തുത്യര്ഹമാണെന്ന് കർദ്ദിനാൾ പറഞ്ഞു. കത്തോലിക്ക കോണ്ഗ്രസിന്റെ ആഗോളസംഗമം സഭയ്ക്കും സമുദായത്തിനും പുത്തനുണര്വും പുതുജീവനും നല്കും. ലോകത്തിന്റെ നാനാഭാഗത്തു നിന്നും സമുദായനേതാക്കളുടെ പ്രതിനിധികള്ക്കൊപ്പം സഭാപിതാക്കന്മാരും സംഗമത്തില് പങ്കാളികളാകും. കാര്ഷികമേഖലയെ ഉദ്ധരിക്കാനുള്പ്പെടെയുള്ള കര്മ്മപദ്ധതികള്ക്ക് സംഗമം ഇടവരുത്തുമെന്നും കര്ദ്ദിനാള് പ്രത്യാശ പ്രകടിപ്പിച്ചു.
സീറോ മലബാര് സഭ ആഗോളതലത്തില് വളരുന്നതിനോടൊപ്പം സഭയുടെ ഒദ്യോഗിക അല്മായ പ്രസ്ഥാനമായ കത്തോലിക്ക കോണ്ഗ്രസും ആഗോളതലത്തില് വളരുന്നതിന് സംഗമം ഉപകരിക്കുമെന്ന് മുഖ്യപ്രഭാഷണം നടത്തിയ ബിഷപ് ലെഗേറ്റ് മാര് റെമീജിയോസ് ഇഞ്ചനാനിയില് അഭിപ്രായപ്പെട്ടു.
കര്ദ്ദിനാള് മാര് ജോര്ജ്ജ് ആലഞ്ചേരി സംഗമത്തിന്റെ മുഖ്യ രക്ഷാധികാരിയും, മാര് റെമീജിയോസ് ഇഞ്ചനാനിയിൽ, ഡയറക്ടര് ഫാ. ജിയോ കടവി എന്നിവർ രക്ഷാധികാരികളുമാണ്. പ്രസിഡന്റ് അഡ്വ. ബിജു പറയന്നിലം ചെയര്മാനായും ഗ്ലോബല് ഭാരവാഹികളായ ടോണി പുഞ്ചക്കുന്നേല്, ഡോ. മോഹന് തോമസ്, ബെന്നി മാത്യു, ഡേവീസ് എടക്കളത്തൂര് എന്നിവര് വൈസ് ചെയര്മാന്മാരുമായി വിവിധ കമ്മറ്റികള്ക്കും രൂപം നല്കി. യുഎഇ-യിലെയും വിവിധ ഗള്ഫ് രാജ്യങ്ങളിലേയും എസ്എംസിഎ ഭാരവാഹികള് സമ്മേളനത്തിന് നേതത്വം നല്കും.