യേശു ശിഷ്യന്മാർക്ക് ശിഷ്യത്വത്തെക്കുറിച്ചു നൽകുന്ന പ്രഭാഷണമാണ് ലൂക്കാ സുവിശേഷത്തിലെ ആറാം അധ്യായം. ജീവിതത്തിൽ പ്രതിസന്ധികൾ ഉണ്ടാകുമ്പോൾ ക്രിസ്തുവാകുന്ന ഉറച്ച പാറമേൽ അടിസ്ഥാനമുറപ്പിക്കാൻ ഈ സുവിശേഷം നമ്മെ ആഹ്വാനം ചെയ്യുന്നു.
നമ്മുടെ വാക്കും പ്രവർത്തിയും ഒരുപോലെ ആയിരിക്കണം. ക്രിസ്ത്യാനിയാണെന്നു പറഞ്ഞ് ജീവിച്ചാൽ മാത്രം പോരാ, അത് ജീവിതത്തിൽ പ്രവൃത്തികളിലൂടെ ആവിഷ്‌കരിക്കാനും സാധിക്കണം. ക്രിസ്തുവിന്റെ വാക്കിനോട് പൂർണ്ണമായ അനുസരണവും വിധേയത്വവും പുലർത്താൻ സാധിക്കണം. രണ്ടു രീതിയിൽ പണിയപ്പെട്ട ഭവനങ്ങളുടെ കഥയിലൂടെ ക്രിസ്തു വ്യക്തമാക്കുന്നത് ഇതാണ്. ക്രിസ്തുവിൽ വിശ്വസിച്ച് അത് ജീവിതത്തിൽ പകർത്തുമ്പോൾ ആഴമായ അടിസ്ഥാനം നമുക്കുണ്ടാകും; അല്ലാത്തതെല്ലാം തകർക്കപ്പെടും.
അതുകൊണ്ട് നമുക്ക് നമ്മുടെ ജീവിതത്തെക്കുറിച്ച് ചിന്തിക്കാം. വലിയ ദുരിതങ്ങളും കാറ്റും കോളുമൊക്കെ ഉണ്ടാകുമ്പോൾ നമുക്ക് ആഴത്തിലുള്ള അടിസ്ഥാനം ഉണ്ടോയെന്ന് ചിന്തിക്കാം. ഉലയാതെ പിടിച്ചുനിൽക്കണമെങ്കിൽ അവനിലുള്ള അടിസ്ഥാനം ഉണ്ടാകണം. ഇനി അതില്ലെങ്കിൽ ആഴത്തിൽ കുഴിക്കാം. പാപത്തിന്റെ എല്ലാ മുള്ളുകളെയും വേരുകളെയും പിഴുതുകളയാം. ആ കുഴികളിലേക്ക് ക്രിസ്തുവിനെ നിറയ്ക്കാം, അവനെ സ്നേഹിക്കാം, അനുസരിക്കാം, ഉലയാതെ പിടിച്ചുനിൽക്കാം.
ഫാ. ജോസഫ് കുടിലിൽ
