ശരത്കാലമെത്തുന്നതോടെ പാശ്ചാത്യ കഫേകളിൽ, പ്രത്യേകിച്ച് സ്റ്റാർബക്സ് പോലുള്ള പ്രശസ്ത ബ്രാൻഡുകളിൽ തരംഗമാകുന്ന ഒന്നാണ് ‘പമ്പ്കിൻ സ്പൈസ് ലാറ്റേ’ (Pumpkin Spice Latte). കറുവപ്പട്ട, ഗ്രാമ്പൂ, സാഫ്രോൺ, ജാതിക്ക തുടങ്ങിയ സുഗന്ധവ്യഞ്ജനങ്ങളുടെ മിശ്രിതമാണ് ഇതിലെ പ്രധാന താരം. എന്നാൽ, ആധുനിക കോഫി ഷോപ്പുകൾ ഈ രുചിക്കൂട്ട് ട്രെൻഡാക്കുന്നതിനും എണ്ണൂറിലധികം വർഷങ്ങൾക്ക് മുൻപ്, പന്ത്രണ്ടാം നൂറ്റാണ്ടിൽത്തന്നെ ഇതേ സുഗന്ധവ്യഞ്ജന മിശ്രിതം ഉപയോഗിച്ച് വിശിഷ്ടമായ വിഭവങ്ങൾ ഉണ്ടാക്കിയ ഒരു വ്യക്തിയുണ്ട് — ബൈൻഗനിലെ വിശുദ്ധ ഹിൽഡെഗാർഡ് (St. Hildegard of Bingen).
‘കുക്കീസ് ഓഫ് ജോയ്’
മധ്യകാലഘട്ടത്തിൽ ജീവിച്ചിരുന്ന ജർമ്മൻ ബെനഡിക്റ്റൈൻ കന്യാസ്ത്രീയും മിസ്റ്റിക് എഴുത്തുകാരിയും വൈദ്യശാസ്ത്ര വിശാരദയുമായിരുന്ന വിശുദ്ധ ഹിൽഡെഗാർഡ്, സുഗന്ധവ്യഞ്ജനങ്ങളുടെ ഔഷധഗുണങ്ങളെയും ആത്മീയ വശങ്ങളെയും കുറിച്ച് വിശദമായി പഠിച്ചിരുന്നു. മനുഷ്യന്റെ മനസ്സിനും ശരീരത്തിനും സന്തോഷവും സമാധാനവും നൽകാൻ ചില സുഗന്ധവ്യഞ്ജന കൂട്ടുകൾക്ക് സാധിക്കുമെന്ന് അവർ വിശ്വസിച്ചു. ഇതിനായി അവർ തയാറാക്കിയ പ്രശസ്തമായ ഒരു പാചകക്കുറിപ്പാണ് ‘കുക്കീസ് ഓഫ് ജോയ്’ (Cookies of Joy / Nervous Biscuits).
“ഈ വിശിഷ്ട മിശ്രിതം മനുഷ്യന്റെ കയ്പേറിയ വികാരങ്ങളെയും ദുഃഖങ്ങളെയും ഇല്ലാതാക്കുകയും ഹൃദയത്തെ സന്തോഷിപ്പിക്കുകയും ചെയ്യുന്നു”- വിശുദ്ധ ഹിൽഡെഗാർഡ് പറഞ്ഞിരുന്നു.
ഇന്നത്തെ ‘പമ്പ്കിൻ സ്പൈസ്’ കൂട്ടുകളിൽ ഉപയോഗിക്കുന്ന അതേ ചേരുവകൾ തന്നെയാണ് വിശുദ്ധ ഹിൽഡെഗാർഡും തന്റെ കുക്കീസിനായി നിർദേശിച്ചിരുന്നത്. ഇവയോടൊപ്പം അല്പം ഗോതമ്പുപൊടിയും നെയ്യും ചേർത്തുണ്ടാക്കുന്ന കുക്കികൾ, കോപം ശമിപ്പിക്കാനും മനസ്സിന് ഏകാഗ്രത നൽകാനും സഹായിക്കുമെന്നാണ് വിശുദ്ധ ഹിൽഡെഗാർഡ് തന്റെ ‘ഫിസിക’ (Physica) എന്ന ഗ്രന്ഥത്തിൽ കുറിച്ചിരിക്കുന്നത്.
ആത്മീയതയും ആരോഗ്യവും കൈകോർക്കുമ്പോൾ
വെറുമൊരു ഭക്ഷണക്രമം എന്നതിലുപരി ദൈവത്തിന്റെ സൃഷ്ടികളിലെ ഔഷധഗുണങ്ങളെ തൊട്ടറിഞ്ഞ വ്യക്തിയായിരുന്നു വിശുദ്ധ ഹിൽഡെഗാർഡ്. ആധുനിക ലോകം ഇന്ന് വലിയ വിലകൊടുത്ത് വാങ്ങുന്ന ‘വെൽനെസ് ട്രെൻഡുകൾ’ (Wellness Trends) നൂറ്റാണ്ടുകൾക്ക് മുൻപേ സഭയിലെ ഒരു വിശുദ്ധ പ്രയോഗത്തിൽ വരുത്തിയിരുന്നുവെന്നത് ഏറെ ശ്രദ്ധേയമാണ്.
ഇന്ന് നിങ്ങൾ ഒരു പമ്പ്കിൻ സ്പൈസ് കോഫിയോ കുക്കിയോ കഴിക്കുമ്പോൾ ഓർക്കുക അത് കേവലം ഒരു താൽക്കാലിക ഫാഷൻ ട്രെൻഡ് മാത്രമല്ല, മറിച്ച് മധ്യകാലഘട്ടത്തിലെ ഒരു വിശുദ്ധ മനസ്സിന് സമാധാനം കണ്ടെത്താൻ നിർദേശിച്ച ആത്മീയ-ഔഷധ കൂട്ട് കൂടിയാണ്!
