കൗമാരപ്രായക്കാരായ മക്കളെ വളർത്തുക എന്നത് മാതാപിതാക്കൾക്ക് ഏറെ വെല്ലുവിളികൾ നിറഞ്ഞ കാര്യമാണ്. ചെറിയ കാര്യങ്ങൾക്ക് ദേഷ്യപ്പെടുക, മുറിക്കുള്ളിൽ ഒതുങ്ങിക്കൂടുക, ചോദ്യങ്ങൾക്ക് ഒറ്റവാക്കിൽ മറുപടി നൽകുക തുടങ്ങിയ മാറ്റങ്ങൾ ഈ പ്രായത്തിൽ സാധാരണമാണ്. എന്നാൽ, ഇത്തരം പെരുമാറ്റങ്ങളെല്ലാം അനുസരണക്കേടായി കാണാതെ, അവരുടെ മനസ്സിൽ നടക്കുന്ന മാറ്റങ്ങൾ മനസ്സിലാക്കാൻ മാതാപിതാക്കൾ ശ്രമിക്കണം. ഉപദേശിക്കുന്നതിനുമുമ്പ് അവരെ കേൾക്കാനും തിരുത്തുന്നതിനുമുമ്പ് അവരുടെ വികാരങ്ങൾ തിരിച്ചറിയാനും കഴിയുമ്പോഴാണ് ബന്ധം കൂടുതൽ ശക്തമാകുന്നത്.
മാറ്റങ്ങൾ ശ്രദ്ധിക്കാം, കുറ്റപ്പെടുത്താതെ
ശാരീരികവും മാനസികവുമായ മാറ്റങ്ങൾ കൗമാരക്കാരുടെ പെരുമാറ്റത്തെ സ്വാധീനിക്കാറുണ്ട്. പഠനഭാരം, കൂട്ടുകാരുമായുള്ള ബന്ധം, മറ്റുള്ളവരുടെ അഭിപ്രായങ്ങൾ എന്നിവയും അവരെ അലട്ടാം. ചെറിയ കാര്യങ്ങൾക്കുപോലും ദേഷ്യപ്പെടുകയോ വിഷമിക്കുകയോ ചെയ്യുന്നത് എല്ലായ്‌പ്പോഴും മനഃപൂർവമായിരിക്കണമെന്നില്ല. അതിനാൽ, കുറ്റപ്പെടുത്തുന്നതിനു പകരം എന്താണ് അവരെ അലട്ടുന്നതെന്ന് സ്നേഹത്തോടെ ചോദിച്ചറിയുക.
മൗനത്തിനു പിന്നിലെ വികാരങ്ങൾ തിരിച്ചറിയാം
കൗമാരക്കാർ പലപ്പോഴും അവരുടെ വിഷമങ്ങൾ തുറന്നുപറയാൻ മടിച്ചേക്കാം. പരിഹസിക്കപ്പെടുമോ, കുറ്റപ്പെടുത്തുമോ എന്ന ഭയം അവരെ മൗനത്തിലേക്ക് നയിക്കാം. അവരുടെ പെരുമാറ്റത്തിൽ പെട്ടെന്നുള്ള മാറ്റങ്ങൾ, അമിതമായ ഒറ്റപ്പെടൽ, ഉറക്കത്തിലോ പഠനത്തിലോ ഉണ്ടാകുന്ന വ്യത്യാസങ്ങൾ എന്നിവ ശ്രദ്ധിക്കണം. ഇത്തരം മാറ്റങ്ങൾ തുടർന്നാൽ സ്നേഹപൂർവം സംസാരിക്കുകയും ആവശ്യമെങ്കിൽ വിദഗ്ധസഹായം തേടുകയും ചെയ്യുക.
ഉപദേശിക്കുന്നതിനുമുമ്പ് കേൾക്കാം
മക്കൾക്ക് എല്ലാ സമയത്തും ഉപദേശങ്ങളല്ല ആവശ്യം; ചിലപ്പോൾ അവരുടെ വാക്കുകൾ ക്ഷമയോടെ കേൾക്കാൻ ഒരാളുണ്ടെന്ന ഉറപ്പാണ് വേണ്ടത്. അവർ സംസാരിക്കുമ്പോൾ ഇടയ്ക്കു തടസ്സപ്പെടുത്താതെയും ഉടൻ കുറ്റപ്പെടുത്താതെയും കേൾക്കുക. അവരുടെ പ്രശ്നങ്ങൾ നിസ്സാരമായി കാണാതെ വികാരങ്ങൾക്ക് പ്രാധാന്യം നൽകുക. അങ്ങനെ ചെയ്യുമ്പോൾ മാതാപിതാക്കളോട് കാര്യങ്ങൾ തുറന്നുപറയാനുള്ള വിശ്വാസം അവരിൽ വളരും.
സ്നേഹവും സ്വാതന്ത്ര്യവും ഒരുപോലെ നൽകാം
സ്വന്തം അഭിപ്രായങ്ങളും തീരുമാനങ്ങളും രൂപപ്പെടുത്താൻ കൗമാരക്കാർ ആഗ്രഹിക്കുന്നു. അതിനാൽ, എല്ലാ കാര്യങ്ങളും നിയന്ത്രിക്കുന്നതിനുപകരം പ്രായത്തിനനുസരിച്ചുള്ള സ്വാതന്ത്ര്യം നൽകണം. അതോടൊപ്പം, വ്യക്തമായ നിയമങ്ങളും ഉത്തരവാദിത്വങ്ങളും ഉണ്ടായിരിക്കണം. മൊബൈൽ ഉപയോഗം, പഠനം, കൂട്ടുകെട്ടുകൾ തുടങ്ങിയ വിഷയങ്ങളിൽ ശകാരിക്കുന്നതിനുപകരം പരസ്പരം സംസാരിച്ച് തീരുമാനങ്ങളിലെത്താം. തെറ്റുകൾ സംഭവിക്കുമ്പോൾ അവയെ പഠിക്കാനുള്ള അവസരങ്ങളായി കാണുകയും വേണം.
സ്നേഹത്തോടെ കൂടെയുണ്ടാകാം
കൗമാരക്കാർക്ക് മാതാപിതാക്കളുടെ സ്നേഹവും പിന്തുണയും ഈ കാലഘട്ടത്തിൽ ഏറെ പ്രധാനമാണ്. ഒരുമിച്ചുള്ള ഭക്ഷണം, ചെറിയ സംഭാഷണങ്ങൾ, കുടുംബത്തോടൊപ്പമുള്ള സമയം എന്നിവ ബന്ധം ശക്തമാക്കും. മക്കളുടെ കഴിവുകളെ അംഗീകരിക്കുകയും മറ്റുള്ളവരുമായി താരതമ്യം ചെയ്യാതിരിക്കുകയും ചെയ്യുക. പ്രശ്നങ്ങൾ നേരിടുമ്പോൾ അവർക്ക് ആശ്രയിക്കാവുന്ന ഇടമാണ് കുടുംബമെന്ന ബോധ്യം നൽകണം.
കൗമാരപ്രായത്തിലെ വിഷമങ്ങൾ ദീർഘകാലം തുടരുകയോ ദൈനംദിന ജീവിതത്തെ സാരമായി ബാധിക്കുകയോ ചെയ്താൽ മാനസികാരോഗ്യ വിദഗ്ധന്റെ സഹായം തേടാൻ മടിക്കരുത്.
മനസ്സിലാക്കലാണ് ബന്ധത്തിന്റെ അടിത്തറ
കൗമാരക്കാരെ നല്ല രീതിയിൽ വളർത്തുക എന്നത് അവരുടെ തെറ്റുകൾ തിരുത്തുക മാത്രമല്ല, അവരെ മനസ്സിലാക്കി കൂടെ നടക്കുക കൂടിയാണ്. സ്നേഹത്തോടെ കേൾക്കുകയും ആവശ്യമായ സ്വാതന്ത്ര്യം നൽകുകയും തെറ്റുകൾ സംഭവിക്കുമ്പോൾ ക്ഷമയോടെ വഴികാട്ടുകയും ചെയ്യുന്ന മാതാപിതാക്കൾ മക്കൾക്ക് വലിയ കരുത്താണ്. തിരുത്തുന്നതിനുമുമ്പ് മനസ്സിലാക്കാനും ഉപദേശിക്കുന്നതിനുമുമ്പ് കേൾക്കാനും നമുക്ക് കഴിയട്ടെ.
വിവർത്തനം: ഡിൻസി തോമസ്
